Nenged-ulaula 6:7 - Ke meupiya ne tudtul mekeatag ki Hisu Kristu

⁷ Ketà ne ed-iseg-iseg se kebpekeeneb dut te ibpesabut dan ne Lalag te Eleteala. Ne ed-iseg-iseg dema se kerakel dut te mibperetiyaya ki Hisus kayi te Hirusalim, ne merakel dema se menge terebpelengesa ne mibperetiyaya ki Hisus.

Nenged-ulaula 6:7 ပူးပေါင်းရင်းမြစ်များ

Mateo 19:30

Ugaid ne merakel ne menge etew guntaan,” ke si Hisus, “ne mepurù se ketengdanan din ne ketà te akir din ne hewii ne sikandan ke pinekemevavà te langun. Ne ruen menge etew guntaan ne mevavà dan nevenar, ne ketà te akir din ne hewii ne sikandan se pinekebmepurù se ketengdanan din.”

Lucas 2:34

Impengeningeni ni Simeon te ebpeneuven dan te Eleteala, ne migkahi en sikandin kayi te ki Maria ke iney ni Hisus te, “Ini se batà ne daan en ne mibpemilì te Eleteala ne tuus te Eleteala kayi te menge kevuwaran ni Israyil. Ke menge etew ne ed-engkenà kandin ne edusaan, ne ke menge etew ne edtelimà kandin ne ibpeliyu te Eleteala. Sikandin iya ke tuus ne riyà ebpuun te Eleteala kayi te sikandan, ugaid ne merakel se ed-engkenà kandin.

Juan 12:42

Misan iring ketà se lalag ni Isayas ne ruen ded lavew merakel ne menge egkeunutan te Hudiyanen ne mibperetiyaya ki Hisus. Ugaid ne warà dan mebpepayag su neandek dan dut te menge Peresiyu ke ibpeawà dan na kenà dan ebpekelusud dut te baley ne ebpengedian te menge Hudiyanen te penduan dan.

Nenged-ulaula 12:24

Ugaid ne mid-iseg ke kebpesabut dut te Lalag te Eleteala, ne mibmerakel ke menge etew ne mibperetiyaya ketà.

Nenged-ulaula 13:8

Ugaid ne mibelavag kandan ini se metau ne ebaal te malik mata ne ed-ingeranan ki Barhisus ne ed-ingeranan ded maa ki Elimas (su ini se ngaran din dut te kinehiyan ne Gerisiyanen) su kiyug din ne kenà ebpekeperetiyaya ke gubinedur ki Hisus.

Nenged-ulaula 14:22

Ketà ne menge inged ne impenurù dan se ibpeiseg ke keduma dut te langun ne menge mibperetiyaya ki Hisus ne mibag-et dan ke hinawa dut te menge etew te kenà medlekà dut te peretiyaya ran. Su impesabut dan te, “Ebpevayà ki pà iyan te menge kemerehenan te kenà ki pà ebpekelusud dut te Edetuan te Eleteala,” ke sikandan.

Nenged-ulaula 19:20

Ne ketà te arà ne ned-ulaula, ne mid-iseg ke kebpesabut dut te lalag te Kerenan wey neumanan pà ke menge mibperetiyaya.

Nenged-ulaula 2:47

Ne mideyù dan te Eleteala, ne egkeedatan dan dut te langun ne menge etew. Ne uman gewii ne ruen menge etew ne mibperetiyaya ki Hisus ke Kerenan tew ne ini ne menge etew ne ingkeuman te Kerenan dut te langun ne mibperetiyaya.

Nenged-ulaula 21:20

Nerineg dan ini se tudtul ni Pablo ne mideyù dan te Eleteala. Ne migkehiyan dan si Pablo te, “Netuenan nu, suled, te medmerakel en se menge ruma tew ne Hudiyanen ne mibperetiyaya ki Hisus, ne langun dan ne meilut se kedtuman dan te penduan ne intetahak ni Moises.

Nenged-ulaula 6:1

Ketà te arà ne hewii te ed-iseg-iseg en ke kerakel dut te menge mibperetiyaya ki Hisus, ne ruen nevaluy ne kewehaan dan dut te teleinged ne menge Hudiyanen ne Hibruwanen se kinehiyan din wey ke menge Hudiyanen ne Gerisiyanen se kinehiyan din. Iyan migkahi dut te menge Hudiyanen ne Gerisiyanen se kinehiyan din ne kenà egkevehayan ke menge balu ne meritan te kureta ne ed-um-umunen dan te uman gewii.

