Kulasi 1:7 - Ke meupiya ne tudtul mekeatag ki Hisu Kristu

⁷ Ne si Ipapras iya ini ke mibpenurù te Meupiya ne Tudtul diyà te keniyu, ne senge etew rema sikandin ne egkeserihan ne sugsuhuen ni Hisu Kristu ne igkelimù dey nevenar. Ne sikandin ini ke midserihan dey ne edsuhuen su ebpenurù keniyu.

Kulasi 1:7 ပူးပေါင်းရင်းမြစ်များ

Mateo 18:29

“Ne midlumpeng en ini se duma rin te edsugsuhuen se ebpemuyù te, ‘Kenà e pà nikuna sesawi su edlahud e pà,’ ke sikandin, ‘ne ebayaran ku sikuna te langun.’

Mateo 24:45

Ne ketà ne mibpenempità si Hisus te, “Ke edsugsuhuen ne egkedserihan wey metmetau su edtuman dut te edsuhù kandin, ne ebpekemalen en dut te ruma ne edsugsuhuen. Ne sikandin se ebehey te egkekaan dut te ruma ne edsugsuhuen ketà te kegkaan dan.

Mateo 25:21

“Migkahi ini se ebpengemuney te, ‘Ara be! Meupiya ka su mibpegelep ke ves su midtinidtuwanan nu ini se insarig ku keykew. Geina te egkeserihan ka te deisek ne kureta, ne ed-umanan ku pà ke idsarig ku kenikew te rekelà pà. Pengkayi ka su apey ka ebpekeamung te kegkehalew ku!

1 Kurintu 4:17

Tembù be midsuhù ku si Timoteo keniyan te keniyu. Iring sikandin te tidtu ne anak ku kayi ebpuun te kebperetiyaya rey ki Hisu Kristu. Egkeserihan din kayi te keduma rin te Kerenan tew, tembù be midsuhù ku sikandin su ebpetentenuran din keniyu ke engkey se ed-ul-ulaan te keduma ku ki Hisus, ne ini ke ibpenurù ku te menge mibperetiyaya te misan endei a ebpesinaru ne inged.

1 Kurintu 4:2

Tembù be egelevek ki te meupiya su ke etew ne ruen insarig kandin te egelevek, ne iyan iya se edtumanen din te meupiya ke insarig kandin dut te mepurù din.

1 Kurintu 7:25

Na menge suled, edlived ad maa te egkahi rut te in-insà niyu atag dut te menge etew ne warà pà meked-esawa. Warà suhù ni Hisu Kristu ke Kerenan tew mekeatag te ini ne ibpelambas ku, ugaid ne ini se ibpepevayà te daat te nanam din kediey ne egkeserihan a ne mehepemandù ku keniyu.

2 Kurintu 11:23

Ne egkehiyen dan ne menge sugsuhuen dan ni Hisu Kristu, ugaid ne siaken ne muna e pà ne meperumaruma ne sugsuhuen ni Hisu Kristu. Su misan iring a te egkevengùbengù kayi te kedlalag ku mekeatag te hinawa ku, ne benar su iyan pà mevaher se nehelevek ku kandan. Su kayi te kebpemesabut ku te Lalag te Eleteala ne kenà kepipira e rà mevilanggù te muna pà te kegkevilanggù dan! Ne uman e rà edruuha te muna pà kandan! Ne merakel se hewii ne edtiveltivel se umur ku te muna pà kandan!

Ipisu 5:21

Layun kew pekita te kebpeed-edatey niyu su geina te iyan niyu ibpeuna te hinawa niyu ne si Hisu Kristu.

Pilipus 2:25

Ugaid ne ini se suled tew ne si Ipapruditu ne ibpeulì ku en te mehaan. Sikandin ini ne iring en iya te tidtu ne ari ku su midtavang sikandin kedì te kebpekibunù ki Setanas dut te kebpesabut dey rut te Meupiya ne Tudtul, ne sugsuhuen niyu sikandin ne impepengkayi niyu te edtavang kediey.

Kulasi 4:12

Si Ipapras ini ne senge etew ne ruma niyu red keniyan te inged niyu ne ebpenginginsà dema mekeatag te sikiyu. Sugsuhuen dema sikandin ni Hisu Kristu ne layun ebpengeningeni te mevaher mekeatag keniyu. Ebpemuyuen din te Eleteala se ebmeilut ke sarig niyu kandin ne igkehat niyu te tivang se kedtindeg niyu embiya ruen ebpesuwey keniyu su apey warà duma ne ed-ul-ulaan niyu su ke kiyug dà te Eleteala.

Kulasi 4:7

Si Tikikus ini se edsuhuen ku keniyan te keniyu ne idtarem din keniyu ke tudtul mekeatag kedì. Suled tew sikandin ne igkelimù ku, ne ruma rey kayi te kebpesabut te lalag te Eleteala, ne benunuyan sikandin te helevek din.

Kulasi 4:9

Si Unisimus ke senge etew ne ruma niyu keniyan te inged niyu se eduma kandin. Suled tew sikandin te ebperetiyaya ne igkelimù dey, ne benunuyen sikandin dema. Sikandan ini deruwa ne edtarem keniyu ke engkey se egked-ulaula rey kayi.

1 Timoteo 4:6

Embiya ibpenurù nu ini se migkahi ku kayi, Timoteo, diyà te menge mibperetiyaya keniyan te keniyu, ne tuus arà te egkeserihan ka ne suhù ni Hisu Kristu ne ebpesabut te lalag din. Ne tuus dema te mid-iseg ke sarig nu su intahù nu te hinawa ke tidtu ne penduan wey midumaan nu te arà arè en.

2 Timoteo 2:2

Ne ke nerineg nu ne impenurù ku keykew diyà te sineruwan te merakel ne etew, ne arà be se ipenurù nu diyà te menge etew ne egkeserihan apey ran dema ikepenurù diyà te ruma pà ne etew.

Filemon 1:23

Si Ipapras ini se duma ku kayi te bilengguan se ebpenginginsà mekeatag te sikiyu keniyan, su nevilanggù sikandin dema sabap dut te kedsarig din ki Hisu Kristu.

Hibruhanen 2:17

Tembù be mibpebaluy sikandin ne etew iring dut te sikitew ne menge suled din. Mid-ulaula ini su apey rin egkeherami ke langun ne igkerasey tew apey ebmetau sikandin ne egkeyru kenitew wey apey sikandin se egkevaluy ne mepurù dut te terebpelengesa ne egkedserihan ne ebpeninindeg kenitew diyà te etuvangan te Eleteala su apey egkepesahad te Eleteala ke salà tew.

Hibruhanen 3:2

Ne ini te mid-ulaula rin dut te impehelevek kandin te Eleteala, ne mid-up-upianan din se kinetumana rin dut te langun iring ki Moises dengan te mid-up-upianan din se kinetumana rin dut te impehelevek kandin te Eleteala te kinepeneheewita rin dut te menge etew te Eleteala ne ebpekeiring dut te sakup te lusud te valey te Eleteala.