Mateo 13:38 - Ke meupiya ne tudtul mekeatag ki Hisu Kristu

³⁸ ne ke pengengewiran ne ini se kelibutan. Ne ke meupiya ne benì ne arà ke menge etew ne Edetuan dut te Eleteala. Ke utan ne arà ke menge etew ne sakup ni Setanas ke egkeunutan te menge vusew,

Mateo 13:38 ပူးပေါင်းရင်းမြစ်များ

Mateo 13:19

Su ini se benì ne insawed din ne ini ke lalag mekeatag te Edetuan te Eleteala. Ne ke ralan ne neuluhan te benì ne arà ke menge etew ne nekerineg te Lalag te Eleteala, ugaid ne warà dan mesebuti ne warà meketahù te hinawa ran. Nekeuma si Setanas ke datù te pekaid ne midegdehawan din te ed-ahew ke lalag ne nerineg dan.

Mateo 24:14

Ne iyan pà ibpeuna ibpesabut kayi te tivuuk ne kelibutan ini se Meupiya ne Tudtul mekeatag te Kedatù te Eleteala dut te menge etew ne arà pà ne egkeuma ke hewii te kebpupusa kayi te kelibutan.”

Mateo 5:37

Embiya iyan netahù te hinawa niyu se ‘uya’ ne kehiya niyu te ‘uya’, ugaid embiya iyan netahù te hinawa niyu se ‘kenà’ ne kehiya niyu rà te ‘kenà’. Su embiya ed-umanan niyu pà te sapà ne riyan en arà ebpuun te datù te pekaid.”

Mateo 8:12

Ugaid ne merakel ne menge kevuwaran ni Israyil ne mibpenehenaan perem te Eleteala dut te Edetuan din ne ibpependiyà te merusirem, ne ketà ne ebpekependerawit wey ebpekengingitel.”

Lucas 24:47

Ne kayi te kebpatey rin wey kayi te kebanew te Eleteala kandin,” ke se impesurat ne Lalag te Eleteala, “ne kayi ve imbe ne ruen kebpesahad te Eleteala te keberedusaan dut te menge etew ne ebpedsendit ne ed-engkenà te meraat ne ulaula ran. Ini se ieneb niyu te ebpesabut diyà te langun ne menge inged kayi te ampew te dunya. Kayi niyu irudsù te Hirusalim.

Juan 12:24

Sebenarvenar ini se egkehiyen ku keniyu: embiya kenà ibpemula ini se senge lahas ne venì diyà te tanà ne kenà egkeumanan su senge lahas dè ma. Ugaid ne embiya ibpemula en, ne edtuvù ne ebehas te merakel. Iring ded dema ketà te siak,” ke si Hisus, “su embiya igkeleveng ad ne merakel se egkevehayan te umur ne warà edtemanan din.

Juan 8:44

Su ke datù ma te pekaid se amey niyu ne iyan niyu edumaan ke kandin ne kiyug. Terebunù sikandin te aney en, ne edsungkanger dut te benar su iyan dè ma nekepenù te bèbà din ne tarù. Embiya edlalag sikandin ne tarù su edumaan din ke kandin ne kiyug, su teruen ma sikandin ne apù sikandin te tarù.

Nenged-ulaula 13:10

ne migkehiyan din te, “Anak ka rut te datù te pekaid! Ne kunterà ka rut te langun ne meupiya! Nepenù ke itungan nu te ulaula ne menge limbung! Ne ebpehintarù ka te benar ne Lalag te Kerenan!

Ruma 10:18

Ne kalu ke ruen etew ne ebpekekahi te, “Arà se menge Hudiyanen ne warà mebperetiyaya, maa warà den pà merineg ini?” Asal, su nerineg dan ded ini rengan. Su ruen impesurat ne Lalag te Eleteala ne egkahi te, “Ini se lalag ne nekeeneb en dut te langun ne inged kayi te ampew te dunya. Uya, warà tedtab din ini se tudtul ne impemenudtul kayi te ampew te dunya.”

Ruma 16:26

Ne arà se benar ne impayag en guntaani te Eleteala keytew sabap dut te impesurat dut te menge etew ne ebpelembas te lalag din dengan. Ne guntaani ne insuhù en dut te Eleteala ne warà kemetayen din te ibpepenudtul ini kayi te langun ne menge etew kayi te ampew te dunya su apey langun ne ebpekeperetiyaya wey ebpekeperumaruma te menge suhù din.

Ruma 8:17

Ne geina te nevaluy ki en ne tuney ne anak din, ne ruen hewii ne ebpekeuma ne egketelimà tew ke langun ne keupianan ne impasad din keytew, ne kenà arà dà su langun te keupianan ne imbehey rin ki Hisus ne ebpeketelimà ki red dema. Su embiya edrumerasey ki guntaan sabap dut te keduma tew ki Hisu Kristu, ne ebpekeamung ki dut te kebpepurù kandin keuremà.

Kulasi 1:6

Ini imbe se Meupiya ne Tudtul se ibpemenudtul en id-eneb kayi te ampew te dunya, ne langun ne etew ne ebperetiyaya ne egkevelvelewanan ke ulaula ran iring ded dema keniyu. Su nevelvelewanan ke ulaula niyu te nerineg niyu wey neheram niyu ke tavang te Eleteala keniyu.

Santiago 1:18

Ne sabap dut te kandin ne kiyug ne ebeluyen ki rin ne anak din ketà te kebperetiyaya ta te benar ne impenurù din. Ini se mid-ulaula rin su apey ke sikita se belielehà dut te langun ne midlimbag din.

Santiago 2:5

Na menge suled ku ne igkelimù ku, pemineg kew kayi te egkehiyen ku. Misan ke kearen dut te menge ayuayu kayi te ampew te dunya ne reisek dà, ne sikandan dema iya ke menge etew ne nepemilì te Eleteala su apey ke sarig dan kandin ne edekdekelà, ne sikandan dema se edlusud dut te Edetuan din su ini se impasad din dut te langun ne egkelimù kandin.

1 Pedro 1:23

Su ketà te mibperetiyaya ki te Lalag te Eleteala ne nevaluy ki ne anak din su iring te insaup ki in-anak, ne kenà etew se iyan mid-anak kenitew su Eleteala ne warà kemetayen din. Ne ini se behu ne umur ta ne ibpepevayà din ini dut te lalag din ne mibperetiyaya key ne ebpekevehey te umur ne warà edtemanan din wey kenà egkesembian.

1 Juan 3:2

Menge suled ku ne igkelimù ku, menge anak kiyu en te Eleteala. Ne misan warà dey pà metueni se egkevaluy ki keuremà, ugaid ne netuenan ta te ketà te kedlived ni Hisus kayi ne egkesembian ki iring kandin su ketà ne egkekita tew en sikandin.

Imperayag 14:6

Neipus arà ne ruen pà suluhuen te Eleteala ne nekita ku ne edlayang diyà te kewkewangan ne ebpemenudtul dut te Meupiya ne Tudtul. Ibpemenudtul din ini te warà kegkepupus din diyà te langun ne menge etew dut te ampew te dunya piya engkey ne edsusunan ne menge etew, piya engkey ne bansa, piya engkey ne kinehiyan te menge etew, wey piya endei ne menge inged.