Hibruhanen 10:24 - Ke meupiya ne tudtul mekeatag ki Hisu Kristu

²⁴ Ebpevegbeg-etey kiyu te ebpekita te limù te menge ruma tew, ne ebpetebtevangey kiyu te ed-ulaula te meupiya.

Hibruhanen 10:24 ပူးပေါင်းရင်းမြစ်များ

Nenged-ulaula 11:29

Ne netahù te itungan dut te menge edumdumaan ni Hisus te ebehey ran te tavang diyà te menge suled dan te ebperetiyaya ki Hisus diyà te inged ne Hudiya te endei rà taman se egkegaga te uman seveka.

Ruma 11:4

Ugaid ne iyan intavak te Eleteala kandin te, “Kenà sikuna rà su ruen pà pitu ne ngivu ne menge etew ne kevuwaran ni Israyil ne warà mebpengarap ki Baal, ke kenà tidtu ne eleteala.”

Ruma 12:15

Embiya ruen duma tew ne egkehalew, ne eduma ki rema rut te igkehalew ran. Ne embiya ruen ruma tew ne egkemutuwan, ne eduma ki te kemutu ran.

1 Kurintu 10:33

Iringi niyu ke ed-ul-ulaan ku su layun ku ebpemengaa ke ralan te kegketevangi ku te langun ne menge etew. Su kenà ku iyan ebpegitungen se kedì dà ne keupianan, ugaid ne ke keupianan dut te langun ne menge etew. Su iyan ku ked-ulaula kayi su apey ku egkepeneheewit sikandan te kebperetiyaya ki Hisus ne ebpekeliyu ran dut te keberedusaan dan.

1 Kurintu 9:22

Ne embiya riyan a te menge etew ne meluvey pà se kebperetiyaya ran ki Hisus, ne kenà ku ed-ul-ulaan te iyan dan pegitungan ne salà. Iyan ku ked-ul-ulaa te iring ketà su apey ku egketevangi sikandan te ebpeiseg dut te kebperetiyaya ran. Tembù be kayi te kebpemesabut ku te Meupiya ne Tudtul dut te langun ne menge etew, ne ebpemengaan ku ke ralan te kebpeneheewit ku kandan te kebperetiyaya ki Hisus.

2 Kurintu 8:8

Kenà ku suhù ini keniyu, ugaid ne ebpeketuenan ku rà keniyu te rekelà dema se kiyug dut te ruma ne mibperetiyaya te kebpeketavang dan te ruma ran su apey ku egkekita embiya benar se sarig niyu te Eleteala.

2 Kurintu 9:2

Su netuenan ku ne rekelà se kiyug niyu te kedtavang. Tembù impereyùdeyù ku sikiyu riyà te menge mibperetiyaya te Mesidunya se egkahi te, “Ke menge suled tew riyà te inged ne Gerisya ne egenat dà dut te neuna ne rahun ne netegeges en ke hinawa ran te ebehey.” Guna su nerineg dan ke nepenudtul kandan atag keniyu ne mid-iseg ke kiyug dan te kedtavang dema.

Gelasiya 5:13

Menge suled ku, mibpemilì kew te Eleteala su apey kew ebpekeliyu rut te keduma niyu te penduan ni Moises. Ne misan nekeliyu kew en ketà, ne kenà niyu iyan idtahù te hinawa te egkepakey ne eduma kew rut te misan engkey ne egkiyuhan niyu. Iyan pà mentag se iyan niyu ipeiseg ke kebpetebtevangey niyu su sabap dut te kebpelimlimuey niyu.

Gelasiya 5:22

Melemu tew rema ne egkekilala ke ulaula te etew ne egkepeneheewit dut te Kedesenan ne Ebpetuntul te Menusiyà. Su ke etew ne egkepeneheewit te Kedesenan ne Ebpetuntul te Menusiyà ne melimù te ruma rin, mehalew sikandin, melintad se hinawa rin, metigker te ruma rin, metiyakapen te ruma rin, metulanged te ruma rin, egkeserihan te ruma ne etew,

Gelasiya 5:6

Su embiya egkeseveka ki ki Hisu Kristu, ne kenà ke kebpeetus ta etawa ke kenà ta kebpeetus se dalan ne ebmetidtu key riyà te etuvangan te Eleteala. Ugaid ne iyan kiyug te Eleteala ne ibpekita ta te benar se kedsarig tew ibpepevayà te kebpelimlimuey.

