Imperayag 14:4 - Ke meupiya ne tudtul mekeatag ki Hisu Kristu

⁴ Ne ini se menge etew ne metilak se ulaula ran su warà dan mebpengingniyug ne warà dan med-esawa. Ne edurumaruma ran dut te Nati te Bilibili te piya endei ebpesinaru. Impeliyu ran nikandin dut te salà dan diyà te ampew te dunya, ne sikandan ke neuna ne ibehey riyà te Eleteala wey riyà te Nati te Bilibili iring dut te edsewitan ne parey.

Imperayag 14:4 ပူးပေါင်းရင်းမြစ်များ

Mateo 19:12

Su merakel ke puunan te meambe ke kenà dan ed-esawa. Duen kenà ebpekeesawa su ketà te kineanak kandan ne netuenan en te kenà dan ebpekeesawa. Ne ruen duma ne kenà ebpekeesawa su migkapun dan te menge etew. Ne ruen duma pà ne kenà ed-esawa su apey ran ebpekepesabut dut te Lalag te Eleteala mekeatag te Kedatù din dut te menge etew. Piya entei se ebpeketuman kayi te penurù ku ini, ne tumana rin en iya.”

Mateo 25:1

Ne mibpenempità pà maa si Hisus te, “Ketà te edlived ku kayi te ampew te dunya, ne ke menge etew ne egkiyug ne ebpekiduma dut te menge etew ne Edetuan te Eleteala ne iring kayi. Ruen sepulù ne etew ne menge raha ne ebpengemkem te sulù dan su edtelevuken dan ini se kenakan ne ibpengesawa.

Mateo 8:19

Ketà ne ruen senge etew ne mibpenurù te penduan ni Moises ne mid-uvey kandin ne migkahi te, “Meyterù, eduma a kenikew misan ebpependei ka.”

Juan 10:27

Su ke menge etew ku ne timbang te bilibili ku,” ke si Hisus “ne ebpemineg dan kedì su egkekilala ren ma ke suwara ku. Egkekilala ku sikandan ne eduma ran kedì.

Juan 12:26

Su ke etew ne egkiyug ne eduma te penurù ku,” ke si Hisus, “ne iyan din ibpeuna te hinawa rin te ked-iniyug din te kandin ne kiyug su apey mekeruma kedì, ne piya endei a ne ketà dema ke edsugsuhuen ku. Ne ke etew ne edtuman te penurù ku, ne egkereyù te Amey ku ne Eleteala.”

Juan 13:37

“Kerenan,” ke si Simon Pedro, “meambe ke kenà a ebpekeruma keykew guntaani? Kenà ku sikew ed-ewaan su ebpekid-unung a kenikew te ebpatey.”

Juan 8:12

Ne migkahi pà maa si Hisus diyà te menge etew te, “Siaken ke sulù ne ebpekerayag te itungan te langun ne menge etew kayi te ampew te dunya. Piya engkey ne eduma kedì ne kenà en ed-ipanew diyà te kerusireman su egkereyahan en ke itungan dan kayi te rayag te sulù ne ebehey te umur ne warà edtemanan din.”

Nenged-ulaula 20:28

Bentayi niyu,” ke si Pablo, “ini se ed-ul-ulaan niyu wey tugenura niyu ke langun ne menge etew ne mibperetiyaya ki Hisus ne insarig keniyu dut te Kedesenan ne Ebpetuntul te Menusiyà. Ed-iring kew te tumetuganur te menge bilbili ne edtugenuren niyu ke menge etew ne mibperetiyaya te Eleteala su sakup dan te Eleteala egenat te kebpebpatey te Anak din su sabap dut te menge salà dan.

1 Kurintu 16:15

Na menge suled ku, netuenan niyu te iyan neuna ne mibperetiyaya riyà te lusud te inged ne Gerisya ne telteleanak ne ensi Istipanya. Ne egenat dà ketà ne kenà dan eduwaruwa se edtavang dut te menge ruma ran ne mibperetiyaya.

1 Kurintu 6:20

Ne mepmepurù se kinevayad din keytew su apey ki egkevaluy ne menge etew rin. Engketà be ne iyan niyu rà ul-ulaa te lawa niyu ke ebpekereyù te Eleteala.

1 Kurintu 7:28

Ugaid ne embiya maa ed-esawa ka, ne kenà egkevaluy ne salà nu. Iyan ku rà kebpekekahi te iyan tumù se kenà ed-esawa, su embiya mid-esawa kad ne merakel se kemeresayan niyu kayi te ampew te dunya ne arà be ne egkesuatan ku perem ne kenà kew meked-ulaula te iring ketà.

