Hibruhanen 2:9 - Ke meupiya ne tudtul mekeatag ki Hisu Kristu

⁹ Ugaid ne iyan tew netuenan ne ke kinedatù en ni Hisus, misan mehaan dà ne hewii se kinepeembavà kandin rut te menge suluhuen te Eleteala. Su egenat dut te dekelà ne tavang te Eleteala dut te sikitew ne menge etew, ne mibpebaluy si Hisus ne etew ne mibpebpatey su imbeliwas din te langun tew ne menge etew. Na guntaani ne sikandin en se egkereyù wey egkeedatan su ke kinekerasey rin te kebpatey rin atag dut te langun ne menge etew.

Hibruhanen 2:9 ပူးပေါင်းရင်းမြစ်များ

Mateo 16:28

Tentenuri nu ini,” ke si Hisus, “ruen ruma niyu kayi ne kenà pà ebpatey taman ketà te hewii ne egkekita ran ke Impeanak te Menusiyà ne ebpekeuma su Edatù te menusiyà kayi te ampew te dunya.”

Mateo 6:28

“Embiya kenà ka ebpekegaga kayi, ne meambe ke egkeuru ka te ibevelegkas nu? Keniyan niyu rè ma te kevukaran ke engkey se kedtuvù dan. Kenà dan egelevek ne kenà dan ed-avel.

Marcos 9:1

Ne migkahi pà maa si Hisus te, “Tentenuri niyu ini, ruen ruma tew kayi ne kenà pà ebpatey taman ketà te hewii ne egkekita ran ke kedetui te Eleteala te menge etew rut te gehem din.”

Lucas 9:27

Tentenuri niyu ini, ruen ruma tew kayi ne kenà pà ebpatey taman ketà te hewii ne egkekita ran ke Kedetui te Eleteala rut te menge etew.”

Juan 1:29

Midtundug be maa ne hewii ne nekita ni Juan si Hisus se ebpelingguma ne migkahi en sikandin dut te menge etew ne uvey rin te, “Ayan de be ke etew ne iring te ibpelengesa ne nati te bilibili ne imbehey te Eleteala apey ke langun ne salà te menusiyà ne egkeawà.

Juan 10:17

“Igkelimù a te Amey ku ne Eleteala su andam a ne ebpebpatey kandan. Iyan ku kebpebpatey su apey ku metelimà ded ketà te kegkevanew ku.

Juan 12:32

Ne siak, embiya idtunggul ad diyà te pinebelavag ne kayu ne ebpuyuken ku ke langun ne menge etew te ebpengkayi te kedì.”

Juan 3:16

“Su kayi ebpuun te rekelà ne limù te Eleteala rut te langun ne menge etew kayi te ampew te dunya ne warà din ingkenuhuni ke budtung ne anak din, ugaid ne midsuhù din te ebpatey riyà te pinebelavag ne kayu su apey langun te ebperetiyaya kandin ne kenà edusaan te Eleteala ugaid ne ebpeketelimà dan te umur ne warà edtemanan din.

Juan 8:51

Sebenarvenar ne ini se idtarem ku keniyu te piya entei en se eduma te ibpenurù ku ne kenè en ebpatey.”

Juan 8:52

“Na benar iya ne midsuukan ka te vusew,” ke se menge Hudiyanen. “Su misan si Abraham wey ke langun ne mibpelembas te Lalag te Eleteala rengan ne mibpematey ran ded ma. Ne meambe ke migkahi nu te, ‘Misan entei en ne eduma te penurù ku ne kenè en ebpatey?’

Nenged-ulaula 2:33

Mibatun te Eleteala si Hisus ne riyà impepinuu te rapit te egkekewanan te Amey rin ne Eleteala, ne imbehey kandin dut te Amey rin ke Kedesenan ne Ebpetuntul te Menusiyà ne impasad kandin. Ne imbehey red kandin lavew ke ketengdanan te ibpepengkayi rin ke Kedesenan ne Ebpetuntul te Menusiyà dut te sikami. Ne ini se nekita niyu wey nerineg niyu ne ini se mekegeyip ne mid-ulaula dut te Kedesenan ne Ebpetuntul te Menusiyà ne imbehey rin kenami.

