Lucas 19:38 - Ke meupiya ne tudtul mekeatag ki Hisu Kristu

³⁸ Ke sikandan te, “Menu ma ke ebpeneuven te Eleteala ini se datù ne nekeuma su impepengkayi te Eleteala. Ne melinew en ke kebpekiduma tew te Eleteala, ne edeyuen tew ke Eleteala diyà te langit!”

Lucas 19:38 ပူးပေါင်းရင်းမြစ်များ

Mateo 2:2

Nekeuma ran ne mid-insà dan se egkahi te, “Endei ke behu pà ne in-anak ne vatà ne midtendù ne edetuen te menge etew ne Hudiyanen? Su nekita rey ke bituen ne edlepew riyà te inged dey ne rapit te Edsilaan ne tuus te in-anak en sikandin, tembù be mibpengkayi key su ebpengarap key kandin.”

Mateo 21:9

Ne ke menge etew ne mid-una ki Hisus wey engketà ded ke midtundug kandin ne migkerag te, “Edeyuen tew ke inenakan ni David! Menu ma ke ebpeneuven te Eleteala ini se midtendù din ne edatù te langun! Edeyuen tew ke Eleteala!”

Mateo 25:34

“Ne egkahi en ini se punggus ne ratù kayi te menge etew te egkekewanan din te, ‘Sikiyu ne mibehayan te keupianan dut te Eleteala ne Amey ku, ne lusud kew dut te Kedetuan te Eleteala ne impenehana keniyu igenat dut te kinelimbaha te kelibutan.

Mateo 25:40

“Ne egkahi ke punggus ne ratù te, ‘Sebenarvenar ne ini se egkehiyen ku, ketà te mid-ulaula niyu ini diyà te misan engkey dut te kevevaan en ne eduma kedì ne iring te mid-ulaula niyu ini kayi te kediey!’

Lucas 13:35

Na guntaan ne ed-ewaan en te Eleteala ke inged niyu. Ne ini se igkahi ku keniyu, igenat guntaani ne kenà a niyu en egkekita taman te egkeuma arà se hewii ne ebpekekahi kew te, ‘Edeyuen tew ini se nekeuma, ne midsuhù te Eleteala ke Kerenan tew.’”

Ruma 5:1

Na keta ne netuenan tew te riyà te etuvangan te Eleteala ne iyan din kedtengteng keytew ne metidtu kiyu sabap dut te kebperetiyaya tew ki Hisu Kristu. Ne kayi te kebpebpatey ni Hisus ne melintad en se hinawa tew su neawà ke epes te Eleteala mekeatag dut te salà tew.

Ipisu 1:12

Geina te sikami ini se Hudiyanen ne neuna ne midsarig ki Hisus su rengan pà ne dekelà se kebpenareng dey dut te kebpekeuma rut te impasad te Eleteala, ne sikami ke ralan te kegkeedati kandin su apey ke kandin ne keupiya ne egkereyù nevenar.

Ipisu 1:6

Ketà be ne edeyù kiyu te Eleteala dut te mepmeupiya ne tavang din ne imbehey rin dè duen kenitew, su impepengkayi rin te kenitew ke Anak din ne ingkelimù din nevenar ne si Hisu Kristu.

Ipisu 3:10

su apey egkekita dut te menge mepurù te suluhuen wey ruma ne mekegehem diyà te langit ke merakel ne edsusunan te ketampas din ne dekelà kayi te mepmeupiya ne ed-ul-ulaan din dut te langun tew ne mibperetiyaya.

Ipisu 3:21

Langun tew ne mibperetiyaya, ne edeyù kiyu kandin su atag dut te midseveka kiyu rin wey atag dema dut te ki Hisu Kristu. Tembù be edeyù kiyu te Eleteala taman te taman! Ne egketuman ini.

Kulasi 1:20

Ne kiyug te Eleteala rema ne langun ne riyà te langit wey kayi te ampew te dunya ne ebpekidseveka maa kandin su midsuwey ran en kandin. Ne ke kebehey rin dut te Anak din si Hisu Kristu te ebpatey riyà te pinebelavag ne kayu ke ralan ne mibeelan din te ebpeked-ulit ke menge etew riyà te kandin.

1 Timoteo 1:17

Ne edeyrey kiyu ve te Eleteala taman te taman su sikandin dà se Eleteala. Ne sikandin se ebayàbayà te langun taman te warà ketepusan din. Kenà sikandin egkekita su rengan ne daan en sikandin su warà rudsuan din ne warà kemetayen din.

1 Pedro 1:12

Ne mibpeketuenan dema te Eleteala dut te menge ebpelambas te lalag din te ini se egked-ulaula ne kenà egketuman dut te hewii ran pà, ugaid ne kayi te sikitew en guntaani ne egketuman ini. Ne benar arà. Su ini se nekahi ran neraan ne ini se Meupiya ne Tudtul ne impesabut en diyà te keniyu dut te ini se ebpemenurù keniyu guntaan. Ne ke Kedesenan ne Ebpetuntul te Menusiyà ne impepengkayi te Eleteala egenat te langit se ebpesabut kandan te ini se ibpemenurù dan. Ne misan ke menge suluhuen te Eleteala riyà te langit ne egkiyug dan ne egkesebutan ini.