Hibruhanen 11:16 - Ke meupiya ne tudtul mekeatag ki Hisu Kristu

¹⁶ Inemulà se iyan dan egkiyuhan ne arà se inged ne muna pà se keupiya rin dut te mid-ewaan dan, su ini ne inged ne riyà te langit. Ne geina te arà se egkiyuhan dan ne kenà igkeyeyai rut te Eleteala ne edtewahan sikandin te Eleteala ran su ruen en inged ne impenehana rin kandan te ed-ubpà.

Hibruhanen 11:16 ပူးပေါင်းရင်းမြစ်များ

Mateo 25:34

“Ne egkahi en ini se punggus ne ratù kayi te menge etew te egkekewanan din te, ‘Sikiyu ne mibehayan te keupianan dut te Eleteala ne Amey ku, ne lusud kew dut te Kedetuan te Eleteala ne impenehana keniyu igenat dut te kinelimbaha te kelibutan.

Marcos 12:26

Ne ini se id-insà niyu mekeatag te kegkevanew te menge minatey, ne maa warà niyu ves mevasa ke impesurat ne lalag ni Moises dengan mekeatag te kinepekidlalag te Eleteala kandin ne riyà ebpuun te neregreg ne sagbet? Su misan neuhet en ne minatey en si Abraham, si Isaac, wey si Jacob ne migkahi ke Eleteala ki Moises te, ‘Siaken ke Eleteala ne ebpengerapan ni Abraham, ni Isaac, wey si Jacob,’ ke se Eleteala.

Marcos 8:38

Embiya ruen etew ne igkeyeyai a rin wey ini se ibpenurù ku kayi te ini ne timpu ne merakel ne menge etew ne mekesesalà wey edsumpalit te Eleteala, ne ke Impeanak te Menusiyà ne igkeyeyai rin dema sikandin ketà te kedlived din kayi te ampew te dunya. Su ketà ne hewii ne ruen raman din ne riyà ebpuun te Amey rin ne Eleteala, ne edumaan sikandin dema rut te menge berekat ne suluhuen diyà te langit.”

Lucas 12:32

“Sikiyu ini se menge edumdumaan ku,” ke si Hisus, “kenà kew meandek, su misan deisek kew rà ne ke Amey niyu riyà te langit ne egkiyug ne egkeratù kew dut te menge etew ne Edetuan din.

Lucas 20:37

Ne mekeatag ketà te egkevanew red te Eleteala ke menge minatey,” ke si Hisus, “mepayag en ini ketà te impesurat ni Moises dengan mekeatag te kinepekidlalag te Eleteala kandin diyà ebpuun te neregreg ne sagbet. Su ketà ne nekahi ni Moises te ini se Eleteala ‘ne iyan ded Eleteala ne ebpengerapen ni Abraham, si Isaac wey si Jacob,’ misan ketà ne hewii ne neuhet dan en ne minatey.

Juan 14:2

Merakel se egkeubpaan diyà te baley te Amey ku, ne ebpendiyan a su ebpenehana a te egkeubpaan niyu. Su kenà ku egkehiyen ini keniyu embiya kenà benar.

Nenged-ulaula 7:32

‘Siaken ke Eleteala ne mibpengerapen dut te menge keep-epuan niyu ne si Abraham, si Isaac wey si Jacob.’ Ne migkerker si Moises te kegkeandek din ne warà din metikà te edtengteng.

Pilipus 3:20

Ugaid ne langun tew te tidtu ne mibperetiyaya ki Hisus ne kenà iring ketà, su misan ed-ubpà kiyu kayi te ampew te dunya ne ebpendiyà ki te surugà ne ke tidtu ne ubpaan tew. Ne riyà ebpuun dema ini se ebpenerengen tew ne Kerenan tew ne si Hisu Kristu ne mibpeliyu kenitew.

2 Timoteo 4:18

Ne netuenan ku te misan engkey se egketemanan ku ne meraat ne egketevangan a rin, ne ed-ewiten a rin diyà te edetuan din diyà te langit. Iyan be meupiya ne kenà kiyu ed-engked se edeyrey kandin taman te taman! Ne metuman be ini!

Hibruhanen 10:34

Ne impekita niyu ke kegkeyru niyu rut te nengevilanggù su midtevangan niyu sikandan. Ne misan pà te mid-ahew ke menge kearen niyu ne warà nemutu ke hinawa niyu. Uya, su netuenan niyu se ruen pà beripantag ne kearen niyu ne edtahad diyà te langit ne kenà egkeahew keniyu taman te taman.

Hibruhanen 11:10

Ne midtigkeran ni Abraham te iring ketà ne ked-ubpà, su ruen ebpenerengen din ne inged ne kenà bulug egkereetan ne mibeelan te Eleteala diyà te langit.

Hibruhanen 11:14

Ne ke menge etew ne egkahi te nekererepuan den dà kayi te dunya ne ibpekita te ruen pà ebpenerengen dan ne tidtu ne inged dan diyà te langit ne ed-ubpaan dan taman te taman.

Hibruhanen 11:40

Su ruen pà maa meupiya ne netahù te itungan te Eleteala ne ini se kiyug din te sikandan se ebpeteharan pà kenitew su apey ke langun tew ne keseveka rà ebpeketelimà dut te impasad din ne arà se kedtidtuwa rin kenitew.

Hibruhanen 12:22

Ugaid ne sikitew ve guntaan, ne ini ke ralan te kebpekeuvey tew te Eleteala ne kenè en iring dut te menge Hudiyanen dengan su iring te nekeuma ki en dut te buvungan ne ed-ingaranan te Siyun ne ed-ubpaan te Eleteala ne warà kemetayan din. Ne ini se inged ne riyà te langit ne ed-ingaranan te Behu ne Hirusalim ne ruen egngivungivuwan ne menge suluhuen din dema ne edeyù kandin.

Hibruhanen 13:14

Su ini se ampew te dunya ne eranà tew rà su kenà ini se ubpaan tew taman te taman. Ugaid ne ruen ebpenerengen tew ne inged ne egkeubpaan tew riyà te langit.

Hibruhanen 2:11

Eleteala se Amey ni Hisus ne edtilak te hinawa te menge etew rut te salà dan, ne Eleteala rema se Amey dut te langun tew ne midtilak en ni Hisus ke salà tew. Tembù be kenà din igkeyeyai sikandin te egkahi te sikitew ne menge suled din.

Imperayag 21:2

Nekita ku ke inged ne ed-ubpaan te Eleteala ne ed-ingaranan te Behu ne Hirusalim ne ibpehunrerenà te Eleteala genat te langit. Mekempet ini se inged su iring te raha ne mekempet se belegkas din su mibpegediran su ed-esawaan.