Juan 5:22 - Ke meupiya ne tudtul mekeatag ki Hisu Kristu

²² Kenà ke Amey ku ne Eleteala se egkukum te menge etew, ugaid ne imbehey rin kedì ke Anak din ke gehem te kegkukum te langun ne menge etew.

Juan 5:22 ပူးပေါင်းရင်းမြစ်များ

Mateo 11:27

Ne migkahi si Hisus diyà te menge etew te, “Ke Amey ku se mibpesarig kediey te langun taman. Warà netau kedì te Anak a te Eleteala liyu rà te Amey ku ne Eleteala. Ne warà netau te Amey ku ne Eleteala liyu rà te siaken ne Anak din wey ke menge etew ne egkiyuhan ku te ebpayag mekeatag dut te Amey ku.”

Mateo 16:27

Su sikandin ke Impeanak te Menusiyà ne mehaan ne edlived kayi te ampew te dunya ne edumaan te menge suluhuen din wey ruen raman din ne iring te raman te Amey rin ne Eleteala. Ne ketà ne eberasan din ke menge etew dut te mid-ulaula ran kayi te ampew te dunya ke meupiya etawa meraat.

Mateo 28:18

Ugaid ne mid-uvey si Hisus kandan ne migkahi te, “Langun ne gehem te kebayàbayà diyà te langit wey kayi te ampew te dunya ne imbehey en kediey.”

Juan 17:2

Su imbehey nu kediey se kebayàbayà dut te langun ne menusiyà apey ke menge etew ne imbehey nu kediey ne egkevehayan te umur ne warà edtemanan din.

Juan 3:35

Su igkelimù nevenar te Eleteala ini se anak din ne midsuhù din, ne imbehey rin kandin ke gehem te ebayàbayà te langun taman.

Juan 5:27

Ne kenà ketà dà taman, su imbehey rin lavew kedì ke gehem te kegkukum te menge etew su siaken iya ke Impeanak te Menusiyà.

Juan 9:39

Migkahi si Hisus te, “Iyan ku impengkayi te ampew te dunya su edtimbangen ku ke menge etew su apey ke menge etew ne nerusireman te kegkepisek dan ne edtelimà kedì ne ebehayan ku te kerayahan. Ugaid ne ke kenà edtelimà kedì su engkungkun ne nekita ran ke kerayahan ne ebpelekapan ku ke mata ran.”

Nenged-ulaula 10:42

“Ne insuhù din kenami,” ke si Pedro, “te ebpemesabut dut te Meupiya ne tudtul diyà te menge etew. Ne insuhù din ded kenami te ebpemenudtul te sikandin se mibehayan te Eleteala te kebayàbayà te egkukum dut te langun ne menusiyà ke biviyag wey menge minatey.

Nenged-ulaula 17:31

Su ruen en intail te Eleteala ne hewii keuremà te edtimbangen din ke langun ne menusiyà. Ne metidtu se kedtimbang kayi ne etew ne nepemilì din ne edtimbang. Ne impekilala rin dut te langun ne etew te ini se nepemilì din su mibanew rin.”

Ruma 2:16

Ne ruma pà ne kayi egketueni te ini se Meupiya ne Tudtul ne ibpesabut ku, ne ruen hewii keuremà ne iyan ibpekukum te Eleteala dut te langun ne menge etew ne si Hisu Kristu. Su ibpayag din ke langun ne mid-ulaula ran, misan ke impegelesà dan.

2 Kurintu 5:10

Su langun tew ne ebpengetuvang ki Hisu Kristu keuremà su edtimbangen din ke ulaula te uman te seveka. Ketà be ne egketelimà dut te uman seveka ke lalew rin ne edait dut te ulaula rin te kayi pà sikandin mekeubpà te ampew te dunya. Su meupiya etawa mereatey ke ulaula rin, ne arà imbe ke egketelimà din.

2 Timoteo 4:1

Na Timoteo, tehaad te si Hisu Kristu se edlived kayi su ebayàbayà te langun wey egkukum dut te menge etew ne biviyag wey ke minatey en, ne ruen idsuhù ku kenikew diyà te etuvangan te Eleteala wey si Hisu Kristu.

1 Pedro 4:5

Ugaid ne ketà te akir din ne hewii ne ebpekeetuvang dan te Eleteala su ed-insaan din sikandan te meambe ke mid-ulaula ran te meraat. Su mibpenehana en ke Eleteala su egkukum dut te menge ulaula te langun ne menge etew ne biviyag pà wey ke menge minatey.