Imperayag 1:9 - Ke meupiya ne tudtul mekeatag ki Hisu Kristu

⁹ Na si Juan a ne midsurat kayi ne suled niyu te ebperetiyaya ki Hisus. Ne iring a keniyu su midtigkeran ku rema ke kemeresayan ne nekeuma kediey su atag dut te kebpesakup ku te Edetuan te Eleteala. Su neepes ke gubirnu te ini se kebpenudtul ku te Lalag te Eleteala wey ini se kebpenurù ku te imperayag ni Hisus, ne midsegseg a te ebpendiyà te punul ne ed-ingaranan te Patmus.

Imperayag 1:9 ပူးပေါင်းရင်းမြစ်များ

Mateo 20:23

“Benar iya ne edresayen kew iring dut te kemeresayan ku,” ke si Hisus, “ugaid ne warà ketengdanan ku te ebpemilì ke engkey se ebpepinuuwen ku kayi te egkekewanan ku wey kayi te egkehivang ku. Su ini ne intail dut te Amey ku ne Eleteala dut te mibpemilì din.”

Marcos 10:39

“Uya,” ke sikandan, “egketigkeran dey.” Ne migkahi si Hisus kandan te, “Benar iya ne edresayen kew iring te kemeresayan ku. Ne iring ded dut te ked-imetayi kediey se kedresaya rema keniyu.

Juan 16:33

“Langun kayi ne migkahi ku keniyu,” ke si Hisus, “su apey ebmelintad ke hinawa niyu te kebpekidseveka niyu kediey. Su kayi te ampew te dunya ne edresayen kew te menge etew ne ed-engkenà kediey. Ugaid ne misan iring ketà ne kenà niyu ebpilaya ke hinawa niyu, su netalew ku en ke datù te pekaid ne migkamal kayi te ampew te dunya!”

Nenged-ulaula 1:15

Senge hewii ketà ne ruen kevurunan te menge mibperetiyaya ne menge mehatus dan wey deruwa nepulù se miburun, ne mid-itindeg si Pedro se edlalag.

Nenged-ulaula 14:22

Ketà ne menge inged ne impenurù dan se ibpeiseg ke keduma dut te langun ne menge mibperetiyaya ki Hisus ne mibag-et dan ke hinawa dut te menge etew te kenà medlekà dut te peretiyaya ran. Su impesabut dan te, “Ebpevayà ki pà iyan te menge kemerehenan te kenà ki pà ebpekelusud dut te Edetuan te Eleteala,” ke sikandan.

Ruma 8:17

Ne geina te nevaluy ki en ne tuney ne anak din, ne ruen hewii ne ebpekeuma ne egketelimà tew ke langun ne keupianan ne impasad din keytew, ne kenà arà dà su langun te keupianan ne imbehey rin ki Hisus ne ebpeketelimà ki red dema. Su embiya edrumerasey ki guntaan sabap dut te keduma tew ki Hisu Kristu, ne ebpekeamung ki dut te kebpepurù kandin keuremà.

Ruma 8:25

Ugaid ne geina te warà pà med-ulaula arà se egkepenareng tew, ne kenà ki egkeperà gewii te edtehad ki pà.

2 Kurintu 1:7

Engketà be arà ne kenè en egkeuru se hinawa rey mekeatag keniyu, su netuenan dey se embiya ebpevayà kew te kemerehenan iring dut te impevayà dey, ne edtevangan kew red dema te Eleteala iring dut te kinetevangi rin kenami.

Pilipus 1:7

Dekelà kew te hinawa ku! Ne dait ini se egkepegpegitung ku mekeatag keniyu. Su aney en taman guntaani ne mid-unungan a nikiyu te edtindeg kayi te Meupiya ne Tudtul mekeatag ki Hisu Kristu piya engkey ne kerehenan, ne misan ini ad te bilengguan ne edtavang kew red lavew. Tuus be te nekeamung kew te kebaher te tavang te Eleteala kediey.

Pilipus 4:14

Ugaid ne misan iring ketà ne meupiya nevenar ini se impeewit niyu su edtavang kew te keresayan ku.

