Ipisu 1:3 - Ke meupiya ne tudtul mekeatag ki Hisu Kristu

³ Edeyuen tew ve ke Eleteala ne Amey ni Hisu Kristu ke Kerenan tew. Su egenat dut te mibpekidseveka kiyu ki Hisu Kristu, ne rekelà se tavang te Eleteala keytew su mibehayan kiyu rin te langun ne keupianan ne riyà dà egenat te kandin ne riyà te langit.

Ipisu 1:3 ပူးပေါင်းရင်းမြစ်များ

Lucas 2:28

Ne midsepipi ni Simeon ke vatà ne mideyù en te Eleteala se egkahi te,

Juan 14:20

Ketà te hewii te egkevanew a ne ketà niyu egketueni te siak wey ke Amey ku ne egkeseveka key rà, ne egkesebutan niyu rema te ini kew te kedì ne riyan a dema te keniyu.

Juan 17:21

Su apey langun te sikandan ne meseveka, Amà, iring te ini ka te kedì wey riyan a rema te keykew. Uya, meseveka ran perem kayi te keyta su apey ebpekeperetiyaya ke menge etew kayi te ampew te dunya te midsuhù a nu.

Juan 20:17

Ne migkahi en si Hisus kandin te, “Kenà a nu pà geweri su warà e pà mekeulì diyà te Amey ku. Ugaid ne beyai nu ke menge suled ku ne penudtuli nu ve sikandan te, ‘Ed-ulì a riyà te Amey ku ne ke Amey nu red dema, ke Eleteala ku ne ke Eleteala nu red rema.’ ”

Ruma 12:5

Ne iring din ded dema te sikitew ne menge mibperetiyaya, su misan medmerakel tew ne neseveka ki rà ne lawa sabap dut te kebperetiyaya tew ki Hisu Kristu. Ne iring ded be rema ketà ke kebpemekebpikit tew te menge ruma tew, su iring ki rut te merakel ne edsusunan te lawa tew.

Ruma 15:6

Ketà ne egkeseveka kew langun te kedeyù niyu rut te Eleteala tew ne Amey ni Hisu Kristu ke Kerenan tew.

1 Kurintu 1:30

Su ke kinepekidseveka tew ki Hisu Kristu ne riyà ebpuun te kiyug te Eleteala. Ne Eleteala rema se ebehey keyta te ketau ibpepevayà ki Hisu Kristu. Ne si Hisus ke iyan kedtengteng te Eleteala keytew ne metidtu diyà te etuvangan din su sikandin se mibpeliyu keytew rut te kedusa te salà tew su apey ki mevaluy ne menge etew te Eleteala.

1 Kurintu 12:12

Embiya ebpegitungen ta mekeatag te lawa te etew, ne misan merakel se pepatà dut te lawa ugaid ne seveka rà ke lawa su langun ne pepata ne amung dut te seveka ne lawa. Ne engketà ded dema ke langun ne mibperetiyaya ki Hisus su iring ki te pepatà te lawa rin, ne misan merakel kiyu ne nevaluy ki ne seveka rà ki Hisus.

2 Kurintu 1:3

Edeyuen tew ke Eleteala, ke Amey ni Hisu Kristu ne Kerenan tew. Su sikandin ne iiruwen ne Amey tew wey sikandin dema ke edtavang keytew kayi te langun ne kemerehenan tew.

2 Kurintu 11:31

Ne ini se egkehiyen ku ne kenà tarù su netuenan dut te Eleteala ne Amey tew ne ke Amey ni Hisu Kristu ne Kerenan tew. Ne edeyuen tew sikandin taman te taman!

2 Kurintu 5:17

Su ke etew ne mibpekidseveka en ki Hisu Kristu ne midsambì en dut te daan ne ulaula te behu ne ulaula rin. Su iring maa te arà pà ne midlimbag sikandin te Eleteala su mibehayan en te behu ne itungan.

2 Kurintu 5:21

su midsuhù din si Hisu Kristu ne warà salà din te ibpevava kandin ke langun ne salà tew. Iyan kineengketaa te Eleteala ne apey ketà ebpuun te kebpekidseveka tew ki Hisus ne ruen en kebmetidtu tew riyà te etuvangan te Eleteala.

