Juan 3:3 - Ke meupiya ne tudtul mekeatag ki Hisu Kristu

³ Migkahi si Hisus te, “Sebenarvenar ini se igkahi ku keykew te warà senge etew rà ne ebpekelusud diyà te Edetuan te Eleteala embiya kenà sikandin edsaup pà ebpeanak.”

Juan 3:3 ပူးပေါင်းရင်းမြစ်များ

Mateo 16:17

“Mibpenaub ka, Simon ne anak ni Juan!” ke si Hisus. “Su benar ini se migkahi nu, ugaid ne kenà etew se mibpayag kayi te kenikew su ke Amey ku riyà te langit.

Mateo 19:24

Ne igkahi ku pà lavew keniyu te embiya id-upama ta ne iyan pà melemu ne ebpevayà diyà te vudsi te rahum ini se binatang ne kemilu tumin dè be ke kebpesakup te etew ne kewasa dut te menge etew ne Edetuan te Eleteala.”

Mateo 21:31

“Na, endei ve rapit kayi te deruwa ne teleari,” ke si Hisus, “se midtuman dut te suhù te amey ran?” “Ke kakey,” ke sikandan. “Idtarem ku keniyu,” ke si Hisus, “te ini se menge etew ne kenà meupiya kayi te etuvangan niyu iring te menge ebpevayad te buwis wey menge meritan ne warà en keeleran din ne ebpekeiring dut te kakey dut te teleari su edtuman dan guntaan te Lalag te Eleteala ne tembù be egkeuna ran keniyu ne ebpekelusud dut te menge etew ne Edetuan te Eleteala.

Mateo 5:18

Tentenuri niyu ini, su taman te duen pà langit wey tanà ne warà senge tahà ne egkeawà dut te penduan. Su egkeawà ke langit wey tanà ne warà pà meawà ke penduan.

Marcos 10:14

Guna su nekita ini ni Hisus ne ingkeepesi rin ne ke sikandin te, “Kenà niyu dewaya sikandin! Ugaid ne ipepengkayi niyu te kediey ke menge vatà, su ke menge etew ne iring te menge vatà se kedsarig dan kediey ne sikandan ke ebpekeamung te Edetuan te Eleteala.

Marcos 9:47

Ne embiya iyan ebpekepeneheewit keykew te kebpekedsalà nu ke mata nu, ne lesika nu! Su iyan pà tumù ne kebpekelusud nu rut te edetuan te Eleteala ne dibdivaluy rà ke mata nu, tumin dè be ke deruwa red ke mata nu ugaid ne igkeantug ka riyà te apuy nerakà. [

Juan 1:13

Ne iyan dalan te kinekevaluy ran ne menge anak te Eleteala ne kenà bineelan dà te menusiyà, etawa impenganak te menge etew rà ne amey, su iyan dan Amey ne Eleteala.

Juan 1:5

Ne nekeandlag ke kerayag din diyà te kerusireman, ne ke kerusireman ne warà mekeevuk dut te kerayag.

Juan 1:51

Ne migkahi en si Hisus kandan te, “Benar ini se egkehiyen ku keniyu te egkekita niyu ke lesang te langit ne egkevukaan, ne ke suluhuen te Eleteala ne egkekita niyu se mekepemenayik ne mekepemenaug se ebpengkayi te ke Impeanak te Menusiyà.”

Juan 12:40

“Mibpelekapan dan te Eleteala su apey kenà dan ebpekekita. Ne mibpekeresen ke itungan dan su apey ran kenà ebpekesabut. Ne iyan pè be se ked-uvey ran kedì te ebperetiyaya su apey ku igkepeliyu sikandan!”

Juan 3:4

Migkahi si Nikudimu te, “Menu ve ke lukes en ne etew te ebpesaup ebpeanak? Engkey, edlived pà maa sikandin dut te hetek te iney rin su apey igkesaup igkeanak sikandin?”

2 Kurintu 4:4

Ne iyan dan kenà kebpekeperetiyaya su mibpintuan ke itungan dan ni Setanas ke datù te pekaid ne ebpengerapen dut te menge etew ne kenà ebperetiyaya kayi te ampew te dunya. Tembù be kenà dan egkekita ke raman ne ed-anlag dut te Meupiya ne Tudtul, su egenat dut te raman te Meupiya ne Tudtul ne egkekita ke kebpepurù ni Hisu Kristu, ne kayi te ulaula ni Hisus ne egkekita ke ulaula te Eleteala su sikandin ke paras te Eleteala.