2 Tiselunika 3:5

Iyan dey ebuyuen te Kerenan tew ne edtavang keniyu su apey ke nesebutan niyu mekeatag dut te kerekelà te limù te Eleteala keniyu wey ke kedtigker niyu rut te keresayan ne ebpekeiseg.

2 Timoteo 1:8

Ketà be ne kenà nu ve ikeyeyai te ebpemenudtul mekeatag ki Hisus ke Kerenan tew, ne kenà nu rema ikeyeyai su ini a te bilengguan su iyan ku kinekevilanggù ne keduma ku ki Hisus. Ugaid ne telimaa nu se piya engkey ne rasey ne ebpekeuma keyta atag dut te kebpesabut ta kayi te Meupiya ne Tudtul su iyan ebaher keyta ne Eleteala.

Hibruhanen 10:36

Iyan ungayà se edtigker kew te kemerehenan apey niyu egketuman ke kiyug te Eleteala ne ebpeketelimà kew rut te keupiya ne impasad te Eleteala.

1 Pedro 5:1

Ne ruen egkehiyen ku riyà te keniyu ne menge pekilukesen te menge mibperetiyaya su siaken ne pekilukesen a rema iring keniyu. Ne nekita kayi te mata ku ke kegkerasey ni Hisus, ne netuenan ku ne ketà te akir din ne hewii ne egkekita ke kebmepurù ni Hisus ne ebpekeamung ki ketà te kebmepurù din. Tembù be iyan niyu tumana ini se ebuyuen ku

Imperayag 1:1

Ini se insurat ne imperayag ni Hisu Kristu. Imbehey ini kandin dut te Eleteala su apey igkepesabut diyà te menge mibperetiyaya te Eleteala ke engkey se mehaan ne egkenged-ulaula. Impayag ini ni Hisu Kristu diyà te ki Juan ne sugsuhuen din ibpepevayà te suluhuen din ne midsuhù din diyà te kandin.

Imperayag 1:2

Ne insurat ni Juan ke langun ne impekita kandin. Ne ini se insurat ni Juan ne ke Lalag te Eleteala wey ke benar ne impekita ni Hisu Kristu.

Imperayag 1:4

Siak si Juan ke midsurat kayi. Ini se insurat ku ne riyà te langun niyu ne menge mibperetiyaya ne diyà te pitu ne menge inged te pruvinsiya ne Asiya. Egkiyuhan ku ne ebpeneuven kew rut te Eleteala wey ke Kedesenan ne Ebpetuntul te Menusiyà wey si Hisu Kristu. Egkiyuhan ku rema ne ebmelintad ke hinawa niyu mekeatag kandan. Ini se Eleteala ne daan en sikandin te warà pà limbaha ke misan engkey en, ne kemulu pà sikandin guntaan wey sikandin ded lavew taman te taman. Ne ke Kedesenan ne Ebpetuntul te Menusiyà ne pitu se ralan te kebpekita rin dut te gehem din ne diyà ed-ubpà te etuvangan te ebpinuuwan te kedatù te Eleteala. Ne si Hisu Kristu ke egkeserihan ne titihus mekeatag te Eleteala. Sikandin ke neuna ne mibanew te Eleteala dut te kebpatey rin, ne sikandin rema ke benar ne datù ne ebayàbayà dut te langun ne ruen kebayàbayà din kayi te ampew te dunya. Dekelà ke limù din keytew, ne ketà te imbùbù din ke lengesa rin kenitew dut te kinepatey rin ne sikandin ke mibpeliyu keytew rut te kedusa te Eleteala te salà tew.

Imperayag 1:6

Ne nekelusud ki rut te edetuan din wey mibaluy ki nikandin ne iring te menge terebpelengesa su apey egelevek ki rut te egkiyuhan te Eleteala ne amey rin. Tembù be iyan meupiya ne edeyuen sikandin ne edatù sikandin te warà kegkepupus din. Egketuman ini.

Imperayag 11:7

Ne ketà te kebpekeipus dut te deruwa ne ebpemesabut te Lalag te Eleteala, ne ruen ebpekibunù kandan ne mekeandek ne binatang ne egemew ketà te liyang ne ebpependiyà te diralem te tanà ne warà edtemanan te keralem din. Ne ini se mekeandek ne binatang se edtavan ne ed-imatey kandan.

