Hibruhanen 6:2 - Ke meupiya ne tudtul mekeatag ki Hisu Kristu

² wey ke penurù mekeatag te kebpebunyag wey ke kedampen te purù te etew te ibpengeningeni ran sikandin, su ini ne penurù ne netuenan ta en. Ne netuenan ta en dema ke penurù mekeatag te kebanew te Eleteala keyta wey ke penurù mekeatag te kegkukum din kenitew ne ke ebpetemanan din kenitew ne kenà egkesembian taman te taman.

Hibruhanen 6:2 ပူးပေါင်းရင်းမြစ်များ

Mateo 28:19

Na, pendiyà kew te langun ne menge etew kayi te ampew te dunya ne penurua niyu sikandan ke memenu se kebpesakup dan kediey. Ne pembunyahi niyu ke menge etew ne ebpesakup kediey te tuus te keduma ran te Eleteala, wey siaken ke Anak din, wey ke Kedesenan ne Ebpetuntul te Menusiyà.

Mateo 3:14

Ugaid ne kenà perem ebunyag si Juan kandin, ke sikandin te, “Meambe ke ebpengkayi ka te kedì se ebpebunyag? Su iyan edait ne ebpebunyag a kenikew.”

Marcos 16:16

Ne piya engkey ne etew ne ebperetiyaya wey ebpebunyag dan ne ebpeketelimà te umur ne kenà edtaman, ugaid ne ke etew ne kenà ebperetiyaya ne ebetetayan te salà te kepatey.

Marcos 7:4

Misan ed-ulì dan ke riyà ebpuun te pedian ne kenà dan ebpekekaan embiya kenà dan ed-unaan te edtuman ke edtenuran ne betasan te kedlùlù. Ne ruen pà ruma ne betasan ne edtumanen dan iring te edtenuran ne kedlùlù te menge sangkap te egkaan, menge kelalew, menge halang ne kendidu, wey menge ed-irehaan.

Marcos 7:8

“Ne iring din ded dema te sikiyu,” ke si Hisus, “su mid-lekaan niyu ke penduan te Eleteala, ne iyan niyu egeweran ke betasan ne bineelan dà te menusiyà.”

Lucas 11:38

Nekita dut te menge Peresiyu te warà midlùlù si Hisus te warà pà sikandin mekekaan ne neinuinu ran nevenar.

Lucas 12:50

Dekelà pà se kemeresayan ne ibpevayà ku ne warà pà mekeuma kediey. Iring a te ebpekeutuk te langit taman kenà ku mepasad ini.

Lucas 14:14

Ne embiya ini se ed-ul-ulaan nu ne dekelà se kegkehalew nu. Su kenà ke ma nikandan egkevayaran, ugaid ne Eleteala se ebales keykew ketà te akir din ne hewii te kegkevanew te menge etew ne metidtu se ulaula.”

Lucas 3:16

Tembù migkahi si Juan diyà te kandan te, “Duen ebpeketundug kediey ne mepurù pà kedì su misan ke telumpà din ne kenà a edait ne ed-ekar. Wayig se ibunyag ku keniyu, ne sikandin ke migkahi ku ne ebpeketundug kedì ne ebunyag dema keniyu. Ke menge ebperetiyaya ne ebunyahan din te Kedesenan ne Ebpetuntul te Menusiyà, ne ke kenà ebperetiyaya ne iyan din ibunyag ne apuy.

Juan 1:33

“Ne warà ku pà lavew metueni te sikandin en bes iya ke midsuhù te Eleteala,” ke si Juan, “ugaid ne ke Eleteala ne midsuhù kedì te ebunyag te wayig ne ingkahi rin kedì te, ‘Embiya egkekita nu en arà se Kedesenan ne Ebpetuntul te Menusiyà ne ebpehunrerenà diyà te etew ne kenà din ed-ewaan, ne egketuenan nu be imbe te sikandin ke ebpembunyag ibpepevayà dut te kedlumun te Kedesenan ne Ebpetuntul te Menusiyà diyà te menge etew ne mibperetiyaya.’

Juan 5:29

ne ketà ne egemew ran dut te leveng dan. Ne langun te metidtu ne egkevanew ran su riyà ebpekeubpà te Eleteala su neketelimà dan te umur ne warà edtamanan din, ugaid ne langun be rut te nekevaal te meraat ne ulaula ne egkevanew red su edusaan.”

