Mateo 26:41 - Ke meupiya ne tudtul mekeatag ki Hisu Kristu

⁴¹ Kenà kew lipereng, ugaid ne pengeningeni kew,” ke si Hisus, “su apey kew kenà ebpekeruma kayi te ebpenggeram keniyu. Su meveher perem ke hinawa niyu te eduma te lalag ku, ugaid ne midtaman dè be te kenà eduma ke lawa niyu.”

Mateo 26:41 ပူးပေါင်းရင်းမြစ်များ

Mateo 24:42

“Uram kew ve ne ebpenehana kew en, su warà niyu metueni ke hewii ne edlived ke Kerenan niyu.

Mateo 25:13

“Iring kayi,” ke si Hisus, “ke ed-ul-ulaan te menge etew ketà te kedlived ku kayi, tembù be layun kew pempenehana su warà niyu metueni ke hewii etawa endei egketahù ke andew te kebpekeuma ku.”

Mateo 26:38

Ne migkahi sikandin kandan te, “Merasey nevenar ini se hinawa ku su iring te egkevidtew en. Kayi kew rè be ne unung kew kediey.”

Mateo 6:13

Ne ipekeriyù key nikuna dut te menge mevaher ne penggeram, ne pekelangi key dut te datù te pekaid.’

Marcos 14:38

Kenà kew edlipereng, ugaid ne pengeningeni kew,” ke si Hisus, “su apey kenà kew ebpekeruma kayi te ebpenggeram keniyu. Su mevaher perem ke hinawa niyu te edtuman te lalag ku, ugaid ne midtaman dè be te kenà eduma ke lawa niyu.”

Lucas 11:4

Ne pesehara nu ke salà dey, su ebpesaharen dey rema ke langun ne nekedsalà kenami. Ne ipekeriyù key nikuna dut te menge mevaher ne penggeram.’”

Lucas 21:36

Tembù be,” ke si Hisus, “pekevantey kew nevenar ne layun kew pengeningeni su apey kew ebehera te Eleteala te ked-etuvang niyu kayi te langun ne egketemanan. Pengeningeni kew su apey warà igkeyeyai niyu ketà te ked-itindeg niyu kayi te etuvangan ku, ke Impeanak te Menusiyà.”

Lucas 22:40

Nekeuma ran ketà ne migkehiyan din sikandan te, “Pengeningeni kew su apey kenà kew mepeneheewit dut te ebpenggeram keniyu.”

Lucas 22:46

Migkahi en si Hisus kandan te, “Meambe ke edlipereng kew? Enew kew ne pengeningeni kew te Eleteala su apey kew kenà mepeneheewit dut te ebpenggeram keniyu.”

Lucas 8:13

Ne ke kebetuwan ne neuluhan te benì ne arà ke menge etew ne nekerineg te Lalag te Eleteala ne ingkehalew ran te ebpemineg ne mibperetiyaya ran, ugaid ne mehaan dà se kineperetiyaya ran su warà mekedalid te hinawa ran. Ne wey ran penggerami ni Setanas dut te peretiyaya ran ne midlekà dan en.

Ruma 8:3

Su ke keduma tew te penduan ne kenà arà se kebpekeliyu tew te salà ne ebayàbayà te lawa tew su geina te warà tew megaga te edtuman ke penduan. Ugaid ne Eleteala red se mibpelihaun keytew dut te kinekeuripen tew te salà, su midsuhù din ke Anak din si Hisu Kristu kayi te ampew te dunya ne pinebaluy rin ne etew iring keytew, ugaid ne warà salà din. Ne kayi te kinepebpatey rin mekeatag te salà tew, ne pineliyu ki te Eleteala rut te kebayàbayà te salà te lawa tew.

1 Kurintu 10:13

Ne ke penggeraman ne ebpekeuma keykew ne warà bira rin dut te penggeram ne ebpekeuma dut te langun ne menge etew. Ugaid ne ke Eleteala se egkeserihan nevenar ne edtavang keykew, su kenà din idluhut ne ebpekeuma keykew arà se penggeram ne kenà nu egkegaga. Ugaid ne arà penggeram ne ebpekeuma keykew, ne ibehey rin keykew ke gaga te ed-engkenà su apey ka ebpekeliyu ne kenà nu ed-ul-ulaan ke meraat.

