Imperayag 21:8 - Ke meupiya ne tudtul mekeatag ki Hisu Kristu

⁸ Ugaid ne ke langun ne negaga rut te penggeram te datù te pekaid ne iring dut te menge etew ne kenà edtikà ne eduma kediey, ne ke menge etew ne ed-engkenà te kebperetiyaya ran kediey, ne ke menge ebpengingniyug wey ke menge mekeyeyà se ulaula rin ne id-antug diyà te apuy nerakà. Ne iring din ded dema ke menge terevunù, ke duen menge ketuenan din, ke menge ebpengarap te ledawan ne kenà tidtu ne Eleteala wey langun ne menge teruen ne iyan dan egketemanan ne id-antug diyà te apuy nerakà ke egkeregreg ne sendawà ne ke ed-ingaranan te ikeruwa ne kemetayen.”

Imperayag 21:8 ပူးပေါင်းရင်းမြစ်များ

Mateo 10:28

Ne kenà kew meandek dut te menge etew ne iyan dà egkepatey se lawa niyu, ugaid ne kenà dan ebpekepatey te himukud niyu. Ugaid ne iyan niyu ikeandek ne Eleteala, su kenà lawa niyu rà se egkepatey rin su ruen gehem din te kebpekeantug te himukud niyu riyà te apuy nerakà.

Mateo 25:25

Neandek a kenikew ne inleveng ku rà ini se kureta nu. Ini red ke kureta ne insarig nu kediey.’

Mateo 8:26

Ne migkahi si Hisus te, “Meambe ke nengeandek-andek kew? Kurang kew te sarig kedi!” Ne mid-enew en ne pineengked din en ke keramag wey menge baleg, ne midlengen en ke ranew.

Marcos 9:44

Su ketà ne ruen menge tagkey rin ne kenà ebpatey, ne ke apuy ne kenà egkeevukan.]

Juan 8:44

Su ke datù ma te pekaid se amey niyu ne iyan niyu edumaan ke kandin ne kiyug. Terebunù sikandin te aney en, ne edsungkanger dut te benar su iyan dè ma nekepenù te bèbà din ne tarù. Embiya edlalag sikandin ne tarù su edumaan din ke kandin ne kiyug, su teruen ma sikandin ne apù sikandin te tarù.

2 Tiselunika 2:9

Ne ketà te kebpekeuma te arà se etew ne nepenù te meraat ne ruen gehem din ne egenat dut te datù te pekaid ne si Setanas, tembù be metau sikandin ne edlimbung su ebpekevaal te menge ulaula ne mekegeyip su apey egkelimbungi ke menge etew. Ne ini se melemu ne egkelimbungan ne sikandan ke kenà eduma dut te benar ne penurù mekeatag te Eleteala. Su embiya mibperetiyaya ran ne ebpekeliyu ran ugaid ne kenà dan ebperetiyaya, tembù be edusaan sikandan.

1 Timoteo 4:2

Ne ruen engkungkun ne metidtu ne menge etew ne ebpenurù dut te tarù ne lalag te menge busew. Ne ini se ebpememandù te meraat, ne warà en te itungan dan se meraat ini su nelayaman dan en wey iyan en ma ebayàbayà te itungan dan ne si Setanas ke datù te pekaid.

Tito 1:16

Menge etew ne iring ketà ne engkungkun ne eduma te Eleteala, ugaid ne ke ulaula ran ne kenà ebpekedruyud dut te lalag ne egemew kayi te bèbà dan. Liyuliyu se kerupangan dan, ne kenà dan eduma dut te idsuhù kandan, ne ketà ne warà en iya meupiya ne egked-ulaula ran.

Hibruhanen 12:24

wey riyà te ki Hisus ke midtuman dut te behu ne pasad te Eleteala, su impepevayà dut te lengesa rin ne netilak kiyu rut te salà tew. Su ke lengesa ni Hisus ne imbùbù din dut te kinepatey rin, ne muna pà se keupiya rin su tuus ini te limù te Eleteala te kebpeliyu kenitew, kenà iring dut te lengesa ni Abel rengan su ke lengesa rin ne tuus te kedusa te Eleteala rut te suled ni Abel ne mid-imatey kandin.

Hibruhanen 13:4

Ne edati niyu ke kedtiwelayà niyu ne kenà kew edlangkadlangkad dut te esawa nu. Su edusaan te Eleteala ke etew ne ed-iring ketà misan nekeesawa sikandin etawa kenà.

1 Juan 2:22

Engkey rapit se teruen embiya kenà ini se etew ne egkahi te kenà si Hisus ke Impasad te Eleteala ne Ebperetuen te langun. Su piya engkey se egkahi te iring ketà ne kunterà sikandin ni Hisu Kristu, ne kenà din edtelimaan ke Amey tew ne Eleteala wey ke Anak din.