Gelasiya 3:9

Ne benar iya ne midtevangan te Eleteala si Abraham su mibperetiyaya sikandin dut te langun ne ingkahi te Eleteala kandin. Ne engketà ded dema embiya ebperetiyaya ki iring kandin, ne edtevangan ki te Eleteala.

Ipisu 1:10

Ne ini se netahù te itungan din. Embiya egkeuma arà se hewii ne netelaan din, ne edsevekaan din ke langun ne mibeelan din diyà te langit wey ke langun ne kayi te ampew te dunya, ne iyan din en ibpevayàbayà te langun ne si Hisu Kristu.

Ipisu 1:17

Ne elin dema ne ebpengeningeniyen ku te Eleteala ne ke egkereyù ne Amey tew ke midsuhù ki Hisu Kristu, ne menu ke iyan mebehey keniyu ke Kedesenan ne Ebpetuntul te Menusiyà su apey sikandin se ebehey keniyu te ketau, ne sikandin se kebpekesabut niyu mekeatag te Eleteala su apey egketuenan niyu nevenar sikandin.

Ipisu 1:20

dut te kebanew rin ki Hisu Kristu ne impepinuu rin en sikandin dut te rapit te egkekewanan din diyà te langit.

Ipisu 2:6

Ne kenà be ketà dà taman te inkeragkes kiyu rin ki Hisu Kristu te mid-uyag dut te Eleteala te minatey, su sabap dut te kebpekidseveka tew ki Hisus ne inragkes kiyu rema te ed-amung kiyu kandin te edatù diyà te langit.

Ipisu 3:10

su apey egkekita dut te menge mepurù te suluhuen wey ruma ne mekegehem diyà te langit ke merakel ne edsusunan te ketampas din ne dekelà kayi te mepmeupiya ne ed-ul-ulaan din dut te langun tew ne mibperetiyaya.

Ipisu 6:12

Su ke kunterà tew ne kenà etew, ugaid ne ke datù te pekaid wey ke sugsuhuen din ne menge busew wey ke ruma ne kenà egkekita abpeg ke ruen gehem din diyà te kewkewangan ne ed-ulaula te meraat. Su ruen kebayàbayà dan dut te menge etew kayi te ampew te dunya ne diyà pà ke itungan dan te kerusireman.

Pilipus 2:11

Ke langun ne edsamasama egkahi te si Hisu Kristu ke Kerenan dut te langun ne ketà ne egkereyù dan ke Eleteala ne Amey tew.

Hibruhanen 8:5

Ugaid ne ke helevek dan te terebpelengesa kayi te ampew te dunya ne iyan din iring ne alung dà wey limbahan dà dut te tidtu ne ed-ul-ulaan diyà te langit. Duen dema baley ne ebpengeningeniyan dan te terebpelengesa ne alung dà dema dut te benar ne diyà te langit. Su ruen migkahi te Eleteala ki Moises te kebpeitindeg din en ketà, ke sikandin te, “Dumai nu nevenar ke langun ne impekita ku keykew te riyà ki te buvungan.”

Hibruhanen 9:23

Ini se ebpengerapan te menge Hudiyanen ne mibeelan te etew kayi te dunya wey ke langun ne neketahù ketà ne ebpekeiring dà ini dut te tidtu ne ebpengerapan diyà te langit, ne iyan pegingawà ne ini ne egketilak dut te lengesa te binatang. Ugaid ne ke tidtu ne ebpengerapan diyà te langit ne iyan pegingawà ne mepmepiya pà ne ibpelengesa ketà.

1 Pedro 1:3

Ne edeyuen tew ke Eleteala ke Amey rut te Kerenan tew ne si Hisu Kristu. Dekelà se kegkeyru rin keyta su egenat te kebanew rin ki Hisu Kristu ne mibehayan kiyu rin te behu ne umur ne nevaluy ki ne menge anak din. Tembù be ruen ebpenerengen tew ne egkevanew ki red te Eleteala ne ebehayan te umur ne warà edtemanan din diyà te ubpaan din.