Ruma 1:5

Ibpepevayà ki Hisu Kristu ne midtevangan a te Eleteala te nevaluy a ne kedserihan ni Hisus te ebpesabut mekeatag kandin diyà te langun ne menge etew. Su egkiyuhan din te langun ne menge etew ne ebpekeperetiyaya ki Hisus ne eduma kandin. Ne kayi te keduma ran kandin ne sikandin se edeyuen diyà te kandan.

Ruma 16:26

Ne arà se benar ne impayag en guntaani te Eleteala keytew sabap dut te impesurat dut te menge etew ne ebpelembas te lalag din dengan. Ne guntaani ne insuhù en dut te Eleteala ne warà kemetayen din te ibpepenudtul ini kayi te langun ne menge etew kayi te ampew te dunya su apey langun ne ebpekeperetiyaya wey ebpekeperumaruma te menge suhù din.

Gelasiya 1:23

Ne diyan e rà netueni nikandan te nerineg dan dut te ruma ran se egkahi te, “Arà se etew ne si Pablo ke laus ne ebpekesakit keytew rengan te mibperetiyaya en ki Hisus. Ugaid ne gunteani ne sikandin en maa se ebpesabut dut te penduan ne ebpeengkeran din keytew rengan.”

Gelasiya 6:10

Ini be te kayi ki pà te ampew te dunya, ne edsemikar kiyu te ed-ulaula te meupiya dut te langun ne menge etew, muna en ke menge ruma ta ne mibperetiyaya en ki Hisus.

Kulasi 1:6

Ini imbe se Meupiya ne Tudtul se ibpemenudtul en id-eneb kayi te ampew te dunya, ne langun ne etew ne ebperetiyaya ne egkevelvelewanan ke ulaula ran iring ded dema keniyu. Su nevelvelewanan ke ulaula niyu te nerineg niyu wey neheram niyu ke tavang te Eleteala keniyu.

2 Tiselunika 1:8

Ketà te kebpekeuma rin ne iring te egkeregreg ne apuy ini se lawa rin. Ne edusaan din ke menge etew ne mid-engkenà te Eleteala, ini se kenà ebperumaruma rut te Meupiya ne Tudtul mekeatag ki Hisu Kristu ke Kerenan tew.

2 Timoteo 2:9

Tembù be egkerasey a guntaan su nevilanggù a iring te medmeraat ne etew. Ugaid ne misan mibakù a te sengkalì kayi, ne kenà dan egkevangen ke kebpemenudtul te Lalag te Eleteala.

Hibruhanen 11:8

Ne si Abraham dema rengan, ne sabap dut te kedsarig din te Eleteala ne midumaan din ke insuhù te Eleteala kandin te ebpeewaan dut te inged din su ebpependiyanen te inged ne impasad kandin te Eleteala, misan warà din metueni ke inged ne ebpevayaan kandin.

Hibruhanen 5:9

Ne geina te warà misan deisek dà ne igkesawey kandin dut te langun ne mid-ulaula rin, ne sikandin se dait ne ebpebpatey dut te salà te langun ne menge etew su apey langun ne eduma rut te lalag din ne egkevehayan te umur ne warà edtemanan din.

Hudas 1:20

Ugaid ne sikiyu ne menge suled ku, ne ibpeunsad niyu ke langun ne ed-ul-ulaan niyu kayi te sarig ne imbehey kenitew te Eleteala. Ne kayi te kebpengeningeni tew te Eleteala ne ignganey tew rut te Kedesenan ne Ebpetuntul te Menusiyà te iyan mebayàbayà te itungan tew su apey ta egketueni ke engkey se egkiyuhan te Eleteala ne kebpengeningeni tew.

Hudas 1:3

Menge suled ne igkelimù ku, mibpenemaran ku se kedsurat ku keniyu mekeatag te peretiyaya tew ne egkeheram te langun tew ne mibperetiyaya. Ugaid ne iyan migavan te itungan ku ne edsuratan ku pà sikiyu te kegkevag-et te itungan niyu te ed-itindeg dut te peretiyaya niyu su ini se penurù se imbehey te Eleteala dut te menge etew rin ne kenà en egkeumanan te misan deisek dà.