Imperayag 20:12 - Ke meupiya ne tudtul mekeatag ki Hisu Kristu

¹² Ne nekita ku ke langun ne menge minatey ne nevanew en ne mepurù mevavà ne ed-itindeg diyà te etuvangan te ebpinuuwan dut te edatù. Ruen menge riberù ne miberat wey arà se riberù ne ruen insurat ne menge ngaran dut te menge etew ne mibehayan te umur ne warà edtemanan din ne miberat dema. Ketà ne midrenaan din te kukuman ke langun ne menge etew su atag dut te insurat kayi te menge riberù mekeatag te mid-ulaula ran te biviyag dan pà su langun ketà ne insurat diyà te menge riberù.

Imperayag 20:12 ပူးပေါင်းရင်းမြစ်များ

Mateo 11:22

Tentenuri niyu ini su ketà te hewii ne kedtimbang te Eleteala te menusiyà ne iyan pà dekelà se kedusa te Eleteala keniyu rut te menge mehinged te Tiru wey Sidun.

Mateo 16:27

Su sikandin ke Impeanak te Menusiyà ne mehaan ne edlived kayi te ampew te dunya ne edumaan te menge suluhuen din wey ruen raman din ne iring te raman te Amey rin ne Eleteala. Ne ketà ne eberasan din ke menge etew dut te mid-ulaula ran kayi te ampew te dunya ke meupiya etawa meraat.

Lucas 10:20

Ugaid ne kenà iyan niyu igkehalew se ebperumaruma ke vusew keniyu,” ke se Hisus, “ugaid ne iyan niyu ikehalew ne impesurat en te Eleteala ke menge ngaran niyu riyà te langit.”

Nenged-ulaula 24:15

Su langun dey abpeg kayi se mid-isuhat kediey, ne iyan dey ebpenerengen ke migkahi te Eleteala ne kebanew rin te langun ne menge minatey meupiya se meraat se ulaula ran.

Ruma 2:6

Su ruen ibehey te Eleteala dut te langun ne menge etew te endei se edait dut te mid-ulaula ran.

1 Kurintu 4:5

Engketà be ne kenà kew edsawey te ruma niyu su warà pà mekeuma ke hewii te kegkukum. Ne ketà te hewii ne edlived si Hisu Kristu ne sikandin se ebpayag te langun ne ulaula te menge etew ne in-eles dan te merusirem. Ne ibpekita rin dema ke nekeeles ne itungan te menge etew ne warà pà metueni, ne ketà be ne egketuenan te uman senge etew ke embiya egkereyù be sikandin te Eleteala etawa kenà.

2 Kurintu 5:10

Su langun tew ne ebpengetuvang ki Hisu Kristu keuremà su edtimbangen din ke ulaula te uman te seveka. Ketà be ne egketelimà dut te uman seveka ke lalew rin ne edait dut te ulaula rin te kayi pà sikandin mekeubpà te ampew te dunya. Su meupiya etawa mereatey ke ulaula rin, ne arà imbe ke egketelimà din.

Pilipus 4:3

Ne sikuna ne megeget ne ruma ku, ne tavang ka te ebpedtuntey kandan. Su in-amin dan ke hinawa ran te edtavang kedì te ebpesabut dut te Meupiya ne Tudtul. Uya, sikandan engki Klimen wey ruma pà ne layun edtavang kedì. Nekesurat en te Eleteala ke ngaran dan ketà te riberù ne edsuratan din te menge ngaran te etew ne nevehayan en te umur ne warà edtemanan din.

Imperayag 11:18

Misan neepes nevenar ke menge kunterà nu ne nekeuma en ke hewii te kedusa nu kandan, wey ke hewii te kedtimbang nu rut te ulaula te menge etew ne minatey en. Ne nekeuma en rema ke hewii te kedlalew nu rut te langun ne menge sugsuhuen nu ne mibpelambas te lalag nu, ne langun ne menge sakup nu wey langun ne ed-adat keykew, misan mepurù mevavà. Uya nekeuma en ke hewii ne edereetan nu ke langun ne mibaal te kederaat kayi te dunya.”

