Imperayag 7:11 - Ke meupiya ne tudtul mekeatag ki Hisu Kristu

¹¹ Ne ruen ketà langun ne menge suluhuen te Eleteala ne midlingut med-itindeg dut te ebpinuuwan te edatù wey ke deruwa nepulù wey epat ne pekilukesen wey ke epat ne nelimbag. Ne midlumpeng dan diyà te etuvangan te ebpinuuwan te edatù ne mibpengarap dan te Eleteala

Imperayag 7:11 ပူးပေါင်းရင်းမြစ်များ

Mateo 4:10

Ne migkahi si Hisus te, “Awà ka kayi, Setanas! Duen impesurat ne Lalag te Eleteala ne egkahi te, ‘Iyan niyu rà erapa ne Kerenan ne Eleteala niyu, ne sikandin dà se edsenguren niyu.’ ”

Juan 5:23

Iyan din kinesarig kedì su apey siaken ne Anak din ne egkereyrey rut te langun ne menge etew, iring te kedeyreya ran te Amey ku. Su misan engkey en ne etew ne kenà edeyrey kedì ne kenà dema edeyrey dut te Amey ku ne Eleteala ke midsuhù kedì.

Hibruhanen 1:6

Ugaid ne ketà te kedsuhua en dut te Eleteala dut te mekegehem ne Anak din kayi te ampew te dunya ne iyan din migkahi se, “Sikiyu ne menge suluhuen ku, ne erapa niyu sikandin.”

Imperayag 11:16

Dutun ne ini se deruwa nepulù wey epat ne pekilukesen ne ebpinuu diyà te etuvangan te Eleteala ne midlumpeng dan ne mibpengarap te Eleteala.

Imperayag 15:4

Is Kerenan, sikuna ke ed-edatan wey edeyuen dut te langun ne menge etew su sikuna rà ke ed-ulaula te metidtu nevenar. Tembù be ke menge etew diyà te langun ne menge inged ne ed-uvey keykew ne ebpengarap, su impekita nu en kandan ke langun ne mid-ulaula nu ne metidtu nevenar.”

Imperayag 22:9

Ugaid ne midawey a nikandin se egkahi te, “Kenà ka ebpengarap kediey. Su siaken ne seveka ne sugsuhuen te Eleteala iring keykew wey ke menge ruma nu ne ebpelambas te Lalag te Eleteala wey iring dut te langun ne eduma rut te insurat kayi te ini se riberù. Iyan dait ne ebpengerapan nu ne ke Eleteala rà.”

Imperayag 4:10

ne edlumpeng dema ini se deruwa nepulù wey epat ne pekilukesen diyà te etuvangan dut te ebpinuu ne edatù se ebpengarap kandin arà se warà kemetayen din. Ne inrenà dan ke seluluy ran ne bulawan diyà te etuvangan te ebpinuuwan din se egkahi te,

Imperayag 4:4

Ruen deruwa nepulù wey epat ne ebpinuuwan ne nekelingut kayi te ebpinuuwan din ne ruen deruwa nepulù wey epat ne pekilukesen ne ebpinuu ketà. Mibevelegkas dan te meputì ne ruen inseluluy ran ne bulawan.

Imperayag 4:6

Ne ruen dema nekita ku diyà te etuvangan te ebpinuuwan din ne iring te meluag ne rahat ne metmetingew iring te pehelungan. Ne ruen dema epat ne nelimbag din ne ed-itindeg diyà te epat ne pediyulu dut te ebpinuuwan din. Ne neeneb ke lawa ran te mata kayi te sineruwan wey riyà te peka ran.

Imperayag 4:8

Ne uman seveka ketà te epat ne nelimbag ne ruen enem ne pakpak din. Ne neeneb te mata ini se lawa ran misan kayi te diralem te pakpak dan. Merukilem meandew ne iyan dan ebpulungan ne egkekanta. Ke se bayuk dan te, “Metmetidtu nevenar ini se ed-ul-ulaan te Eleteala. Ne sikandin ke Kerenan ne ebayàbayà te langun. Dengan dà sikandin, ne kemulu pà sikandin guntaani wey taman te taman.”