Hibruhanen 10:39 - Ke meupiya ne tudtul mekeatag ki Hisu Kristu

³⁹ Ugaid ne sikitew ne kenà iring ketà se ulaula tew, su kenà kiyu en ed-iring dut te menge etew ne mid-engked ke kebperetiyaya ran ne edusaan te Eleteala. Su mevaher se kegawed tew te kebperetiyaya tew ne ketà be ne ebpekeliyu kiyu.

Hibruhanen 10:39 ပူးပေါင်းရင်းမြစ်များ

Marcos 16:16

Ne piya engkey ne etew ne ebperetiyaya wey ebpebunyag dan ne ebpeketelimà te umur ne kenà edtaman, ugaid ne ke etew ne kenà ebperetiyaya ne ebetetayan te salà te kepatey.

Lucas 11:26

Ne midlihawang pà sikandin ne med-ewit te pitu ne vusew ne tuwas pà kandin keraat, ne langun dan ne ketà dà mid-ubpà. Ne ini se egketemanan ketà te etew ne muna pà se kepasang din dut te neuna.”

Juan 17:12

Su gewii te ini e pà te kandan ne mid-ipat ku sikandan te ralan te kerekelà te gehem te ngaran nu ne imbehey nu kediey. Uya, mid-ipat ku sikandan su warà seveka rà kandan ne neawà liyu rà ketà te senge etew ne iyan dà nekahi neraan ne ed-ulug kediey. Neawà sikandin su apey egketuman ke impesurat ne Lalag nu.

Juan 20:31

Ugaid ne ini se mekegeyip ne ulaula ne ingkesurat kayi su apey kew ebpekeperetiyaya te Anak te Eleteala si Hisus, ne ebpekeperetiyaya kew rema te sikandin ke Impasad te Eleteala ne Ebperetuen, su embiya ebperetiyaya kew kandin ne ebpeketelimà kew te umur ne warà edtemanan din.

Juan 5:24

“Sebenarvenar ini se egkehiyen ku ne misan engkey ne etew ne ebpemineg te lalag ku wey ebperetiyaya rut te midsuhù kedì, ne ebpeketelimà dut te umur ne warà edtemanan din. Ne kenà en edusaan su nekepeliyu en sikandin te kepepatey ne warà edtemanan din, ne ebpekeubpà en diyà te Eleteala taman te taman.

Juan 6:40

“Su ini ve ke kiyug te Amey ku ne Eleteala te langun ne nekesabut te siaken ke Anak din ne ebperetiyaya ran kedì ne ebpeketelimà dan te umur ne warà edtemanan din, ne siaken se ebanhew kandan ketà te ketepusan ne hewii te kegkukum.”

1 Tiselunika 5:9

Su ke Eleteala ne kenà iyan intahù te itungan din te kebpemilì din keyta ne egkevaluy ne menge anak din apey ki edusaan ketà te kegkukum din en te kelibutan. Ugaid ne iyan din intahù te itungan ne ebpekepeliyu keyta ibpepevayà te Anak din ne si Hisu Kristu ke Kerenan tew.

2 Tiselunika 2:3

Uram kew su apey kew kenà egkelimbungi su kenà pà ebpekeuma arà ne hewii te warà pà med-ulaula ini se mevaher ne kegkunterà te menge etew dut te Eleteala, ne arà ded ne hewii ne edlepew ke etew ne nepenù te meraat. Ketà te kedlepew rin ne egkunteraan din ke langun ne meupiya ne egkiyuhan te Eleteala. Ne sikandin se edereetan te Eleteala riyà te apuy ne rakà.

1 Timoteo 6:9

Ugaid ne ke menge etew ne egkesuat ne egkewasa ne merakel se ibpenggeram kandan. Su ini se kegkesuat dan ne warà rantek din ne ebpekekaid kandan ne iring te telebpì kandan ne kenà dan ebpekeliyu. Ne kayi te ini ne egkevinasa ran dut te kedusa ne kenà edtaman.