2 Kurintu 11:2

Ini se egkehiyen ku keniyu ne ebpekepengelikud a keniyu iring te kebpekepengelikud te Eleteala keniyu embiya eduma kew te ed-arap te tarù ne ebpengerapan. Embiya idsempità ta ne iring kew te senge etew ne raha ne mibpenelenggunian ku en ketà te senge etew ne kenakan ne si Hisu Kristu. Kiyug ku ne lunsey en se hinawa niyu diyà te kandin.

Ipisu 1:14

Ne ini se ked-ubpà dut te Kedesenan ne Ebpetuntul te Menusiyà kayi te kenitew, ne ini se tuus te edtumanen ded te Eleteala ke langun ne impasad din kenitew te menge anak din, tembù be netuenan tew ne ed-imesaren din ke kebpeliyu rin keyta. Ne arà be ne kenà ki ed-engked se edeyù te Eleteala dut te keupiya rin!

Ipisu 5:27

Uya, midtilak kiyu rin dut te menge salà tew te kebpenehana rin kenitew su apey meupiya se kedtengteng din kenitew ketà te hewii ne kedlived din kayi su ed-angey keyta, ne warà idsawey rin kenitew misan deisek dà.

1 Timoteo 4:3

Ini se ebpememandù te tarù, ne edawey ran te ebpees-eseweey wey ruen egkekaan ne ibpemandù dan te kenà ibpekaan. Ugaid ne ini se egkekaan ne mibpengaren te Eleteala ne egkeenen tew, labi pà ke sikitew ne mibperetiyaya kandin wey nekesabut dut te tidtu ne penurù asal id-una tew pà te ebpengeningeni ne ibpeselamat te Eleteala se egkeenen.

Hibruhanen 12:23

Ne nekeamung kiyu en dut te ruma pà ne mibperetiyaya te Eleteala ne ke menge ngaran dan dema ne ingkesurat en diyà te langit, su langun tew ne menge anak te Eleteala. Ne iring te nekeuvey kiyu en ketà te langun ne mibperetiyaya ne minatey en ne mibmetidtu en nevenar te Eleteala riyà te langit. Ne iring te nekeuvey kiyu en dema te Eleteala ne egkukum dut te langun ne menge etew

Santiago 1:18

Ne sabap dut te kandin ne kiyug ne ebeluyen ki rin ne anak din ketà te kebperetiyaya ta te benar ne impenurù din. Ini se mid-ulaula rin su apey ke sikita se belielehà dut te langun ne midlimbag din.

1 Pedro 2:9

Ugaid ne sikami ne mibperetiyaya kandin ne mibpemilì te Eleteala ne egkevaluy key ne menge anak din. Ne iring key te menge terebpelengesa ne egelevek diyà te Eleteala ne datù tew. Ne sikami rema ke ebeyveyaan dan, ne sikami red dema se nepemilì din ne kandin ne menge etew su apey rey ibpemenudtul ke meupiya ne mid-ulaula rin keyta. Su rengan ne iring key te riyà te merusirem, ne guntaani ne Eleteala se midrayag kenami.

Imperayag 17:14

Ne ebpekibunù dan dut te Nati te Bilibili, ugaid ne ini se Nati te Bilibili wey ke menge sakup din se edtavan kandan. Su sikandin dà ke Mepurù dut te langun ne kerenan wey sikandin se Mepurù dut te langun ne menge datù. Ne langun ne sakup din ne ke menge etew ne mibpemilì te Eleteala ne mibpeperetiyaya wey metinumanen kandin.”

Imperayag 21:22

Warà nekebpuru ne valey te Eleteala ne nekita ku ketà te inged su iyan iring dut te nekebpuru ne valey te Eleteala ne ke Kerenan ne Eleteala ne mekegehem wey ke Nati te Bilibili ne dutun en.

Imperayag 21:23

Warà en atag din ke rayag te andew wey bulan su egkerayahan din dut te raman te Eleteala ne iyan din sulù ne ke Nati te Bilibili.

Imperayag 3:4

“Ugaid ne ruen duma niyu diyà te inged ne Sardis ne warà mevuringi ke belegkas din. Ne iyan din meana ne warà med-amung te meraat ne ulaula. Ne sikandan se ebpekeruma kediey ne ebevelegkas te meputì, ne edait ini su mid-up-upiya ran te ed-ul-ulaan dan.

Imperayag 5:9

Ne migkanta ran te behu pà ne kanta, ke se bayuk dan te, “Sikuna rà ke ebpekegaga ne ebpekekuwa te midlulun ne kelatas ne ebpekeawà dut te menge tuus ne impereket ketà. Su mid-imetayan ka rengan ne sabap dut te kedtudà te lengesa nu ketà te kineimetayi keykew, ne mid-awun nu ke menge etew ne meraat se ed-ul-ulaan din dut te langun ne menge inged, bansa wey kinehiyan su apey sikandan ne egkevaluy ne sakup te Eleteala.