Nenged-ulaula 10:47

“Ini se menge etew ne kenà Hudiyanen, ne neketelimà dan dema te kedlumun dut te Kedesenan ne Ebpetuntul te Menusiyà iring dut te sikami ne menge Hudiyanen,” ke si Pedro. “Geina te iring kayi, ne warè ebpekevangen te kebunyahi kandan.”

Nenged-ulaula 13:3

Ketà ne midlimpas dan maa te egkaan su mibpengeningeni ran, ne indampen dan ke velad dan ki Bernabe wey si Saulo ne arà pà ne impeipanew ran.

Nenged-ulaula 16:15

Ketà ne mibunyahan sikandin abpeg ke menge emurà din dutun te valey rin. Ne migkehiyan key rin te, “Embiya birang te itungan niyu ne benar se peretiyaya ku ki Hisus ne Kerenan ne diyà kew ubpà te baley ku.” Ne warà key rin ewai ne ketà ne mibpendiyà key en.

Nenged-ulaula 16:33

Ne rutun te metaneb pà ne kerukileman ne migkuwa rut te ebantey si Pablo ki Silas ne mid-enuan din ke menge palì dan. Ne ketà ne mibunyahan en ini se ebantey abpeg ke sikandan ne telteleanak.

Nenged-ulaula 17:18

Ne ketà ne ruen menge meyterù ne ed-ingaranan te Epikuranu wey ruma ne ed-ingaranan te Estuwiku ne mibpekidlalag kandin. Duen duma ne mid-insà te, “Engkey vuwa se egkehiyen kayi te ini se ed-iring uvag te ruen nesebutan din?” Ne duen duma ne migkahi te, “Iyan din beneng edlelahen ne mekeatag te menge diwata diyà te meriyù ne inged.” Tembù migkahi ran ini su impesabut ni Pablo ke Meupiya ne Tudtul mekeatag ki Hisus wey ke kegkevanew rin.

Nenged-ulaula 2:38

Ne migkahi si Pedro te, “Engkeri niyu ke meraat ne ed-ul-ulaan niyu ne pebunyag kew, uman seveka keniyu, su tuus te mibpesakup kew en ki Hisu Kristu. Ne ebpeseharen te Eleteala ini se meraat ne ulaula niyu ne ke Kedesenan ne Ebpetuntul te Menusiyà ne ibpeubpà din kayi te keniyu.

Nenged-ulaula 2:41

Ne merakel se mibperetiyaya dut te lalag ne impesabut ni Pedro ne mibpebunyag dan tuus te ebperetiyaya ran en ki Hisus. Ne arà ne hewii ne menge tetelu ne ngivu se menge mibperetiyaya ne nekeuman dut te menge etew ne mibperetiyaya ki Hisus.

Nenged-ulaula 23:6

Ne guna su nekita ni Pablo se ruen menge Sedusiyu wey menge Paresiyu ne nevurun ketà te Perekukum ne mibmerahing se suwara rin ne egkahi te, “Menge suled ku ne Hudiyanen, Paresiyu a wey ke menge lukes ku. Ugaid ne impeetuvang a niyu su atag dut te peretiyaya ku ne ebenawen te Eleteala ke menge minatey keuremà!”

Nenged-ulaula 24:15

Su langun dey abpeg kayi se mid-isuhat kediey, ne iyan dey ebpenerengen ke migkahi te Eleteala ne kebanew rin te langun ne menge minatey meupiya se meraat se ulaula ran.

Nenged-ulaula 24:21

Su warà netuenan dan liyu te migkahi ku gewii te mibpenginsaan a dut te menge Perekukum su ke siaken te, ‘Impeetuvang a niyu su atag dut te peretiyaya ku ne ebenawen te Eleteala ke menge minatey keuremà.’ ”

Nenged-ulaula 24:25

Ne ketà te kebpesabut ni Pablo mekeatag te metidtu ne ulaula, wey kedtigker te hinawa rin, wey ke hewii ne ebpekeuma ne kedtimbanga te Eleteala dut te menge etew, ne neandek si Felix ne migkahi te, “Kayi pà taman su ibpetawag ku rà sikew ke embiya ruen en lakey ku.”

Nenged-ulaula 26:8

Ne sikiyu ne menge ruma ku ne Hudiyanen, meambe ke kenà kew ebpekeperetiyaya te ebenawen te Eleteala ke menge minatey?

Nenged-ulaula 4:2

Nengeepes dan dut te impenurù eni Pedro te kegkevanew ni Hisus se tuus te egkevanew red keuremà ke menge etew ne minatey ne mibperetiyaya ki Hisus.

