Hibruhanen 3:7 - Ke meupiya ne tudtul mekeatag ki Hisu Kristu

⁷ Engketà be ne ed-ulaula kiyu te iring te nekahi rut te Kedesenan ne Ebpetuntul te Menusiyà ne egkahi te, “Na, embiya egkerineg niyu ke Lalag te Eleteala,

Hibruhanen 3:7 ပူးပေါင်းရင်းမြစ်များ

Mateo 17:5

Edlalag pà si Pedro, ne ruen mermerayag ne sehulapun ne nekelikuvung kandan ne ruen suwara ne ketà ebpuun te sehulapun ne migkahi te, “Ini ke Anak ku ne igkelimù ku nevenar, ne ebpekesuhat nevenar sikandin te hinawa ku. Pemineha niyu ke edlelahen din!”

Mateo 22:43

“Benar,” ke si Hisus, “ne geina te iring ketà ne meambe ke migkahi si David te arà se Impasad te Eleteala ne Ebperetuen te langun ne Kerenan din? Su midlumunan te Kedesenan ne Ebpetuntul te Menusiyà si David ne impesurat din te,

Marcos 12:36

Su mid-ulinan te Kedesenan ne Ebpetuntul te Menusiyà si David ne impesurat din te, ‘Migkahi ke Eleteala ketà te Kerenan ku te: Kayi ka pinuu te rapit te egkekewanan ku taman te ebpenggiekan ku ke menge kunterà nu.’”

Juan 10:16

Ruen pà ruma ne menge bilibili ku,” ke si Hisus “ne warà pà kayi te lusud te tudilan. Ed-ewiten ku ve sikandan kayi te tudilan ini ne ebpemineg dan kedì, ne egkevaluy ran ne senge luyuran dà ne seveka rà dema se tumetuganur kandan su siaken dà.

Juan 10:27

Su ke menge etew ku ne timbang te bilibili ku,” ke si Hisus “ne ebpemineg dan kedì su egkekilala ren ma ke suwara ku. Egkekilala ku sikandan ne eduma ran kedì.

Juan 10:3

Embiya edlusud sikandin ne ebpuwasan dut te ebantey ke humawan. Ne ebpekekilala ke bilibili te suwara rin ke ed-umawen din dut te ngaran dan su ibpelihawang dan.

Juan 5:25

Sebenarvenar ini se egkehiyen ku, misan ke menge etew ne iring te minatey en su sabap dut te salà dan ne neuma en ke hewii ne egkerineg dan ke lalag ku, ke Anak te Eleteala, ne arà se ebpemineg ne egkevehayan te behu ne umur.

Nenged-ulaula 1:16

“Menge suled,” ke sikandin, “kenà egkepakey ne kenà edtumanen ke Lalag te Eleteala ne impesurat te Kedesenan ne Ebpetuntul te Menusiyà ki David dengan. Su impekahi rin neraan te si Hudas se ebpalad ki Hisus diyà te menge etew ne edsigkem kandin.

Nenged-ulaula 28:25

Ketà ne mibpesusuweyey ran su warà meked-ayun ke itungan dan. Ugaid ne te warà den pà med-awà ne migkahi maa si Pablo te, “Benar iya ke migkahi rut te Kedesenan ne Ebpetuntul te Menusiyà ne impesurat dut te senge etew ne ebpelambas te Lalag te Eleteala rengan ne si Isayas.

Nenged-ulaula 8:29

Ne migkehiyan rutun si Felipe dut te Kedesenan ne Ebpetuntul te Menusiyà te, “Uvey ka ketà te kerumata rin.”

Hibruhanen 10:15

Ne benar ini su ruen dema impesabut dut te Kedesenan ne Ebpetuntul te Menusiyà ketà te impesurat din ne egkahi te,

Hibruhanen 3:13

Ugaid ne taman te ruen pà gewii tew te keduma te Lalag te Eleteala ne tevengaani niyu te ebpeiseg te peretiyaya niyu su apey kenà ebmeresen te ulu niyu ne kenà kew eduma te Eleteala su mid-ekalan niyu sikandin dut te salà niyu.

Hibruhanen 3:15

Su ini se impesurat ne Lalag te Eleteala ne egkahi te, “Na, embiya egkerineg niyu ke lalag te Eleteala, dumai niyu ne kenà kew pekeresen te ulu niyu iring dut te keep-epuan niyu rengan ne mid-atu te Eleteala.”

Hibruhanen 4:7

Su mibehayan pà maa lavew te Eleteala ke menge etew te hewii te kedtelimaa ran dut te impasad din te ke hewii ne ini en. Netuenan ta arà su guna su nekebpipira en nehatus ne rahun se midsahad ketà te hewii ne warà mekelusud ayan se menge etew ne meresen se ulu rin ne ruen impekahi te Eleteala ki David ne egkahi te, “Na embiya egkerineg niyu ke lalag te Eleteala, dumai niyu ne kenà kew pekeresen te ulu niyu.”

Hibruhanen 9:8

Ne igenat ketà ne ruen ibpesabut kenitew dut te Kedesenan ne Ebpetuntul te Menusiyà te ketà ebpuun te mekepal ne saput ne impehelet dut te Punggus ne Berekat ne Ruhu. Iyan din ibpesabut kenitew ne gewii te ruen pà suhù mekeatag dut te neuna ne ruhu ne edtumanan dan pà, ne warà pà mekeuma ke hewii ne egkepakey ne edlusud ke menge etew ketà te ruhu ne rutun en ke Eleteala.

2 Pedro 1:21

Su ini se Lalag te Eleteala ne impesurat dut te ebpelambas te Lalag te Eleteala rengan ne kenà ebpuun diyà te itungan den dà dè duen su ke Kedesenan ne Ebpetuntul te Menusiyà se mibpesabut kandan ke engkey se idsurat dan.

Imperayag 3:20

Pemineha nu, su ed-itindeg a kayi te gumawan te baley nu ne ed-umew a kenikew. Embiya ebpemineg ka kediey ne ebpuwasan a nikuna, ne edlusud a ne ebpetuheney ki te egkaan.