1 Kurintu 16:13

Na guntaani ve, menge suled ku, ne uram kew te keduma niyu ki Hisus. Ne itindehi niyu te mevaher ke kebperetiyaya niyu ki Hisu Kristu. Kenà niyu igkeyeyai ne ibpekita niyu ke keduma niyu te kiyug te Eleteala, ne kenà niyu igkeandek te keduma kandin misan egkerehenan kew.

1 Kurintu 9:27

Ne iring te pesusuntuk ne edlumbaren ku ke lawa ku su apey ku kenà egkerumaan ke kiyug te lawa ku. Su merakel se impemandù ku keniyu, ne kenà ku egkiyuhan te siaken ke mibpemandù keniyu ne siaken en arà se kenà egkevehayan te Eleteala te lalew rin su warà a mebperumaruma.

Gelasiya 5:24

Su ke etew ne tidtu se kebpesakup din ki Hisu Kristu, ne mid-awaan din ke langun ne meraat ne mid-ulaula rin dengan, su apey kenà en eduma rut te kiyug te lawa rin.

Ipisu 6:18

Ne ketà te inseluub niyu ke langun ne adir, ne layun kew pengeningeni riyà te Eleteala te ebuyù te tavang din te piya engkey ne egketemanan niyu. Warà be edsemaan niyu ugaid ne langun taman ne ipengeningeni niyu riyà te Eleteala, ne iyan niyu ipengeningeni ke ibpepegitung keniyu dut te Kedesenan ne Ebpetuntul te Menusiyà. Kenà kew kebungas te kebpengeningeni niyu, wey kenà niyu lipati te edragkes te pengeningeni niyu ke langun ne mibperetiyaya.

1 Pedro 4:7

Mehaan en se kegketapus kayi te dunya, tembù be sikita ne menge etew ne iyan iya se editihel ki rut te egketuenan ta ne ibpevayà ta wey ibmeupiya te hinawa ta su apey warà ebpekealang te kebpengeningeni ta te Eleteala.

1 Pedro 5:8

Ne ed-uram ki ne ebantey ki rut te langun ne ed-ul-ulaan ta su ini se kunterà tew ne si Setanas ke datù te pekaid ne egkiyug ne ebpekesuwey ki te keduma ta te Eleteala. Su edlauglaug sikandin ne ebpemengà te etew ne egkepeneheewit din te ed-ulaula te meraat iring dut te mekeandek ne erimaung ne ebpemengà te egkekaan din.

2 Pedro 2:9

Ne iring te kebpeliyu te Eleteala ki Lut se ed-ul-ulaan te Eleteala dut te menge etew ne eduma kandin su metau sikandin te ibpevayà din te kedtavang kandan ketà te keresayan dan. Ne ini se menge etew ne kenà eduma kandin, ne impenehana en ke kedusa rin kandan ketà te Hewii ne Egkukum kandan.

Imperayag 16:15

Dutun ne miburun dut te tetelu ne busew ke menge datù wey ke menge sundaru ran diyà te ed-ingaranan te Armegidun te kinehiyan te Hibruhanen. Na midlalag si Hisu Kristu se egkahi te, “Tentenuri niyu ini. Ini se kedlived ku,” ke sikandin, “ne iring te kebpekeuma te tekawen su warà etew ne netau ke endei egketahù ke andew ne ebpekeuma a. Egkehalew ke etew ne kenà edlipereng ketà te kedlived ku su ebpenareng kediey. Uya, egkehalew ke etew ne mibpenehana te belegkas din se ebpenareng kediey su apey warà kegkeyeyai rin ketà te kebpekeuma ku.”

Imperayag 3:10

Ne sabap te keduma niyu rut te insuhù ku keniyu te edtigkeran niyu ke kemerehenan, tembù be ebentayan ku sikiyu su apey kenà ebpekeuma kayi te keniyu arà se keresayan ne ebpekeuma kayi te ampew te dunya ketà te hewii ne ebpenggeraman te Eleteala ke menge etew.