Hibruhanen 12:24 - Ke meupiya ne tudtul mekeatag ki Hisu Kristu

²⁴ wey riyà te ki Hisus ke midtuman dut te behu ne pasad te Eleteala, su impepevayà dut te lengesa rin ne netilak kiyu rut te salà tew. Su ke lengesa ni Hisus ne imbùbù din dut te kinepatey rin, ne muna pà se keupiya rin su tuus ini te limù te Eleteala te kebpeliyu kenitew, kenà iring dut te lengesa ni Abel rengan su ke lengesa rin ne tuus te kedusa te Eleteala rut te suled ni Abel ne mid-imatey kandin.

Hibruhanen 12:24 ပူးပေါင်းရင်းမြစ်များ

Mateo 23:35

Tembù be edusaan kew te Eleteala atag dut te kineimatey te langun ne menge etew ne kenà egkevenaran igenat dut te kineimatey ki Abel taman en dut te kineimatey ki Zacarias ke anak ni Berekiyas ne mid-imetayan te keep-epuan niyu diyà te elet te edenaan te ibpelengesa te Eleteala wey ke mibpeheletan diyà te Nekebpuru ne Valey te Eleteala.

Mateo 26:28

Ini ke lengesa ku,” ke si Hisus, “ne ebpeketudà ne ibavas te menge etew, su tuus ini te egketuman en ke impasad te Eleteala rengan te ebpekepelihaun en ke menge etew dut te keberedusaan dan.

Marcos 14:24

“Ini ke lengesa ku,” ke si Hisus, “ne ebpeketudà ne ibavas te menge etew, su tuus ini te egketuman en ke impasad te Eleteala rengan te ebpekepelihaun en ke menge etew dut te keberedusaan dan.

Lucas 11:51

Edusaan kew te Eleteala dut te kineimatey dengan te langun ne menge etew ne mibpelambas te lalag din igenat dut te kineimatey ki Abel taman en dut te kineimatey ki Zacarias ke mid-imetayan diyà te elet te edenaan te ibpelengesa te Eleteala wey ke mibpeheletan diyà te Nekebpuru ne Valey te Eleteala. Uya, benar ini se egkehiyen ku,” ke si Hisus, “sikiyu se menge etew guntaan, igkeragkes kew te Eleteala te kedusa rin dut te kinepengimatey ran dengan.

Lucas 22:20

Guna su nekeipus dan se edlavung ne migkuwa maa ni Hisus ke ed-inumen se egkahi te, “Ini se lengesa ku ne ebpeketudà ne ibavas te langun ne menge etew, su tuus ini te egketuman en ke impasad te Eleteala rengan te ebpekepelihaun en ke langun ne menge etew te keberedusaan dan.

Gelasiya 3:20

Ugaid ne ketà te hewii ne imbehey en te Eleteala ke impasad din ki Abraham, ne warè en tehutau su sikandin en iya ke midtarem.

1 Timoteo 2:5

Su Eleteala ne sebseveka rà, ne sebseveka rà dema se edteyekupan tew te menge etew riyà te etuvangan te Eleteala ne warà liyu rin ke kenà si Hisu Kristu ne nevaluy ne etew.

Hibruhanen 10:22

Tembù be ed-uvey kiyu en te Eleteala se egenat te keputian te atey tew ne kenà eduwaruwa se kebperetiyaya tew kandin. Ed-uvey kiyu kandin su ke lengesa ni Hisus ke midtilak te hinawa tew rut te meraat ne ulaula ne igkevenari te hinawa tew, ne iring te midlùluan din ke lawa tew rut te metingew ne wayig.

Hibruhanen 11:28

Ne sabap te sarig din dema te Eleteala ne iyan din midumaan ke insuhù te Eleteala kandin. Tembù be ebpetenuran din te menge Hudiyanen ke ed-ingaranan te “Kedsahad te Suluhuen te Eleteala.” Su edsumbalì dan te bilibili ne ibpirik ke lengesa rin diyà te gumawan te menge baley ran su apey edsehari rà te suluhuen te Eleteala ne kenà ed-imetayan ke pengenayan ne anak dan ne meama.

Hibruhanen 11:4

Si Abel rengan, ne egenat te kedsarig din te Eleteala ne iyan nevirangan te Eleteala ke imbehey rin kandin ne meupiya pà dut te imbehey te kakey rin ne si Kain. Ne sabap dut te kedsarig din ne midtelimà sikandin ne metidtu riyà te etuvangan te Eleteala, tembù be midtelimà te Eleteala ke imbehey rin. Ne misan engketà te rengan dà ne minatey si Abel, ne ruen pà lavew egkepenurù kenitew kayi te kedsarig din.

