Lucas 8:13 - Ke meupiya ne tudtul mekeatag ki Hisu Kristu

¹³ Ne ke kebetuwan ne neuluhan te benì ne arà ke menge etew ne nekerineg te Lalag te Eleteala ne ingkehalew ran te ebpemineg ne mibperetiyaya ran, ugaid ne mehaan dà se kineperetiyaya ran su warà mekedalid te hinawa ran. Ne wey ran penggerami ni Setanas dut te peretiyaya ran ne midlekà dan en.

Lucas 8:13 ပူးပေါင်းရင်းမြစ်များ

Marcos 6:20

Su neandek si Hirudis ki Juan su netuenan din ne metidtu sikandin ne iyan ebpelupandù kandin ne Eleteala. Tembù be kenà din ebpeimetayan si Juan. Ne ingkesuati rin te ebpemineg ke penurù ni Juan misan ebpekevehey te kemutuwan te hinawa rin.

Lucas 8:12

Ke ralan ne neuluhan te benì ne arà ke menge etew ne nekerineg te Lalag te Eleteala, ugaid ne midegdehawen ni Setanas ke datù te pekaid te ed-ahew ke lalag su apey kenà dan mekeperetiyaya ne kenà dan egkepeliyu.

Lucas 8:14

Ne ke sepinitan ne neuluhan te benì ne arà ke menge etew ne nekerineg te Lalag te Eleteala, ugaid ne gewii ran te ebpetindalan ne merakel se egkubmus dut te lalag ne nerineg dan iring te kemutuwan dan te ked-ubpà-ubpà, ne kegkelilingey ran dut te menge kearen dan, wey ke pegungayà te kebpatà te nanam, ne warà dan en mekeuma te kebehas dan.

Juan 15:2

Embiya ruen subpang ku ne kenà ebahas, ne id-awà din. Ne langun ne menge subpang ku ne ebpemehas ne ebpenemperan din su apey merapung ke bahas din.

Juan 15:6

Su ke etew ne ebpitas kediey,” ke si Hisus, “ne igketimbag sikandin iring dut te subpang ne idtimbag su egenguwen. Embiya nehangu en, ne eburunen ne idtimbag diyà te apuy su ebinsulan.

Juan 5:35

Su si Juan ne iring te sulù ne midsilà, ne nehalew kew ne ebpemineg dut te mehaan dà ne penurù din.

1 Kurintu 13:2

Ne misan metau a ne ebpelambas te Lalag te Eleteala, ne misan ruen impayag te Eleteala kediey ne in-eles din dut te ruma ne etew, ne misan nesebutan ku ke langun ne benar ne penurù, ne misan engkey pà se kerekelà te sarig ku te Eleteala su apey ku egkekehiyan ke buvungan te ibpearat, ugaid ne embiya warà limù ku rut te menge ruma ku ne warà egkepentehan ku riyà te etuvangan te Eleteala.

1 Kurintu 15:2

Ne egenat dut te ini se Meupiya ne Tudtul ne impenurù ku keniyu ne ebpekeliyu kew rut te kedusa te Eleteala keniyu embiya ibpeiseg niyu ke kegawed niyu te mevaher wey kenà meluvey se kebperetiyaya niyu ki Hisus.

Gelasiya 3:1

Ala! Sikiyu ne menge etew riyà te Gelasiya, iring te warà itungan niyu! Meambe ke mibpemineg kew ketà te kebpenurù te menge etew ne ibpekesuwey niyu rut te benar ne impenurù ku keniyu? Su mibpetunteyan kud te kebpenurù keniyu mekeatag te kinepebpatey ni Hisus.

Gelasiya 3:4

Menu, warà atag din ke langun ne penaub te Eleteala ne imbehey keniyu gewii te midsarig kew kandin? Duen iya!

Ipisu 3:17

su apey egkeheram niyu nevenar te si Hisu Kristu ne riyan en ed-ubpà te hinawa niyu sabap dut te sarig niyu kandin. Ne ibpengeningeni ku rema ne ke limù niyu ki Hisus abpeg dut te kebpelimlimuey niyu ne midtamel en.

