Imperayag 11:15 - Ke meupiya ne tudtul mekeatag ki Hisu Kristu

¹⁵ Dutun ne mibperiyup te budyung din ini se ikepitu ne suluhuen te Eleteala, ne ruen nerineg ku ne merakel ne menge suwara ne merahing diyà te langit ne migkahi te, “Egenat guntaani ne warà en duma pà ne edatù kayi te kelibutan ke kenà ke Kerenan ne Eleteala wey ke Impasad din ne Ebperetuen te langun ne si Kristu, ne edatù sikandin taman te taman.

Imperayag 11:15 ပူးပေါင်းရင်းမြစ်များ

Mateo 24:31

Ne ibperahing en ke budyung ne edsuhuen din ke menge suluhuen din diyà te epat ne pediyulu te dunya su apey ran egkevurun ke langun ne mibpemilì te Eleteala igenat te pehiliran taman te binunsuran.”

Mateo 6:13

Ne ipekeriyù key nikuna dut te menge mevaher ne penggeram, ne pekelangi key dut te datù te pekaid.’

Lucas 1:33

Ne ini se anak nu ne edatù te langun ne menge Hudiyanen, ke menge kevuwaran ni Jacob. Uya, ini se kegkeratù din ne warà ketepusan din.”

Lucas 15:10

Ne igkahi ku keniyu,” ke si Hisus, “ne engketà ded be imbe ke kehelawan dut te menge suluhuen te Eleteala riyà te langit ke ruen senge etew ne mekesesalà ne ebpekedsendit ne ed-engked te meraat ne ulaula rin.”

Lucas 15:6

ne ed-ulì en. Embiya ebpekeuma riyà te valey rin ne ebpenenawag sikandin dut te menge ruma rin se egkahi te, ‘Kehalew kew su netuen ku red ini se nelaag ne bilibili ku.’

Nenged-ulaula 4:26

Su mibpenehana en ke menge datù kayi te ampew te dunya, ne nevurun en ke menge egkeunutan su ed-atu dut te Eleteala ne Kerenan; uya, egkunterà dut te Impasad din ne Ebperetuen te langun.’

Hibruhanen 1:8

Ugaid ne iyan migkahi te Eleteala dut te Anak din mulà se, “Ke kedatù nu, Eleteala, ne warà edtemanan din. Ne ke kedatù nu dut te menge etew nu ne metidtu rà nevenar.

Imperayag 10:7

Su ketà te ebperiyup en ke ikepitu ne suluhuen te Eleteala te budyung din, ne edtumanen en dut te Eleteala ini se netahù te itungan din ne in-eles dengan, ini se impesabut din dut te menge sugsuhuen din ne mibpelambas te lalag din dengan.”

Imperayag 12:10

Dutun ne ruen nerineg ku ne midlalag te merahing diyà te langit ne migkahi te, “Ini en ke hewii te kebpeliyu rut te Eleteala te langun ne menge etew, ne impekita en te Eleteala ke gehem din te edatù. Ne iring ded dema ke Impasad din ne Ebperetuen te langun, ne impekita ke baher din te edatù. Su impeawà din si Setanas diyà te langit, arà se egkunterà te menge ruma ne mibperetiyaya diyà te dunya, su merukilem meandew ne edsumbung kandan diyà te etuvangan te Eleteala.

Imperayag 15:4

Is Kerenan, sikuna ke ed-edatan wey edeyuen dut te langun ne menge etew su sikuna rà ke ed-ulaula te metidtu nevenar. Tembù be ke menge etew diyà te langun ne menge inged ne ed-uvey keykew ne ebpengarap, su impekita nu en kandan ke langun ne mid-ulaula nu ne metidtu nevenar.”

Imperayag 16:17

Na ini se ikepitu ne suluhuen te Eleteala ne mid-ulaan din diyà te kewkewangan ke idrasey ne netahù te lediyà din. Ne ruen merahing ne suwara ne nerineg ku ne riyà ebpuun te ebpinuuwan dut te edatù diyà te Nekebpuru ne Valey te Eleteala diyà te langit ne migkahi te, “Nepupus en!”

Imperayag 17:14

Ne ebpekibunù dan dut te Nati te Bilibili, ugaid ne ini se Nati te Bilibili wey ke menge sakup din se edtavan kandan. Su sikandin dà ke Mepurù dut te langun ne kerenan wey sikandin se Mepurù dut te langun ne menge datù. Ne langun ne sakup din ne ke menge etew ne mibpemilì te Eleteala ne mibpeperetiyaya wey metinumanen kandin.”

Imperayag 19:1

Dutun ne ruen nerineg ku ne iring te kehurub te denda ne menge etew diyà te langit se egkahi te, “Edeyuen tew ke Eleteala, su sikandin dà se ibpurù tew, uya, sikandin dà se ruen dekelà ne gehem din, ne sikandin dà se ebpeliyu keyta rut te salà tew.

Imperayag 19:6

Ne ruen nerineg ku ne iring te kehurub te denda ne menge etew su iring ke suwara ran te kedehuus te dekelà ne wayig, ne iring dema dut te ebpemberansì. Ne migkahi ran te, “Edeyuen tew ke Eleteala, su ini se Kerenan ne Eleteala tew ne iyan edatù te langun.

Imperayag 20:4

Ketà ne nekita ku arà se menge ebpinuuwan te edatù, ne arà se ebpeminuu ketà se mibehayan te bayàbayà te kegkukum. Ne nekita ku ketà ke menge gimukud dut te menge etew ne mid-imetayan su atag dut te kebpemenudtul dan te ini se impayag ni Hisus wey ke kebpemesabut dan te Lalag te Eleteala. Mid-imetayan dan su kenà dan ebpengarap dut te mekeandek ne binatang wey ke ledawan ne iring te paras din wey warà dan mebpetiyap te tuus dut te binatang diyà te buked dan etawa belad dan. Neviviyag dan wey imperatù dan duma ni Hisu Kristu lusud te sengivu ne rahun.

Imperayag 8:12

Na mibperiyup te budyung din ini se ikeepat ne suluhuen te Eleteala ne iketelu ne vaad dut te andew ne nereetan, ne iketelu ne vaad dut te vulan ne nereetan wey iketelu ne vaad dut te menge bituen. Ketà ne iketelu ne vaad dut te kerayag dan ne neawà. Ne merusirem ke iketelu ne vaad dut te meandew su warà rayag te andew, ne iring ded dema ne merusirem ke iketelu ne vaad dut te merukilem su warà en rayag te bulan wey menge bituen.

Imperayag 9:1

Na mibperiyup te budyung din ini se ikelima ne suluhuen te Eleteala ne iyan ku nekita ne iring te bituen te langit ne neulug diyà te tanà. Ne ruen imbehey kandin ne gunsì ne ibpuwas dut te liyang ne ebpependiyà te diralem te tanà ne warà edtemanan te keralem din.

Imperayag 9:13

Dutun ne mibperiyup te budyung din ini se ikeenem ne suluhuen te Eleteala ne ruen nerineg ku ne midlalag diyà te epat ne pediyulu rut te bulawan ne ebpelengesaan diyà te etuvangan te Eleteala.