Juan 2:18 - Ke meupiya ne tudtul mekeatag ki Hisu Kristu

¹⁸ Ne rutun ne mid-insaan si Hisus te egkeunutan te menge Hudiyanen te, “Engkey ve se mekegeyip ne ibpekita nu ne tuus te mibehayan ka te gehem te Eleteala te iring ketà ne mid-ulaula nu?”

Juan 2:18 ပူးပေါင်းရင်းမြစ်များ

Mateo 21:23

Guna su nekeuma ran en maa diyà te Hirusalim, ne midlived en maa si Hisus ketà te Nekebpuru ne Valey te Eleteala. Gewii rin te ebpenurù kayi te lusud ne ruen menge mepurù te terebpelengesa wey menge pekilukesen te Hudiyanen ne mid-uvey kandin ne mid-insaan dan si Hisus te, “Ini se mid-ulaula nu kayi te Nekebpuru ne Valey te Eleteala, engkey se kewagib nu te ed-ulaula te iring kayi? Ne engkey se mibehey keykew te kewagib?”

Marcos 8:11

Guna su nekerunggù dan, ne ruen en menge Peresiyu ne mibpengkayi te ki Hisus se ebpekidlewanà kandin su ebeelan dan te litag si Hisus. Ne mibuyuan dan sikandin te mebpekita te mekegeyip ne tuus te sikandin ke benar ne midsuhù te Eleteala.

Lucas 11:29

Gewii te egkeasek en ke merakel ne etew riyà te ki Hisus ne migkehiyan din sikandan te, “Sikiyu ne menge etew te guntaani en, mereatey nevenar se menge ulaula niyu ne warà kebperetiyaya niyu te Eleteala! Iyan niyù ebpemengaan se mekegeyip ne tuus te gehem ku. Ugaid ne warà en ma tuus ne ibpekita keniyu liyu rà ketà te netemanan ni Jonas ne mibpelambas te Lalag te Eleteala rengan.

Juan 1:19

Duen menge etew ne mibpendiyà te ki Juan su riyà sikandin te ripag te wayig ne Hurdan se ebpembunyag te menge etew. Ini se nekeuma ne menge terebpelengesa wey menge inenakan ni Levi su midsuhù dan dut te egkeunutan te menge Hudiyanen te ebpeinsaan dan si Juan te, “Entei ka?”

Juan 1:25

mid-insà dan maa te, “Embiya kenà sikuna si Hisu Kristu, ne kenà sikuna rema si Iliyas etawa ke mibpelambas te Lalag te Eleteala, ne meambe ke ebpembunyag ka te menge etew?”

Juan 6:30

Ne migkahi ran en te, “Engkey pà se ruma ne mekegeyip ne ed-ul-ulaan nu ne ibpekita nu kenami su apey key ebpekeperetiyaya?

Nenged-ulaula 4:7

Ne impeetuvang dan si Pedro wey si Juan ne mibpenginsaan dan te, “Engkey ki gehem kayi te ingkeulii rin ini se etew? Ne endei kew megkuwa te ini ne gehem?”

Nenged-ulaula 5:28

“Imbaag dey en keniyu neraan,” ke sikandin, “te kenà niyu en ipenurù ke mekeatag te ngaran kayi te etew ini ne edumaan niyu. Ugaid ne intey niyu ve ini se mid-ulaula niyu! Su ini se impenurù niyu ne nekeeneb en kayi te lusud te Hirusalim. Ne kenà ini rà se mid-ulaula niyu su iyan key egkesenditan te kineimetayi kayi te etew ne edumaan niyu.”