Gelasiya 6:1

Menge suled, embiya ruen duma niyu ne mibperetiyaya en ne egkekita niyu se ed-ulaula te meraat, ne sikiyu se nepeneheewit dut te kegkamal te Kedesenan ne Ebpetuntul te Menusiyà ne tevangi niyu sikandin te ebpetuntey su apey mekeulì ded sikandin te ul-ulaan ne meupiya. Ugaid ne menanew se kebpetuntey niyu kandin, ne uram kew su kema ke sikiyu se ebpeked-ulaula te iring ketà.

Kulasi 3:16

Itahù niyu nevenar te hinawa ke langun ne nerineg niyu ne impenurù ni Hisus apey niyu egkeherami ke engkey se keupiya rin, ne ini se nehuruwan niyu ketà ne ipenurù niyu wey ibpesabut niyu rut te menge ruma niyu. Pemeyveyuka niyu ke keupiya te Eleteala kayi te iringà niyu apey kew ebpeketavang te ruma ne etew, ne peselamat kew ve te Eleteala kayi te iringà niyu egenat dut te dekelà ne hinawa niyu.

1 Tiselunika 1:3

Su uman key ebpengeningeni mekeatag keniyu diyà te Amey tew ne egketenuran dey ke meupiya ne ed-ul-ulaan niyu su tuus te mibperetiyaya kew iya ki Hisu Kristu. Ne egketenuran dey rema ke dekelà ne limù niyu kandin ne egkekita te meilut se gelevek niyu kandin. Ne kenà dey egkelipatan ke kedtigker niyu te keresayan su dekelà ne ebpenerengen niyu ne edlived si Hisu Kristu ke Kerenan tew kayi te ampew te dunya.

1 Tiselunika 5:11

Na geina te ini se edtaharan ta, ne beg-eta niyu ke hinawa dut te menge ruma niyu wey petebtevangey kew.

2 Tiselunika 3:9

Ne kenà te warà kevenar dey te ebuyù keniyu. Su iyan warà dey kebuyù te igkeuyag dey riyà te keniyu su apey kenà arà se ed-iringan niyu, ugaid ne arà se helevek dey se ed-iringan niyu.

1 Timoteo 6:18

Kehiyi nu ke menge kewasa ne med-ulaula ran te meupiya wey medtavang dan dut te menge ruma ran, su igkesuat te Eleteala ne ebpekeumun ded sikandan dut te imbehey rin kandan.

Tito 2:4

su apey imbe ini se egehuruwan dut te menge menguwed pà ne memeritan te kedlimù te esawa ran wey menge anak dan.

Tito 3:8

Ini ve iya, Tito, se langun ne menge lalag ku ne benar. Kiyug ku ne idtahamtaham nu ini ibpenurù su apey ke menge etew ne mibperetiyaya te Eleteala ne egkeinesa ne ebpegelep te ulaula ne meupiya, su keupianan ini wey berepantag dema te langun dan.

Hibruhanen 13:1

Na sikiyu ke ebpenusuled te kineperetiyaya ne iyan niyu ibpeiseg ne ke kebpelimlimuey niyu.

Hibruhanen 13:3

Ne kenà niyu lipati se kedtavang niyu te ruma niyu ne riyà te bilengguan su iyan niyu kebpegitunga ne sikiyu red dema arà se nevilanggù. Ne tevangi niyu red dema ke menge ruma niyu ne egkerasey iring te sikiyu red ke egeram ketà.

Hibruhanen 3:13

Ugaid ne taman te ruen pà gewii tew te keduma te Lalag te Eleteala ne tevengaani niyu te ebpeiseg te peretiyaya niyu su apey kenà ebmeresen te ulu niyu ne kenà kew eduma te Eleteala su mid-ekalan niyu sikandin dut te salà niyu.

1 Juan 3:18

Menge anak ku, ini se ralan te kebpekita ta te limù ta kayi te menge ruma ta ne kenà kayi rà te lalag ne egemew te bèbà ta, ugaid ne kayi te kedtavang ta kandan ne egenat te limù ta.