Nenged-ulaula 4:32 - Ke meupiya ne tudtul mekeatag ki Hisu Kristu

³² Langun dan ne mibperetiyaya ki Hisus ne egkeseveka ke itungan dan wey hinawa ran. Warà seveka kandan ne nekepegitung dut te kandin ne menge aren ne kandin dà, ugaid ne mibpevegbehayà dan te langun ne kearen dan.

Nenged-ulaula 4:32 ပူးပေါင်းရင်းမြစ်များ

Juan 17:11

Ne guntaani ne ed-ulì ad diyà te keykew ne kenà ad ed-ubpà kayi te dunya, ugaid ne ini se menge etew ta ne kayi ran ded te ampew te dunya. Is, Amà ne berekat,” ke si Hisus, “ipata nu sikandan te ralan te kerekelà te gehem te ngaran nu ne imbehey nu kediey su apey meseveka sikandan iring dut te kegkeseveka ta.

Nenged-ulaula 1:14

Langun dan ne lelayun eburun su ebpengeningeni diyà te Eleteala, ne mid-amung dema ke menge meritan, elin dutun si Maria ke iney ni Hisus wey ke menge meama ne ari ni Hisus.

Nenged-ulaula 2:1

Guna su neuma en ke hewii te pista ne ed-ingaranan te Pintikusti, ne langun ne mibperetiyaya ki Hisus ne nevurun diyà te seveka ne valey.

Nenged-ulaula 5:12

Ne merakel se ulaula ne mekegeyip wey mekeinuinu ne ned-ulaula ne mibeelan dut te menge kedserihan ni Hisus diyà dut te menge etew. Ne langun dut te menge mibperetiyaya ki Hisus ne lelayun egkevurun diyà te ed-ingaranan te “Palàpalà ni Salomon”.

Ruma 12:5

Ne iring din ded dema te sikitew ne menge mibperetiyaya, su misan medmerakel tew ne neseveka ki rà ne lawa sabap dut te kebperetiyaya tew ki Hisu Kristu. Ne iring ded be rema ketà ke kebpemekebpikit tew te menge ruma tew, su iring ki rut te merakel ne edsusunan te lawa tew.

1 Kurintu 1:10

Menge suled ku te ebperetiyaya, ruen ebuyuen ku keniyu ne ebperumdumaan niyu su suhù a ni Hisu Kristu ke Kerenan tew. Iyan ku ebuyuen ne egkeseveka kew su apey warà kebpemekedlewanà diyà te keniyu. Uya, egkeseveka ke itungan niyu wey ke hinawa niyu.

2 Kurintu 13:11

Na menge suled ku, ini se egkehiyen ku kayi te ketepusan te surat ku. Ibpeiseg niyu pà ke meupiya ne ulaula niyu, ne pemineha niyu ke insuhù ku kayi. Ne medseveka kew te hinawa niyu su apey kew mebmelintad. Su embiya ini se ed-ul-ulaan niyu ne ke Eleteala ne egkelimù keniyu wey ebehey te kebmelintad te hinawa niyu se ebpekiduma keniyu.

Pilipus 1:27

Na memekebalak kiyu ve se kenà, ne itahù niyu te itungan se iyan niyu rà ul-ulaa ke edait ne ulaula rut te menge mibperetiyaya te Meupiya ne Tudtul mekeatag ki Hisu Kristu. Ketà ne misan ebpendiyan a te keniyu etawa kenà, ne ke tudtul mekeatag keniyu ne ebpekeuma kayi te kedì ne warè en ebpekesawug ne meraat su seveka rà ne neuyun kew en dut te sarig niyu ki Hisu Kristu, ne ebpetebtevangey kew en te edtindeg dut te Meupiya ne Tudtul ne mibperetiyaya niyu.

1 Pedro 3:8

Ne ruen dema egkehiyen ku keniyu te langun ne menge mibperetiyaya, iyan iya se medseveka se itungan ta wey ke hinawa ta. Pelimlimuey kiyu rut te menge ruma ta iring te telteledsuled, ne ebpetultulengerey kiyu ne kenà ki mepelevawen.

1 Pedro 4:11

Embiya ruen keyta ne nevehayan te ketau te ebpesabut se Lalag te Eleteala, ne iyan iya se edtentenuran din te ini se Lalag te Eleteala ne ibpesabut din. Ne embiya ruen ketau ta te edtavang te menge ruma ta, ne iyan iya se kenà ta egkelipatan ne ini se kevaher ta te edtavang ne riyà ebpuun te Eleteala. Piya engkey en ne helevek ne imbehey keyta te Eleteala ne ebeelan ta, ne iyan iya se ed-ey-eyaran ta te ebaal egenat dut te tavang ne ebpuun ki Hisu Kristu su apey Eleteala se edeyuen dut te menge etew. Su sikandin dà se edait ne edeyuen, ne sikandin dà se warà ebpekerepeng dut te gehem din taman te taman.