Hibruhanen 13:3 - Ke meupiya ne tudtul mekeatag ki Hisu Kristu

³ Ne kenà niyu lipati se kedtavang niyu te ruma niyu ne riyà te bilengguan su iyan niyu kebpegitunga ne sikiyu red dema arà se nevilanggù. Ne tevangi niyu red dema ke menge ruma niyu ne egkerasey iring te sikiyu red ke egeram ketà.

Hibruhanen 13:3 ပူးပေါင်းရင်းမြစ်များ

Mateo 25:36

Ne ketà te warà belegkas ku, ne mibehayan a niyu te belegkas. Ne nekedaru a, ne midtuganur a nikiyu. Ne nevilanggù a, ne midlauy a nikiyu.’

Mateo 25:43

Ne ketà te nekeuma a riyà te keniyu, ne warà a niyu pepemenayika. Ne warà belegkas ku, ne warà a niyu behayi. Nekedaru a, ne warà a niyu tugenura. Nevilanggù a, ne warà a niyu leuya.’

Nenged-ulaula 24:23

Ne migkehiyan din arà se senge etew ne sereyintu te ebpeventayan si Pablo, ugaid ne ruen idtuhut kandin. Ne egkepakey rema ne ke menge egkekilala rin ne ebpenumbaley su ebehey te kurang din.

Nenged-ulaula 27:3

Ne ke neketundug ne hewii ketà ne nekerunggù key diyà te inged ne Sidun, ne si Julio ini ne midtulengeran din si Pablo su intuhut din te ebpekepemenaug ne ebpekepenumbaley sikandin diyà te menge etew ne nekilala rin su apey ran mevehayi te piya engkey se kurang din.

Ruma 12:15

Embiya ruen duma tew ne egkehalew, ne eduma ki rema rut te igkehalew ran. Ne embiya ruen ruma tew ne egkemutuwan, ne eduma ki te kemutu ran.

1 Kurintu 12:26

Embiya egkesekitan ke seveka ne pepatà te lawa ta, ne langun te lawa ta ne egeram te mesakit. Ne engketà ded dema ke embiya ruen seveka ne pepatà te lawa ta ne egkereyù, ne langun dan ne egkehalew.

Ipisu 4:1

Ne siaken ne ini te bilengguan su mekeatag te kebpesabut ku ki Hisus ne Kerenan tew, ne iyan ku ebuyuen keniyu ne edtumanen niyu ke langun ne dait ne ulaula dut te mibperetiyaya en su arà se kiyug te Eleteala dut te kebpemilì din keniyu.

Kulasi 4:18

Ne siaken imbe ini si Pablo se edsurat dut te ngaran ku kayi te ketepusan, ne ebpenginginsà a dut te langun ne sikiyu. Na kenà niyu lipati se ini a te bilengguan. Iyan ku kiyug ne egkeheram niyu ke tavang ne riyà ebpuun te Eleteala. Arà dà taman. Pablo

Hibruhanen 10:34

Ne impekita niyu ke kegkeyru niyu rut te nengevilanggù su midtevangan niyu sikandan. Ne misan pà te mid-ahew ke menge kearen niyu ne warà nemutu ke hinawa niyu. Uya, su netuenan niyu se ruen pà beripantag ne kearen niyu ne edtahad diyà te langit ne kenà egkeahew keniyu taman te taman.

Hibruhanen 11:37

Ne ruen pà lavew mid-imetayan te ebpenrumbehan te batu, ruen edtemperen ke lawa ran te havas, ne ruen pà se ibpetibas. Ruen duma ne nengesegseg dut te ubpaan dan ne ebpekelauglaug dan en se iyan den dà ibevelegkas se lundis te menge kambing wey bilibili. Neayuayu ran nevenar, ne nerehenan dan, ne meraat se imped-ulaula kandan.

1 Pedro 3:8

Ne ruen dema egkehiyen ku keniyu te langun ne menge mibperetiyaya, iyan iya se medseveka se itungan ta wey ke hinawa ta. Pelimlimuey kiyu rut te menge ruma ta iring te telteledsuled, ne ebpetultulengerey kiyu ne kenà ki mepelevawen.