Nenged-ulaula 3:13

Ugaid ne ke Eleteala ne iyan ed-erapen dut te menge keep-epuan tew ne si Abraham, si Isaac wey si Jacob,” ke si Pedro, “ne impepurù din ke sugsuhuen din ne si Hisus su mibatun din. Ugaid te kayi pà sikandin te ampew te dunya, ne impalad niyu sikandin diyà te menge egkeunuten niyu diyà te gubirnu niyu su ebpeimetayan. Ini se mid-ulaula niyu misan ibpeliyu perem sikandin ni Pilatu ke gubinedur, ugaid ne warà kew medtuhut su mid-engkenà kew kandin diyà te etuvangan ni Pilatu.

Ruma 5:18

Ketà be ne netuenan tew te sabap dut te salà te senge etew ne si Adan ne nesuhat te kukuman te kedusaa te langun ne menge etew. Iring din ded dema arà te metidtu ne mid-ulaula te senge etew ne si Hisu Kristu te mibpeimatey, ne ibpeliyu rin ke langun ne menge etew te kedusa kandan te Eleteala su apey ran meketelimà te umur ne warà edtemanan din.

Ruma 5:8

Ugaid ne impayag te Eleteala ke pengelimuan din keytew su midsuhù din si Hisu Kristu te ebpebpatey mekeatag keytew te mekesesalà ki pà.

Ruma 8:3

Su ke keduma tew te penduan ne kenà arà se kebpekeliyu tew te salà ne ebayàbayà te lawa tew su geina te warà tew megaga te edtuman ke penduan. Ugaid ne Eleteala red se mibpelihaun keytew dut te kinekeuripen tew te salà, su midsuhù din ke Anak din si Hisu Kristu kayi te ampew te dunya ne pinebaluy rin ne etew iring keytew, ugaid ne warà salà din. Ne kayi te kinepebpatey rin mekeatag te salà tew, ne pineliyu ki te Eleteala rut te kebayàbayà te salà te lawa tew.

Ruma 8:32

Su misan ke Anak din si Hisus ne warà din pekinuhuni, ugaid ne midsuhù din kayi te ampew te dunya su apey ebpekepeimatey ne idselidig kenitew atag dut te salà tew. Ne embiya iring ketà ke pengelimuan din keytew, ne kenà egkepakey ne kenà din ibehey keytew ke langun ne kurang tew.

2 Kurintu 5:15

Iyan din impatey ne kedselidig din dut te langun ne menge etew su apey kenà dan en med-ulaula te kandan dà ne kiyug. Ugaid ne iyan dan edtumanen ke kiyug ni Hisus ke minatey ne nevanew su apey ran mekepeliyu rut te kedusa te salà dan.

2 Kurintu 5:21

su midsuhù din si Hisu Kristu ne warà salà din te ibpevava kandin ke langun ne salà tew. Iyan kineengketaa te Eleteala ne apey ketà ebpuun te kebpekidseveka tew ki Hisus ne ruen en kebmetidtu tew riyà te etuvangan te Eleteala.

Gelasiya 4:4

Ugaid ne wey mekeuma ke hewii ne mibpetedtavan te Eleteala rengan, ne midsuhù din ke Anak din kayi te ampew te dunya ne pinebaluy ne etew. Su ibpeanak din si Hisus te senge etew ne meritan ne Hudiyanen ne miduma sikandin dut te penduan te menge Hudiyanen ne intahak ki Moises

1 Timoteo 2:6

Iyan din mid-ulaula te kinepengkayi rin te ampew te dunya ne imbeliwas din ke umur din te kebpeliyu rin te langun tew rut te kedusa te salà tew. Mid-ulaula rin ini dut te enget en ne hewii ne midtendù te Eleteala rengan su tuus be ini te kiyug te Eleteala ne langun ne menge etew ne ebpekeliyu.

Hibruhanen 1:9

Su iyan nu kiyug ke metidtu ne ulaula, ne igkeepesi nu ke ulaula ne meraat. Tembù be siaken ke Eleteala nu se mibpemilì kenikew, ne imbehey ku keykew ke kehelawan su mid-edatan ku sikew muna pà dut te menge ruma nu.”