Imperayag 13:8

Sikandin se ebpengerapan te langun ne menge etew te ampew te dunya ne warà ngaran din ne insurat diyà te riberù ne nesuratan te menge ngaran te langun ne menge etew ne mibehayan te umur ne warà edtemanan din. Ini se riberù ne midsuratan dut te Nati te Bilibili ne mibpeimatey, ne ini ne insurat din en neraan te warà pà limbaha ini se kelibutan.

Imperayag 17:8

Ayan se binatang ne nekita nu ne biviyag dengan ne minatey en. Ugaid ne kenà dà egkeuhet ne egkeuyag ded ne egemew rut te liyang ne warà edtemanan te keralem din. Ne ketà te kegemew rin, ne id-antug diyà te apuy nerakà su edusaan. Ne dutun ne egkeinuinu ke langun ne menge etew te ampew te dunya ne warà mekesurat ke ngaran dan diyà te riberù ne ruen en insurat ne menge ngaran te langun ne ebehayan te umur ne warà edtemanan din te warà pà limbaha ke kelibutan. Uya igkeinuinu ran su biviyag dengan ayan se binatang, ne minatey en, ugaid ne egkeuyag ded maa.

Imperayag 19:5

Dutun ne ruen midlalag diyà te uvey te ebpinuuwan te Eleteala ne edatù ne migkahi te, “Deyua niyu ke Eleteala tew, langun niyu ne eduma te Eleteala tew, ne langun niyu ne ed-adat kandin misan ke mepurù mevavà, deyua niyu sikandin!”

Imperayag 2:23

Ne ed-imetayan ku rema ke menge etew ne eduma rut te impenurù din su apey egkekita te langun ne mibperetiyaya te siaken ke netau te langun ne netahù te itungan dut te menge etew wey ke egkiyuhan dan dema. Ne edusaan ku red dema ke uman seveka kandan te piya engkey se edait dut te menge ulaula ran.

Imperayag 20:11

Neipus arà ne ruen nekita ku ne meluag ne ebpinuuwan ne meputì ne ruen ebpinuu ketà. Ne neawà ini se tanà wey langit diyà te etuvangan din ne kenè en egkekita.

Imperayag 20:13

Uya, langun ne riyà te Hades te Ivayaan ne nevanew en misan mibpatey ran kayi te tanà etawa nelened ran diyà te rahat, ne nepasad en te kukuman kandan su atag dut te mid-ulaula ran te biviyag dan pà.

Imperayag 20:15

Ne ke menge etew ne warà mekesurat ke ngaran dan diyà te riberù ne midsuratan te menge ngaran dut te langun ne mibehayan te umur ne warà edtemanan din, ne id-antug dan diyà te apuy nerakà.

Imperayag 21:27

Ne warà piya engkey ne meredsik ne ebpekelusud ketà te inged, ne engketà ded dema ke menge etew ne ed-ulaula te mekeyeyà wey ke menge teruen. Su iyan dà ebpekelusud ketà ne ke menge etew ne ruen ngaran din ne insurat diyà te riberù te Nati te Bilibili ne nesuratan te menge ngaran dut te menge etew ne mibehayan te umur ne warà edtemanan din.

Imperayag 22:12

Na ke si Hisus, “Pemineha niyu ini. Mehaan ad edlived, ne ruen lalew ne ibehey ku rut te uman seveka su sabap dut te mid-ulaula rin.

Imperayag 3:5

Ne piya engkey ne etew ne kenà egkegaga dut te penggeram te datù te pekaid ne ke ibevelegkas din ne meputì, ne kenà ku id-awà ke ngaran din dut te riberù ne midsuratan te menge ngaran te langun ne egkevehayan te umur ne warà edtemanan din. Ne egkehiyen ku riyà te etuvangan te Amey ku ne Eleteala wey ke menge suluhuen din te ini ne sakup ku.