Nenged-ulaula 6:6

Ne ini se nepemilì dan ne impeitindeg dan ne impekilala rut te menge kedserihan. Ne gewii ran te ebpengeningeni ne indampen dan ke menge belad dan dut te nepemilì dan su ebuyù dan te ebpeneuven dan te Eleteala.

Ruma 2:16

Ne ruma pà ne kayi egketueni te ini se Meupiya ne Tudtul ne ibpesabut ku, ne ruen hewii keuremà ne iyan ibpekukum te Eleteala dut te langun ne menge etew ne si Hisu Kristu. Su ibpayag din ke langun ne mid-ulaula ran, misan ke impegelesà dan.

1 Kurintu 10:2

Su ke kineruma ran dut te sehulapun wey ke kineapet dan te rahat ne iring te nebunyahan dan su wey ran mesakup ni Moises.

1 Kurintu 12:13

Su langun tew ne misan Hudiyanen etawa kenà uripen etawa kenà ne langun tew ne mibunyahan ibpepevayà dut te seveka rà ne Kedesenan ne Ebpetuntul te Menusiyà su apey ki egkevaluy ne egkeseveka ne lawa egenat dut te kebpekidseveka tew ki Hisus. Langun tew ne mibehayan te seveka rà ne Kedesenan ne Ebpetuntul te Menusiyà ne ed-ubpà kayi te hinawa tew.

2 Kurintu 5:10

Su langun tew ne ebpengetuvang ki Hisu Kristu keuremà su edtimbangen din ke ulaula te uman te seveka. Ketà be ne egketelimà dut te uman seveka ke lalew rin ne edait dut te ulaula rin te kayi pà sikandin mekeubpà te ampew te dunya. Su meupiya etawa mereatey ke ulaula rin, ne arà imbe ke egketelimà din.

Pilipus 3:21

Ne ketà te kedlived din, ne ebeluyen din ke lawa tew ne ebpatey iring dut te lawa rin ne kenà ebpatey. Egkegaga rin te ed-ulaula ini ibpepevayà dut te gehem din te ebayàbayà dut te langun taman.

Kulasi 2:12

Su ketà te kinepebunyag tew ne iring te nekeruma kiyu ki Hisus te minatey wey inleveng. Ne ketà maa se kinehemew tew en kayi te wayig ne iring maan arà te nekeruma kiyu ki Hisus te neuyag te behu ne umur su sabap dut te kedsarig tew te gehem te Eleteala ne iyan mibanew ki Hisu Kristu dut te minatey.

2 Timoteo 2:18

Su midsuwayan dan ke tidtu ne penurù su egkehiyen dan te neipus en ke hewii te kebanew te Eleteala te menge etew ne minatey. Tembù be ini ve se ebpemenudtulen dan ne ebpekeliveg te itungan dut te ruma ne mibperetiyaya.

Hibruhanen 11:35

Ne sabap dut te sarig te menge meritan ne ke menge anak dan ne minatey ne nevanew red maa. Duen duma pà ne menge etew ne mevaher se sarig dan te Eleteala ne nesigkem wey mibpekesekitan. Ne misan pà te nerasey ran taman te kinepatey ran ne iyan dan pinedtumù se ebpatey tumin dè be ke ebpekeengked dan dut te kebperetiyaya ran, su netuenan dan ne egkevanew red maa te Eleteala ne meupiya pà se ked-ubpà dan diyà te kandin.

Hibruhanen 9:10

Su ini, ne miduma ran dà te menge penduan mekatag te betasan te kegkaan, ked-inum wey ke mid-ulaula ran te ebmelinis ke lawa ran te warà dan pà mekeuvey te Eleteala. Su langun kayi ne suhù ne idlinis dà dut te lawa ran, ugaid ne kenà egkegaga te edtilak ke hinawa ran. Ne langun kayi ne ruen egkeetahan din se taman dà ketà te hewii ne edsembian te Eleteala ke behu ne ralan.

2 Pedro 3:7

Ne kayi te Lalag te Eleteala rema ne ebpesebutan din te ebpeiseg pà ini se langit wey tanà ne egkekita ta guntaani taman te edereetan din ketà te akir din ne hewii, ugaid ne kenà wayig su apuy se idsuhù din ne ederaat. Ne edereetan din iya ke menge etew ne ed-ulaula te meraat, ne idtehaad din dà ke ebpekeuma ke hewii te kegkukum din kandan.