Ipisu 4:18 - Ke meupiya ne tudtul mekeatag ki Hisu Kristu

¹⁸ Su sikandan ne warà en iya pepaleng dan ke engkey se benar ne ralan. Ne warà en iya kandan ketà te umur ne warà edtemanan din ne riyà ebpuun te Eleteala su warà ma deisek dà ne kiyug dan te ebpemineg te kiyug te Eleteala su meresen ke ulu ran.

Ipisu 4:18 ပူးပေါင်းရင်းမြစ်များ

Mateo 13:15

Su ini se menge etew ne meresen se ulu ran, ne timbang te midsabpeng dan ke telinga ran, wey midlipereng dan ke mata ran. Su embiya kenà, ne ebpekekita ran en, ne ebpekerineg dan en, ne ebpekesabut dan en, ne ke hinawa ran ne edlived en kayi te kediey, ne ibpekepeliyu ku en sikandan dut te salà dan.’ ”

Marcos 3:5

Ne neepes si Hisus ne insihid din ke mata rin dut te menge etew ugaid ne ingkeuru rin ded manen su netuenan din te meresen se ulu ran su warà kegkeyru ran dut te menge ruma ran. Ne migkehiyan din manen ke etew ne nekeyengkeng se velad din te, “Mama, ketenga nu ayan se velad nu.” Arà dà ne migketeng en dut te meama ke velad din, ne neulian en.

Juan 12:40

“Mibpelekapan dan te Eleteala su apey kenà dan ebpekekita. Ne mibpekeresen ke itungan dan su apey ran kenà ebpekesabut. Ne iyan pè be se ked-uvey ran kedì te ebperetiyaya su apey ku igkepeliyu sikandan!”

Nenged-ulaula 17:30

Rengan te warà pà sikandin metueni te menge menusiyà, ne warà din itahù te hinawa arà se meraat ne ed-ul-ulaan. Ugaid ne guntaani ne ruen en suhù din te ebpeengkeran dut te langun ne etew te piya engkey ne meraat ne ed-ul-ulaan din.

Nenged-ulaula 3:17

“Na, menge suled,” ke si Pedro, “netuenan ku te sikiyu wey ke menge unuten niyu ne ini se mid-ulaula niyu ki Hisus ne mibeelan niyu ini su warà niyu mesebuti ke meana rut te mid-ulaula niyu kandin.

Ruma 1:28

Su warà te hinawa ran ke benar mekeatag te Eleteala, ne ketà mibelehad en te Eleteala sikandan te iyan ebayàbayà te itungan dan ne utew meraatey. Tembù be iyan dan ed-ul-ulaan ne meraat.

Ruma 11:25

Na menge suled ku ne kenà Hudiyanen, ruen ibpayag ku keniyu ne in-eles rengan. Ne iyan ku kebpayag keniyu su apey kenà niyu igkependekarak ke mid-ulaula te Eleteala keniyu iring te sikiyu se muna pà dut te menge Hudiyanen. Ini ve arà se in-eles, ne ayan se kenà kebperetiyaya te menge Hudiyanen ne edsahad dà. Su embiya ve ke langun niyu ne kenà Hudiyanen ne nepemilì te Eleteala se mibperetiyaya en kandin, ne ketà pà ne egkeawà ke keresen te ulu ran ne ebpekeulit ke itungan dan te kebperetiyaya ran maa.

Ruma 11:7

Ketà be ne nesebutan tew te kerekelan dut te kevuwaran ni Israyil ne warà dan metuen ke ralan te kebmetidtu ran diyà te etuvangan te Eleteala misan midsebenar dan perem te ebpemengà. Ugaid ne misan iring ketà, ne ruen ded nearam te Eleteala ne neketuen te ralan te kebmetidtu. Ne ke ruma kandan ne warà mibpeniniga dut te lalag te Eleteala su apey kenà dan merineg ke benar ne tudtul.

Ruma 2:19

Iyan niyu pegitungan ne sikiyu se ebpekepenurù dut te menge etew ne warà pà mekesabut te Eleteala, ne sikiyu se ebpekevehey te rayag dut te ralan te menge etew ne iring te nepisek su nerusireman pà ke itungan dan.

1 Kurintu 1:21

Su ayan ne menge ketau te itungan ne kenà ayan ke ralan ne kegkesebuti tew te Eleteala. Ugaid ne ke puunan te ralan te kegkeriweswasi tew te Eleteala ne riyà ded ebpuun te kandin ne eturan. Ini se eturan din ne ebpekepeliyu keytew atag dut te kebperetiyaya tew rut te Meupiya ne Tudtul ne impemesabut dey, misan ini se impemesabut dey ne warà kun rantek din.