Hibruhanen 10:5

Tembù be guna su mehaan en ebpengkayi si Hisu Kristu te ampew te dunya ne migkehiyan din ke Amey rin ne Eleteala te, “Kenà nu iyan egkiyuhan ke menge binatang ne impelengesa wey ke ruma pà ne ibehey ran keykew; ugaid ne iyan nu kiyug ne egkevaluy a ne etew, tembù be impenehana nu en ke lawa ku.

Hibruhanen 11:5

Ne iring din ded dema ke kedsarig ni Enoc te Eleteala rengan. Su sabat dut te kedsarig din ne warà mekepevayà te kepepatey sikandin su mid-ewit sikandin te Eleteala riyà te langit. Ne misan mibpemengà te menge etew sikandin, ne warà dan en mekita su riyan en ma te Eleteala. Ne ruen impesurat ne Lalag te Eleteala te kayi pà si Enoc te dunya ne nekesuhat sikandin te hinawa te Eleteala.

Hibruhanen 12:2

Ne kenà kiyu ebpenlingìlingì te keduma tew ki Hisus su sikandin ke ed-iringan tew su sikandin ke rudsuan te kedsarig tew wey sikandin ded ke edtemanan. Midtigkeran din en ke keresayen te kinelensanga kandin diyà te pinebelavag ne kayu, ne warà din ingkeyeyai te ked-imetayi ran kandin ketà su netuenan din te ruen igkehalew rin embiya egkeipus din ini se helevek din te ebpeliyu kenitew. Ne guntaani ne ebpepinuuwen en sikandin diyà te egkekewanan ketà te ebpinuuwan te Eleteala ne edatù.

Hibruhanen 2:7

Su pehaney ne mibeelan nu sikandan ne mevavà pà dut te menge suluhuen. Ugaid ne mehaan dà ini; su ibpepurù nu en sikandan te egkereyù wey egkeedatan

Hibruhanen 7:25

Tembù be ebpekegaga nevenar si Hisus te ebpeliyu te langun ne ed-uvey te Eleteala su ebuyù te tavang su atag dut te sarig dan kandin, su warà ma ketepusan din se kebuyù din te tavang kenitew riyà te Eleteala.

Hibruhanen 8:3

Ne langun ne menge Mepurù te Terebpelengesa ne ebpeninindeg dut te menge etew diyà te Eleteala ne netendù sikandan te ebehey dut te ibpelengesa ne menge binatang wey ke ruma pà ne ibehey te menge etew riyà te Eleteala. Ne iring din ded dema si Hisus ke Mepurù ne Terebpelengesa tew, su ruen ded dema ibpekevehey rin diyà te Eleteala.

1 Pedro 1:21

Ne geina te ini se mid-ulaula ni Hisus ne nekeperetiyaya kiyu te Eleteala. Su sikandin ke mibanew ki Hisus wey mibpepurù dema kandin diyà te langit. Tembù be sikitew ne iyan tew ebperetiyayaan wey edserihan ne Eleteala ne ebanew keytew rema keuremà.

1 Juan 2:2

Su sikandin se midtihis se lengesa rin dut te kinepatey rin apey meawà ini se salà ta, ne kenà ini rà se salà ta su misan ke salà dema dut te langun ne menge etew kayi te ampew te dunya.

Imperayag 19:12

Ini se mata rin ne iring te apuy ne egkeregreg, ne ruen seluluy rin ne merakel. Ne ruen dema ngaran ne insurat diyà te kandin, ugaid ne ke meana ketà ne iyan dà sikandin netau.

Imperayag 5:9

Ne migkanta ran te behu pà ne kanta, ke se bayuk dan te, “Sikuna rà ke ebpekegaga ne ebpekekuwa te midlulun ne kelatas ne ebpekeawà dut te menge tuus ne impereket ketà. Su mid-imetayan ka rengan ne sabap dut te kedtudà te lengesa nu ketà te kineimetayi keykew, ne mid-awun nu ke menge etew ne meraat se ed-ul-ulaan din dut te langun ne menge inged, bansa wey kinehiyan su apey sikandan ne egkevaluy ne sakup te Eleteala.