Lucas 20:17 - Ke meupiya ne tudtul mekeatag ki Hisu Kristu

¹⁷ Ne mibpeut-utengan ni Hisus te mata sikandan ne migkahi en te, “Na embiya iring ketà se pegitungan niyu ne engkey ve se ibpesabut kayi te impesurat te Eleteala rengan ne egkahi te, ‘Ke pelaus ne mid-eng-engkeran dut te menge etew ne ebpemevaley su kunaan dan ke warà rantek din ne iyan en iya ini nepemilì ne segkad te valey.’”

Lucas 20:17 ပူးပေါင်းရင်းမြစ်များ

Mateo 21:42

Ne migkahi pà maa si Hisus te, “Maa, warà niyu ves mevasa ke impesurat ne Lalag te Eleteala mekeatag te ini? Su nekahi ketà te, ‘Ke pelaus ne mid-eng-engkeran dut te menge etew ne ebpemevaley su kunaan dan ke warà rantek din, ne iyan en iya ini nepemilì ne segkad te valey. Ini se mid-ulaula te Kerenan, ne mekegeyip nevenar!’

Marcos 10:23

Ne mibpenlangulangu si Hisus diyà te menge edumdumaan din se egkahi te, “Merehen nevenar te kewasa ne etew se kebpesakup din dut te Edetuan te Eleteala!”

Marcos 12:10

Ne migkahi pà maa si Hisus te, “Nevasa niyu red ura ke impesurat ne Lalag te Eleteala ne egkahi te, ‘Ke pelaus ne mid-eng-engkeran dut te menge etew ne ebpemevaley, su kunaan dan ke warà rantek din ne iyan en iya ini nepemilì ne segkad te valey.

Marcos 3:5

Ne neepes si Hisus ne insihid din ke mata rin dut te menge etew ugaid ne ingkeuru rin ded manen su netuenan din te meresen se ulu ran su warà kegkeyru ran dut te menge ruma ran. Ne migkehiyan din manen ke etew ne nekeyengkeng se velad din te, “Mama, ketenga nu ayan se velad nu.” Arà dà ne migketeng en dut te meama ke velad din, ne neulian en.

Lucas 19:41

Guna su ebpekeuvey en sikandin kayi te Hirusalim ne impelayap din ke mata rin kayi te inged ne midsinehewan din su ingkeyru rin nevenar ke menge mehinged ketà.

Lucas 22:37

Su igkahi ku keniyu ne arà se impesurat ne Lalag te Eleteala mekeatag kediey ne iyan iya se metuman en. Su ruen nekahi ketà mekeatag kediey te, ‘Inragkes sikandin te menge etew ne belisalà’ ne ke kegketuman din ini ne mehaan en egkeuma.”

Lucas 22:61

Ketà ne midlilingey ni Hisus si Pedro. Ne arà pà ne netenuran ni Pedro ke migkahi ni Hisus kandin te, “Kenà pà ed-ukarà ke manuk guntaani te ini en ne kerukileman ne ketetelu a nu en ibparew te kenà a nu ruma.”

Lucas 24:44

Ne migkahi si Hisus kandan te, “Pehaney te kayi e pà te keniyu ne ini iya ke migkahi ku keniyu: Langun te impesurat mekeatag kediey ketà te penduan ni Moises wey ke impesurat te menge mibpelambas te Lalag te Eleteala wey arà se insurat ketà te riberù ne ed-ingaranan te Salmu ne langun din ne metuman iya kayi te kedì. Na guntaani ne netuman en arà kayi te netemanan ku.”

Juan 15:25

Ugaid ne iyan ebpuun te kegkeepes dan kedì ne egketuman ke impesurat diyà te penduan dan ne egkahi te, ‘Neepes dan kedì misan warà puunan din.’ ”

Nenged-ulaula 4:11

Si Hisus ini se nekahi dut te Lalag te Eleteala ne impesurat din dengan se egkahi te, ‘Ke pelaus ne mid-engkeran dut te sikiyu ne ebpemevaley su kunaan niyu ke warà rantek din, ne iyan en iya ini nepemilì ne segkad te valey.’

Ipisu 2:20

Ne sikitew ini se mibperetiyaya en ne iring te nekeuman kiyu te pengawid te baley ne ibpeitindeg te Eleteala. Si Hisu Kristu ne iring sikandin dut te menge pelaus su sikandin se edtihel te kegawed din dut te baley, ne ke menge etew ne kedserihan te Eleteala wey ke menge ebpelambas te lalag din ne iring dan dut te impenangen ne pengawid dut te baley su sikandan ke neuna ne mibpesabut mekeatag ki Hisus. Ne langun ne mibperetiyaya en ne mibpekidseveka ki Hisus, ne iring dan dut te pengawid ne ebiravira ugaid ne ruen atag din dut te valey ne insivey ne ubpaan te Eleteala.

1 Pedro 2:6

Su ruen impesurat ne Lalag te Eleteala ne egkahi te, “Duen mibpemilì ku ne edatù ne iring te pelaus ne berepantag ne iyan segkad dut te baley ne ibpeitindeg ku riyà te inged ne Siyun. Ne piya engkey ne etew ne ebperetiyaya kandin ne kenà ebpekedsendit dut te kebperetiyaya rin kandin.”