Hibruhanen 10:26

Su embiya nesebutan tew en ke benar ne penurù mekeatag ki Hisu Kristu ugaid ne edtivevaan tew pà manen te ed-ulaula te meraat, ne warà en be egkepenareng tew te kebpekeliyu tew pà te salà tew.

Hibruhanen 10:38

Ne ke menge etew ne metidtu kayi te etuvangan ku ne edtigkeran dan te piya engkey se kemeresayan su atag dut te kebperetiyaya ran kediey. Ugaid ne embiya ruen etew ne ed-engked se eduma kediey, ne warà iya kegkehalew ku kandin.”

Hibruhanen 11:1

Na, embiya duen tidtu ne sarig tew te Eleteala, ne netuenan tew iya se egketelimà tew ke meupiya ne ebpenerengen tew. Su egenat te sarig tew ne netuenan tew en rema se benar ini se keupiya rin misan kenà ta egkekita.

1 Pedro 1:5

Ne ini se impegadir din ne kenitew en. Ne sabap te kedsarig ta te Eleteala ne ebentayan ki rin egenat dut te gehem din su apey kenà ki ebpemekedsuwey gewii te edteharan tew ini se ibehey rin keyta ketà te mewri ne hewii.

2 Pedro 3:7

Ne kayi te Lalag te Eleteala rema ne ebpesebutan din te ebpeiseg pà ini se langit wey tanà ne egkekita ta guntaani taman te edereetan din ketà te akir din ne hewii, ugaid ne kenà wayig su apuy se idsuhù din ne ederaat. Ne edereetan din iya ke menge etew ne ed-ulaula te meraat, ne idtehaad din dà ke ebpekeuma ke hewii te kegkukum din kandan.

1 Juan 5:16

Ne embiya egkekita nu te nekesalà ini se ruma nu te ebperetiyaya ugaid ne ke rimahas te salà din ne kenà iyan ebpekeated kandin diyà te kemetayen ne warà edtemanan din, ne ipengeningeni nu te Eleteala sikandin te ebpesehad te Eleteala kandin ini se salà din. Ne ebpekevehey kandin te Eleteala te umur ne warà edtemanan din embiya ini se salà din ne kenà iyan ebpekeated kandin diyà te kemetayen ne warà edtemanan din. Ne embiya ruen etew ne nekesalà te iyan ebpekeated kandin diyà te kemetayen ne warà edtemanen din, ne kenà ku egkehiyen te ini ne etew ne ipengeningeni nu te Eleteala.

1 Juan 5:5

Uya, ke etew rà ne mibperetiyaya te si Hisus iya ke Anak te Eleteala se ebpeketalew dut te datù te pekaid ne ebayàbayà kayi te ampew te dunya, warà ruma.

Imperayag 17:11

Ne ini se mekeandek ne binatang ne biviyag dengan ne minatey en, ne arà ke ikewalu ne datù ne duma rut te pitu ne datù kayi te ini se pitu ne edetuan, ne ketà te egkeipus din ke ikeruwa ne kebpinuu rin te edatù ne edusaan ded dema sikandin diyà te apuy nerakà.

Imperayag 17:8

Ayan se binatang ne nekita nu ne biviyag dengan ne minatey en. Ugaid ne kenà dà egkeuhet ne egkeuyag ded ne egemew rut te liyang ne warà edtemanan te keralem din. Ne ketà te kegemew rin, ne id-antug diyà te apuy nerakà su edusaan. Ne dutun ne egkeinuinu ke langun ne menge etew te ampew te dunya ne warà mekesurat ke ngaran dan diyà te riberù ne ruen en insurat ne menge ngaran te langun ne ebehayan te umur ne warà edtemanan din te warà pà limbaha ke kelibutan. Uya igkeinuinu ran su biviyag dengan ayan se binatang, ne minatey en, ugaid ne egkeuyag ded maa.