Mateo 6:9 - Ke meupiya ne tudtul mekeatag ki Hisu Kristu

⁹ “Embiya ebpengeningeni kew ne iringa niyu kayi, ‘Ah, Amà diyà te langit, berekat ne edati te menusiyà ke ngaran nu.

Mateo 6:9 ပူးပေါင်းရင်းမြစ်များ

Mateo 10:29

Su ruen deisek ne pepenuk ne egkepemasa te lelima ne timan ne deruwa rà ne tumbaha. Ne misan iring ketà se kevavà te elehà din, ne warà seveka kandan ne egkeulug diyà te tanà embiyà kenà egkiyug ke Amey niyu ne Eleteala.

Mateo 23:9

Liyu rà te tuney ne amey niyu, ne kenà kew ed-amey te piya entei kayi te ampew te dunya su seveka rà ke amey niyu ne Eleteala riyà te langit.

Mateo 26:29

Egkehiyen ku ini keniyu te kenà ad maa ed-inum kayi te ed-inumen ini taman te kenà egkeuma ke hewii keuremà te ebpekeamung kew en te Edetuan te Amey ku ne Eleteala ne ketà ne egkevehu en ke ed-inumen tew.”

Mateo 26:42

Ne mid-awà en maa si Hisus ne midsaup mibpengeningeni se egkahi te, “E, Amà, embiya kenà egkepakey ne ibpesahad kediey ini se keresayan ku, ne metuman en.”

Mateo 5:16

Ne iring ded te sulù ne impeluukluuk te saag ne ebpekerayag te langun ne menge etew ketà te lusud te baley, ne pekereyaha niyu ke sulù niyu riyà te menge etew su apey ran mekita ke meupiya ne ed-ul-ulaan niyu ne ebpekereyù dan dut te Amey niyu ne Eleteala diyà te langit.”

Mateo 5:48

Tembù be sikiyu ne pekeimpit kew te ulaula niyu riyà te menge etew, su ke Amey niyu riyà te langit ne impit ke langun ne ulaula rin.”

Mateo 6:14

Su embiya ebpeseharen niyu ke menge etew ne nekedsalà keniyu,” ke si Hisus, “ne egkepesehad kew rema te Eleteala ne Amey niyu ne riyà te langit.

Mateo 6:6

Ugaid ne sikiyu, ke ebpengeningeni kew ne lusud kew riyà te sungkù niyu ne lelekeb kew ne pengeningeni kew riyà te Amey niyu ne Eleteala ne kenà egkekita. Ne ke Amey niyu ne iyan dà ebpekekita keniyu ne iyan edlalew keniyu.

Mateo 7:11

Sikiyu ne menusiyà ne kenà metidtu ne metau kew ne ebehey te meupiya riyà te anak niyu, na iyan pè be ke Amey niyu ne Eleteala ne riyà te langit kenà mebehey keykew te meupiya embiya ebuyù kew riyà te kandin.

Lucas 15:18

Iyan tumù se ed-ulì e red diyà te ki Amà ne ini se egkehiyen ku, “Amà, dekelà se salà ku diyà te Eleteala wey kayi te sikuna ne amey ku.

Lucas 15:21

‘Amà,’ ke se anak din, ‘dekelà en se salà ku riyà te Eleteala wey kayi te sikuna ne amey ku ne kenà ad edait ne anak a nu pà.’

Lucas 2:14

“Edeyù kiyu te Eleteala riyà te lesang te langit. Ne kayi te ampew te dunya ne mebmelintad ke hinawa rut te menge etew ne ebpekesuhat te hinawa rin.”

Juan 20:17

Ne migkahi en si Hisus kandin te, “Kenà a nu pà geweri su warà e pà mekeulì diyà te Amey ku. Ugaid ne beyai nu ke menge suled ku ne penudtuli nu ve sikandan te, ‘Ed-ulì a riyà te Amey ku ne ke Amey nu red dema, ke Eleteala ku ne ke Eleteala nu red rema.’ ”

Ruma 1:7

Tembù be edsuratan ku sikiyu langun diyà te inged ne Ruma ne ingkelimù te Eleteala ne mibpemilì din ne kandin ne menge etew. Kiyug ku ne egkepenaub kew te Eleteala ke Amey tew wey si Hisu Kristu ke Kerenan tew, ne ebmelinew se hinawa niyu.

Ruma 8:15

Su geina te imbehey en te Eleteala keytew ke Kedesenan ne Ebpetuntul te Menusiyà ne kenà ki en egkevaluy ne uripen ne egkeandek te Eleteala iring dut te rengan, su nevaluy ki en ne menge anak din. Ne sabap dut te gehem dut te Kedesenan ne Ebpetuntul te Menusiyà ne imbehey rin keytew ne egkepakey en ne ed-amey ki te Eleteala.

Gelasiya 1:1

Siaken ini se edsurat ne si Pablo. Ne ibpeewit ku ini riyà te menge etew ne mibperetiyaya en ki Hisus ne egkevurun diyà te menge valey te Eleteala diyà te inged ne Gelasiya. Langun dey kayi ne mibperetiyaya en ki Hisus ne ebpenginginsà te sikiyu. Senge etew a ne kedserihan ni Hisu Kristu, ugaid ne ini se kinesuhù kedì ne kenà kiyug dà te etew etawa insuhù dan kedì su suhù a ni Hisu Kristu wey ke Amey ne mibanew ki Hisus dut te kinepatey rin.

Gelasiya 4:6

Ne ketà te nevaluy kew en guntaani ne anak te Eleteala, ne midsuhù din en ke Kedesenan ne Ebpetuntul te Menusiyà su ebpeubpaan din diyà te hinawa niyu. Ne egkepakey en ne ed-Amey kew te Eleteala ketà te kebpengeningeni niyu.

1 Timoteo 6:16

Sikandin dà se warà kemetayan din, ne riyà med-ubpà sikandin te ebpeneringsing ne rayag ne kenà egkeuvey te menge etew. Warà etew ne ebpekekita kandin su sikandin ne kenà egkekita. Edeyù kiyu ve kandin su sikandin ke ebayàbayà taman te taman! Egketuman ini.

1 Pedro 1:17

Ne embiya egkehiyen ta ne Eleteala ke Amey tew ketà te kebpengeningeni tew ne iyan iya se meilut se ked-edati ta kandin taman te ini ki pà te ampew te dunya. Su metidtu se kegkukum din, ne edtuntul te langun ne ed-ul-ulaan tew ne warà ibpelabi rin.

Imperayag 4:11

“Na, ke Kerenan dey ne Eleteala, mepmepurù ka, tembù be edeyuen ka wey egkeedatan, su ke gehem nu ne dekdekelà. Su sikuna se midlimbag dut te langun taman, uya, nebiviyag dan su sabap dut te kiyug nu.”

Imperayag 5:12

Ne mibmerahing ke suwara ran se egkanta te, “Ini se ed-ingaranan te Nati te Bilibili ne mid-imetayan dan, sikandin ke dait ne ebpengerapan, ne sikandin ke ed-edatan tew wey edeyuen. Su ke gehem din ne mevaher, ne warà tedtab dut te kekewesai rin, ke itungan din ne metampas, ne edatù sikandin te langun.”