Kulasi 1:23

Ugaid ne iyan iya se pegelepi niyu te ebpekeiseg ini se sarig niyu ki Hisus su apey kenà egkekisù ke kebperetiyaya niyu. Kenà niyu edsuweyi ini se Meupiya ne Tudtul ne neendihan en te hinawa niyu te aney en te nerineg niyu, su warà duma ne egkepenareng tew te ebpesabut keytew te si Hisu Kristu ke ebpeliyu kenitew ke kenà ini se Meupiya ne Tudtul. Ne ini iya se Meupiya ne Tudtul ne nekeeneb en mekepenudtul kayi te dunya ne senge etew a ne si Pablo ne ebpeneheewit kayi.

Kulasi 2:7

Embiya tidtu se sarig niyu kandin ne iyan pegingawà se ebpekeiring ka te kayu ne ebpekedalid en ne meupiya se kegueyhuey rin. Tentenuri niyu ke impesabut keniyu mekeatag kandin su apey ebpekedalid ke kedsarig niyu ne ed-iseg te meupiya. Ne layun kew peselamat te Eleteala dut te langun ne ibehey rin keniyu.

1 Tiselunika 3:5

Tembù be ketà te nerineg ku mekeatag te kebpekesekiti keniyu ne warà a meketigker, ne impepengkeniyan ku si Timoteo su apey ku metueni mekeatag dut te kebperetiyaya niyu. Su neuru ad su kalu ke negaga kew en rut te penggeram ni Setanas ke datù te pekaid, ne ketà ne ke helevek dey te ebpemesabut te Lalag te Eleteala ne warà atag din.

1 Timoteo 1:19

Kemali nu te mevaher ke sarig nu ki Hisus, ne kenà ka ulaula te meraat su apey kenà ka egkeyeyaan diyà te etuvangan te Eleteala wey diyà te etuvangan te menge etew. Su ruen menge etew ne misan netuenan dan ded se meraat ke ulaula ran ne ed-iseg den pà lavew, ne ini ve se sarig dan ne warà en misan daan en ne mibperetiyaya ran.

Hibruhanen 10:39

Ugaid ne sikitew ne kenà iring ketà se ulaula tew, su kenà kiyu en ed-iring dut te menge etew ne mid-engked ke kebperetiyaya ran ne edusaan te Eleteala. Su mevaher se kegawed tew te kebperetiyaya tew ne ketà be ne ebpekeliyu kiyu.

Santiago 2:26

Na ini se kebperetiyaya tew te Eleteala ne iring te lawa te etew, su embiya warà hinawa rin ne warà atag din su minatey. Iring din ded dema se peretiyaya tew, su embiya warà ed-ul-ulaan tew ne meupiya ne edruyud te peretiyaya tew ne warà atag din ke peretiyaya tew.

2 Pedro 2:20

Ke ruen menge etew ne mid-awà dut te daan ne ulaula ran ne meraat su atag dut te mibperetiyaya ran ki Hisu Kristu ke Kerenan tew, ne ebpekeliyu ran dut te meraat ne ulaula kayi te ampew te dunya ne ederaat kandan. Ugaid ne embiya edlived dan ded maa dut te meraat ne nelayaman dan ne ingkeuripen dan, ne tuwas pà ne meraat se egketemanan dan dut te warà den pà mibperetiya.

2 Pedro 2:22

Su ke etew ne ed-ulaula te iring ketà ne ebpekeiring te beseanan ne egkahi te, “Ke asu ne egkeenen din ded se utà din.” Iring din ded dema “Ke bavuy ne misan midihù en, ne edtunà en maa.”

1 Juan 2:19

Ne ini se menge kunterà ni Hisu Kristu ne engkungkun ne menge ruma tew te egkevurunan te menge mibperetiyaya ki Hisus, ugaid ne midsuwey ran kayi te keyta su kenà dan tidtu ne ruma tew te ebperetiyaya. Su embiya sikandan se tidtu ne ruma tew te ebperetiyaya, ne warà dan medsuwey keyta. Ugaid ne midsuwey ran, ne kayi te ini se kedsuwey ran ne egkekita te kenà dan tidtu ne ruma tew te ebperetiyaya.

Hudas 1:12

Su egenat dut te meraat ne ulaula ran ne ebpekekaid dut te kevurunan niyu te edtenuran niyu ke kinepatey wey kinekevanew ni Hisus. Warà angkà te kegkaan wey ked-inum dan su iyan den dà ed-epasen ke kegkaan dan. Ne iring dan dema te dadtem ne kivel ne kunaan ke ebpekeuran, ugaid ne inlayap te keramag. Ne iring dan ded dema te kayu ne nevuwar en su misan timpu te kebpemehas ne warà bahas din su nehangu en.