2 Kurintu 5:17

Su ke etew ne mibpekidseveka en ki Hisu Kristu ne midsambì en dut te daan ne ulaula te behu ne ulaula rin. Su iring maa te arà pà ne midlimbag sikandin te Eleteala su mibehayan en te behu ne itungan.

Gelasiya 6:15

Su kenà ke kebpeetus ta etawa kenà ta kebpeetus se beripantag, ugaid ne iyan beripantag ne egkehaked tew ke behu ne umur ne warà edtemanan din.

Ipisu 2:1

Pehaney te warà kew pà mibperetiyaya ki Hisu Kristu, ne iring kew te minatey su atag dut te warà kew meduma te penurù din wey meraat ke ulaula niyu.

Tito 3:5

ne ketà kiyu nikandin impeliyu dut te salà tew. Ne kenà egenat dut te meupiya ne mid-ulaula tew se kebpeliyu rin kenitew, ugaid ne egenat en te kandin ne kegkeyru. Impeliyu ki nikandin dut te salà tew impepevayà te midlùluan ki nikandin ne impesaup ki pà maa impeanak sabap dut te gehem te Kedesenan ne Ebpetuntul te Menusiyà ne mibehey kenitew te behu ne umur.

Santiago 3:17

Ugaid ne ke etew ne riyà ebpuun te Eleteala se ketampas din, ne arà se etew ne metidtu diyà te etuvangan te Eleteala. Mehalewhalew se hinawa rin dut te menge ruma rin, melimù sikandin, ne laus ne edsepekat. Igkelimù din ke menge ruma rin, ne layun meupiya se ed-ul-ulaan din diyà te kandan. Warà ebpelebien din su negidsan se ulaula rin dut te langun. Ne kenà asal-asal dà se peretiyaya rin su tidtu se hinawa rin.

1 Pedro 1:3

Ne edeyuen tew ke Eleteala ke Amey rut te Kerenan tew ne si Hisu Kristu. Dekelà se kegkeyru rin keyta su egenat te kebanew rin ki Hisu Kristu ne mibehayan kiyu rin te behu ne umur ne nevaluy ki ne menge anak din. Tembù be ruen ebpenerengen tew ne egkevanew ki red te Eleteala ne ebehayan te umur ne warà edtemanan din diyà te ubpaan din.

1 Juan 2:29

Netuenan ta te metidtu si Hisu Kristu, dutun ne netuenan ta rema te piya engkey ne etew ne metidtu se ed-ul-ulaan din ne nevaluy en sikandin ne anak te Eleteala.

1 Juan 3:9

Piya engkey ne etew ne nevaluy ne anak te Eleteala ne kenà din idlaus ini se ked-ulaula rin te meraat, su ketà te nevaluy en ne anak te Eleteala ne midubpù sikandin te Amey rin ne Eleteala. Ne geina te iyan din Amey rin ke Eleteala, ne kenà egkepakey ne idlaus dan pà ke ked-ulaula ran te meraat.

1 Juan 5:1

Piya engkey ne etew ne mibperetiyaya te si Hisus ke Impasad te Eleteala ne Ebperetuen te langun, ne anak en sikandin te Eleteala. Ne piya engkey ne etew ne egkelimù dut te Amey tew ne Eleteala ne egkelimù dema ini se menge anak din.

1 Juan 5:18

Netuenan tew te warà etew ne nevaluy ne anak din ne edlaus te ed-ul-ulaan ne meraat, su ke Anak te Eleteala se edtuganur kandin su apey kenà meewit sikandin ni Setanas.

1 Juan 5:4

su sikitew langun ne nevaluy ne anak te Eleteala ne ebpeketalew ki rut te penggeram te datù te pekaid ne ebayàbayà kayi te ampew te dunya. Su iyan tew kebpeketalew kandin ne ini se kedsarig tew ki Hisu Kristu.

Imperayag 3:14

Ketà ne migkahi en maa si Hisus te, “Surati nu ke suluhuen ne ebantey rut te menge mibperetiyaya te inged ne Lewdisiya, ne ini se menge lalag ne isurat nu. “‘Ini se menge lalag ku keniyan te keniyu. Siaken ne mid-ingaranan te “Amin” su egkedserihan a wey benar iya ke menge lalag ku. Ne langun taman ne nelimbag te Eleteala ne impepevayà din kayi te kediey.