Imperayag 17:16 - Ke meupiya ne tudtul mekeatag ki Hisu Kristu

¹⁶ Na ini se sepulù ne sidung ne nekita nu ne in-upama te sepulù ne datù, ne sikandan wey ke mekeandek ne binatang ne igkeepes dan ke tengerihen ne meritan ne ed-ehawan dan ke langun ne kearen din taman te warà nesamà misan belegkas din, ne egkeenen dan ini se sapù din wey ebinsulan dan sikandin.

Imperayag 17:16 ပူးပေါင်းရင်းမြစ်များ

Imperayag 12:3

Ne ruen seveka maa ne dekelà ne tuus ne mekegeyip ne nekita ku riyà te langit. Ruen dekdekelà ne merihà ne tendayag ne pitu se ulu rin wey sepulù se sidung din ne diyà te uman seveka ne ulu rin ne ruen seluluy rin.

Imperayag 16:12

Na ini se ikeenem ne suluhuen te Eleteala ne mid-ulaan din ke idrasey ne netahù te lediyà din diyà te dekelà ne wayig ne ed-ingaranan te Yupratis, tembù be neiratan ini se wayig su apey egkepenehana ke ibayà te menge datù ne egenat te Edsilaan.

Imperayag 17:10

Ne lelima ran se minatey en, ne kemulu pà edatù ke seveka guntaan, ne ke senge etew ne datù ne warà pà mebpinuu te kedatù. Ugaid ne embiya ebpekeuma ke hewii rin te edatù ne kenà meuhet se kedatù din.

Imperayag 18:19

Ne ebpemeluhu ran te lipupuk te kegkemutu ran ne ebpeninehew wey ebpemenderawit dan se egkahi te, “Ey mekeyruwiru ini se egketemanan din su ini se mevantug wey mevaher ne inged ne nereetan en! Su ini se kekewesai rin se igkewasa rut te langun ne kemuney te menge kapal. Ugaid ne lusud dà te senge uras ne neamin nereeti ke langun ne kekewesai rin.

Imperayag 18:8

Ne geina te arà se pegitungan din, tembù be egketekew ne ruen ebpekeuma diyà te kandin ne merakel ne keresayan. Su lusud te senge andew rà ne ruen menge daru, kemutuwan wey bitil ne ebpekeuma. Ne edtutungen dema sikandin su dekelà se gehem dut te Kerenan ne Eleteala ne edusa kandin.”

Imperayag 19:18

Burun kew ne penuktuka niyu ke sapù dut te menge datù, menge kepitan wey menge sundaru. Penuktuka niyu rema ke sapù dut te menge kudà wey ke menge ed-untud ketà. Burun kew ne penuktuka niyu ke sapù te langun ne menge etew, uripen se kenà uripen, mepurù se mevavà.”