1 Juan 3:15

Su piya engkey ne etew ne ebpekigkunterà te ruma rin, ne riyà te etuvangan te Eleteala ne iring te terevunù. Ne netuenan tew te ini se etew ne ebunù, ne warà din pà metelimà te umur ne warà edtemanan din.

1 Juan 5:10

Ketà be embiya ruen etew ne mibperetiyaya kayi te Anak te Eleteala, warà keduwaruwa te hinawa rin te benar ini se kedtitihus te Eleteala mekeatag ki Hisus su intahù te hinawa rin. Ugaid ke etew ne kenà ebperetiyaya dut te migkahi te Eleteala te si Hisus ke Anak din, ne iring te mibpehinteruan ke Eleteala kayi te ini se etew ne kenà ebperetiyaya te benar ne impesabut dut te Eleteala.

Imperayag 14:10

ne ebpeinumen din dut te mepait ne binu ne warè nekesawug ne wayig. Ne ini se mepait ne binu ne tuus te dekelà se kegkeepes te Eleteala. Uya, piya engkey ne etew ne ebpengarap dut te binatang ne sikandin ne edresayen diyà te apuy nerakà wey sendawà ne egkeregreg, ne ke Nati te Bilibili wey ke menge suluhuen te Eleteala ne edtengteng ketà te egked-ulaula.

Imperayag 19:20

Guna su mibpekibunù dan ne nesigkem arà se mekeandek ne binatang wey arà se mibpelambas te tarù ne lalag ni Setanas ke datù te pekaid, arà se mibaal te mekegeyip ibpepevayà dut te gehem te mekeandek ne binatang. (Su kayi te arà se ulaula rin ne mekegeyip, ne nelimbungan din ke langun ne menge etew ne netiyapan dut te mekeandek ne binatang wey langun ne menge etew ne mibpengarap dut te ledawan iring te paras din.) Ketà ne in-antug te biviyag pà arà se mekeandek ne binatang wey ke ebpelambas ki Setanas diyà te apuy nerakà ne egkeregreg ne sendawà.

Imperayag 2:11

“‘Itaan niyu ke telinga niyu ne pemineha niyu ini se egkehiyen dut te Kedesenan ne Ebpetuntul te Menusiyà diyà te langun niyu ne mibperetiyaya. “‘Piya engkey ne etew ne kenà egkegaga dut te penggeram te datù te pekaid ne kenà ibpependiyà te Eleteala te apuy nerakà ne arà ke ikeruwa ne kemetayen.’”

Imperayag 2:2

Netuenan ku ini se langun ne ed-ul-ulaan niyu. Netuenan ku rema ne metehel kew ne egelevek ne metigker kew te kemerehenan su atag dut te kebperetiyaya niyu kediey. Ne netuenan ku rema te kenà kew edtuhut te ruen menge ruma niyu ne meraat se ed-ul-ulaan din, su migeraman niyu ke menge etew ne egkahi te kedserihan dan ni Hisus ne rutun ne netuenan niyu ne kenà benar ne kedserihan su midtarùtarù dan.

Imperayag 21:27

Ne warà piya engkey ne meredsik ne ebpekelusud ketà te inged, ne engketà ded dema ke menge etew ne ed-ulaula te mekeyeyà wey ke menge teruen. Su iyan dà ebpekelusud ketà ne ke menge etew ne ruen ngaran din ne insurat diyà te riberù te Nati te Bilibili ne nesuratan te menge ngaran dut te menge etew ne mibehayan te umur ne warà edtemanan din.

Imperayag 22:15

Ugaid ne iyan kenà ebpekelusud ketà te inged te Eleteala ne ke langun ne mekeyeyà se ed-ul-ulaan din, ne ke duen menge ketuenan din, ke menge ebpengingniyug, ke menge terevunù, ke menge ebpengarap te ledawan dà ne kenà tidtu ne Eleteala, ke menge teruen, wey ke menge limbungen. Warà etew ne ed-ulaula te iring ketà ne ebpekelusud ketà te inged.

Imperayag 9:17

Ne kayi te imperayag kediey ne nekita ku ke menge kudà wey ke menge ed-untud ne ke paras dan ne iring kayi. Nelimbutungan arà se ebpengukudà te merihà ne iring ke rihà din te apuy, ruen meilem ne iring dut te mepurù ne batu ne ed-ingaranan te Sapira, ne ruen mekelawag dema ne iring dut te sendawà. Ne ke ulu rut te menge kudà ne iring te ulu te erimaung, ne ruen egemew dut te bèbà dan ne apuy, evel, wey sendawà ne egkeregreg.

Imperayag 9:21

Ne warà dan dema med-engked te kebpengimatey ran te menge etew, ke delemetan dan, ke kebpengingniyug dan, wey ke kebpenakew ran.