Hibruhanen 13:20

Ne ke Eleteala ke mibanew ki Hisu Kristu rut te kinepatey rin, ne sikandin en ke pinekemepurù ne egkeunutan tew ne iring sikandin te tumetuganur dut te sikitew ne bilibili rin. Su ke lengesa rin ne impetudà ketà te kinepatey rin diyà te pinebelavag ne kayu ne arà ke tuus dut te behu ne pasad te Eleteala keytew, ini se pasad din ne warà kegkesembii rin taman te taman. Ne ibpengeningeni ku te Eleteala ne ebehey te melintad ne hinawa, ne ibehey rin kenitew ke langun ne ebpeketavang kenitew te kebpekeiseg te kedtumana tew te kandin ne kiyug. Ne ibpengeningeni ku red dema te sikandin se edtavang keniyu su apey kew ed-ulaula te ebpekesuhat te hinawa rin ibpepevayà dut te tavang ni Hisu Kristu keniyu. Ketà be ne edeyù kiyu ki Hisu Kristu taman te taman. Ne metuman be ini!

Hibruhanen 7:22

Ne kayi te kinepenendan te Eleteala mekeatag te kedterebpelengesa ni Hisus, ne netuenan ta te ini se behu ne ralan te kebpekeuvey ta te Eleteala ne impasad din ne meupiya pà dut te raan ne penduan ne intahak din ki Moises, su si Hisus ke tuus te ini se behu ne pasad ne egketuman en.

Hibruhanen 8:13

Ne ketà te impesabut en te Eleteala te ruen en behu ne pasad din, ne nesebutan tew en te nesembian din en arà se raan ne penduan su neipus en. Ne embiya ke raan ne nesembian en, ne egkeawà en su warà en pantag din.

Hibruhanen 8:6

Ugaid ne ini se helevek ni Hisus te kedterebpelengesa ne mepurù pà dut te nengehelevek te menge terebpelengesa rengan. Ne iring din ded dema ke keupiya ini se behu ne pasad te Eleteala te si Hisus se terebpelengesa tew ne ebpeninindeg kenitew su muna pà se keupiya rin ketà te neuna ne pasad te Eleteala. Iyan din ked-una te keupiya ini se behu ne pasad su ruen impenendan din mekeatag ketà ne mepmeupiya pà nevenar.

Hibruhanen 8:8

Ugaid ne nekita te Eleteala te midsurang ke menge etew dut te suhù te penduan ne intahak ki Moises. Tembù be midsewayan din sikandan te egkahi te, “Ruen hewii ne ebpekeuma ne ebeelan ku ke behu ne pasad dut te menge etew ne inenakan ni Israyil wey ke menge etew ne inenakan ni Huda.

Hibruhanen 9:15

Ne tehaad te ruen gaga te lengesa ni Hisus iring ketà, ne sikandin ke ebpeninindeg kenitew riyà te Eleteala su edtuman dut te behu ne pasad su apey ke langun ne menge etew ne midtawag te Eleteala ne ebpeketelimà dut te penaub ne impasad din ne warà edtemanan din. Ne egketelimà ini sabap dut te kinepatey ni Hisu Kristu ne nekepeliyu kandan dut te salà ne neveelan dan gewii te kineruma ran te neuna ne pasad.

Hibruhanen 9:19

Ne arà se mid-ulaula ni Moises rengan. Pehaney ne mibpesabut din te menge etew ke langun ne penduan ne imbehey kandan te Eleteala. Arà pà ne migkuwa rin ke lengesa te menge nati ne sapì wey menge kambing ne impelengesa ne mid-emutan din ini te wayig. Na migkuwa rin ke tangkey te pinemula ne ed-ingaranan te hisup ne ruen bulvul te bilibili ne midtinà te merihà ne mibegkesan ketà, ne in-ered din ini ketà te lengesa ne impirik din dut te riberù ne midsuratan te penduan ne impirik din dema dut te menge etew.

Hibruhanen 9:21

Ne iring din ded dema ne mibpemirikan ni Moises ke baley ne ebpengerapan wey ke langun ne kesengkapan ketà te kebpengarap.

1 Pedro 1:2

Su rengan ne nepemilì kew te Eleteala ke Amey tew su ini se netahù te itungan din. Nepemilì kew nikandin ne egkevaluy ne menge etew rin ne lunsey se hinawa ran egenat te gehem te Kedesenan ne Ebpetuntul te Menusiyà. Ne iyan din kebpemilì keniyu su apey kew egkevaluy ne menge etew ne eduma ki Hisu Kristu ne ebmetilak ke hinawa niyu rut te lengesa rin ne impetudà din keniyu ketà te kinepeimatey rin su apey egkeawà ke salà niyu. Iyan ku ibpengeningeni ne ebpeneuven kew nikandin wey ebmelintad nevenar se hinawa niyu.