Imperayag 12:11

Ugaid ne ke menge mibperetiyaya te Eleteala ne midtevanan dan arà se edsumbung kandan impepevayà dut te lengesa ni Hisus ke ed-ingaranan te Nati te Bilibili ne mid-imetayan diyà te pinebelavag ne kayu. Uya, midtevanan dan si Setanas impepevayà dut te benar ne penurù ne ibpemenudtul dan. Ne warà dan menuhuni ke umur dan misan ibpatey ran su atag dut te kebperetiyaya ran.

Imperayag 12:17

Tembù be dekdekelà se kegkeepes dut te tendayag kayi te meritan, ne mibayaan din ke ruma ne inenakan dut te meritan su ebpekibunù kandan. Ne ini se menge inenakan dut te meritan ne ini ke menge etew ne eduma dut te insuhù te Eleteala wey meilut se kegawed dan dut te benar ne impenurù ni Hisus.

Imperayag 13:10

Ke etew ne ibpepevayà te Eleteala te egkesigkem, ne edsigkemen iya. Ne ke etew ne ibpepevayà te ebpatey te sundang, ne sundang iya se ibpatey rin. Tembù be langun tew ne sakup te Eleteala ne iyan iya se edtigker kiyu te keresayan wey idsarig ke egked-ulaula tew te Eleteala.

Imperayag 14:12

Tembù be sikiyu ne menge sakup te Eleteala ne eduma en te suhù din wey egeweran te mevaher ke kebperetiyaya niyu ki Hisus, ne iyan iya se tigkeri niyu se keresayan.

Imperayag 19:10

Ne midlumpeng ad diyà te sineruwan din su ebpengarap a kandin. Ugaid ne midawey a nikandin se egkahi te, “Kenà ka ebpengarap kediey. Iyan dait ne ebpengerapan nu ne ke Eleteala rà su siaken ne seveka a ne sugsuhuen te Eleteala iring kenikew wey ke menge ruma nu ne eduma rut te benar ne tuluuwen ne impesabut ni Hisus.” Su ini se benar ne tuluuwen ne impesabut din ne ini rema ke impenurù dut te ebpelambas te Lalag te Eleteala.

Imperayag 20:4

Ketà ne nekita ku arà se menge ebpinuuwan te edatù, ne arà se ebpeminuu ketà se mibehayan te bayàbayà te kegkukum. Ne nekita ku ketà ke menge gimukud dut te menge etew ne mid-imetayan su atag dut te kebpemenudtul dan te ini se impayag ni Hisus wey ke kebpemesabut dan te Lalag te Eleteala. Mid-imetayan dan su kenà dan ebpengarap dut te mekeandek ne binatang wey ke ledawan ne iring te paras din wey warà dan mebpetiyap te tuus dut te binatang diyà te buked dan etawa belad dan. Neviviyag dan wey imperatù dan duma ni Hisu Kristu lusud te sengivu ne rahun.

Imperayag 3:10

Ne sabap te keduma niyu rut te insuhù ku keniyu te edtigkeran niyu ke kemerehenan, tembù be ebentayan ku sikiyu su apey kenà ebpekeuma kayi te keniyu arà se keresayan ne ebpekeuma kayi te ampew te dunya ketà te hewii ne ebpenggeraman te Eleteala ke menge etew.

Imperayag 6:9

Ketà ne in-awà dut te Nati te Bilibili ke ikelima ne tuus ne impereket dut te midlulun ne kelatas, ne iyan ku nekita ke ebpelengesaan te menge binatang ne ibehey ran diyà te Eleteala ne riyà te siyung ne ruen menge gimukud dut te langun ne menge etew ne mid-imetayan su sabap dut te kebpesabut dan te Lalag te Eleteala wey atag dut te kebpemenudtul dan te lalag din.

Imperayag 7:14

Ne midtavak a te, “Kenà ku egketuenan, Datù. Ugaid ne kehiya nu su sikuna se netau.” Ne migkahi rin te, “Ini se menge etew ne nekepevayà dan te mepasang ne kemeresayan diyà te ampew te dunya. Ne mibpemìpian dan en ini se menge kumbalà dan dut te lengesa te Nati te Bilibili su apey ran ebmepmeputì, ne iyan din meana ne neawà en ke menge salà dan.