1 Kurintu 2:8

Ne ayan se menge etew ne nevehayan te ketulengeran kayi te dunya ne warà dan mesebuti ke netahù te itungan te Eleteala, su embiya nesebutan dan ne warà dan peimetayi si Hisu Kristu ke mekegehem ne Kerenan tew.

2 Kurintu 3:14

Ugaid ne warà mesebuti dut te menge Hudiyanen su meresen se ulu ran. Ne misan guntaani ne embiya ebasa ran dut te penduan ni Moises ne iring te nepintuan pà ke itungan dan su kenà dan egkesebutan. Ne kenà egkevukaan arà se itungan dan taman te kenà dan ebperetiyaya ki Hisus.

2 Kurintu 4:4

Ne iyan dan kenà kebpekeperetiyaya su mibpintuan ke itungan dan ni Setanas ke datù te pekaid ne ebpengerapen dut te menge etew ne kenà ebperetiyaya kayi te ampew te dunya. Tembù be kenà dan egkekita ke raman ne ed-anlag dut te Meupiya ne Tudtul, su egenat dut te raman te Meupiya ne Tudtul ne egkekita ke kebpepurù ni Hisu Kristu, ne kayi te ulaula ni Hisus ne egkekita ke ulaula te Eleteala su sikandin ke paras te Eleteala.

Gelasiya 4:8

Rengan te warà niyu pà metueni ke tidtu ne Eleteala, ne mibpengunguripen kew rut te ebperetiyayaan niyu ne tumitimà ne kenà tidtu ne Eleteala.

Ipisu 2:1

Pehaney te warà kew pà mibperetiyaya ki Hisu Kristu, ne iring kew te minatey su atag dut te warà kew meduma te penurù din wey meraat ke ulaula niyu.

Ipisu 2:12

Pehaney iya rema ne mebmeriyù kew ki Hisu Kristu ne warà kebpenareng niyu te kebpekeuma rin, su kenà kew Hudiyanen ke inenakan ni Israyil ne mibpemilì te Eleteala ne menge etew rin. Tembù be kenà kew ebpeketelimà dut te keupianan ne impasad te Eleteala kandan te edsuhù sikandin te ebpekepeliyu kandan ne ed-ingaranan ki Hisu Kristu. Ne pehaney te miduma kew pà te meraat ne ulaula rut te menge etew kayi te ampew te dunya, ne warà egkepenareng niyu ne tavang te Eleteala su warà niyu ma metueni ke engkey se benar ne Eleteala kayi te ampew te dunya.

Kulasi 1:21

Ne sikiyu rema, pehaney ne nekepekeriyù ke itungan niyu te Eleteala su kunterà kew rin dut te ulaula niyu wey itungan niyu ne meraat.

1 Tiselunika 4:5

Su apey ke ulaula niyu ne kenà iring dut te menge etew ne kenà ebperetiyaya te Eleteala ne iyan ebayàbayà kandan ne ke kiyug te lawa ran.

Hibruhanen 5:2

Tehaad te ini se Mepurù te Terebpelengesa ne etew red dema ne melemu ne ebpekedsalà, ne netuenan din se kedtigker te kebpeneheewita rin dut te menge etew ne nekedsalà su warà dan metueni ke tidtu ne ed-ul-ulaan dan.

Hibruhanen 9:7

Ugaid ne ke ikeruwa ne ruhu ne iyan dà ebpekelusud ketà ne ke Mepurù ne Terebpelengesa, ne keseveka rin dà ed-ul-ulaa ini te uman rahun. Ne kenà egkepakey ne ebpekelusud sikandin ketà embiya kenà ed-ewit te lengesa rut te impelengesa ne ibehey riyà te Eleteala su atag dut te salà din wey ke salà dut te menge etew ke embiya ruen mid-ulaula ran ne warà dan metueni ne salà.

Santiago 4:4

Meraat kew ne menge etew su mid-awà kew te Eleteala iring dut te etew ne ed-awà te esawa rin su apey ebpengingniyug! Meambe ke warà niyu metueni te ke etew ne eduma rut te meraat ne kiyug te menge etew kayi te ampew te dunya, ne arà se etew ne egkunterà te Eleteala? Ketà be ne piya engkey ne etew ne egkiyug ne eduma rut te meraat ne ulaula te menge etew kayi te ampew te dunya, ne egkevaluy sikandin ne kunterà te Eleteala.

1 Pedro 1:14

Ne iyan iya se edtumanen tew ke kiyug te Eleteala su apey kenà ki en edlived dut te meraat ne kiyug te hinawa ta ne nelayaman tew rengan te warà ta pà metueni ke benar ne penurù te Eleteala.

1 Juan 2:11

Ugaid ne ke etew ne ebpekidkunterà te ruma rin, ne sikandin ne diyà pà lavew te merusirem. Su iring te ebpekeyangapyangap sikandin, ne kenà din egketuenan ke endei sikandin ebpesinaru su nerusireman ini se itungan din.