Hibruhanen 1:4 - Ke meupiya ne tudtul mekeatag ki Hisu Kristu

⁴ Ketà be ne ke Anak te Eleteala ne iyan pà mepurù dut te langun ne suluhuen. Ne misan ke ngaran ne imbehey te Eleteala kandin ne mepurù pà ini dut te ngaran ne imbehey rin dut te menge suluhuen din.

Hibruhanen 1:4 ပူးပေါင်းရင်းမြစ်များ

Ipisu 1:21

Ne ketà be ne riyà si Hisu Kristu te langit ne ebayàbayà dut te langun ne ruen gehem din te ebayàbayà. Su warà mepurù pà dut te sikandin diyà te langun ne mekegehem ne edatù kayi te ampew te dunya wey riyà te langit, misan ke egkekita te etew wey ke kenà ta ruma, misan te guntaani en wey ketà te kegkesembii kayi te dunya.

Kulasi 1:18

Sikandin ke ulu rut te langun tew ne mibperetiyaya, ne sikitew ne iring dut te lawa rin. Su sikandin ke Anak te Eleteala ne ebpuunan dut te behu ne umur ta su nevanew rin ded maa te minatey, ketà ne langun ne mibperetiyaya kandin ne egkevehayan te umur ne warà edtemanan din. Na kayi ve imbe ne netuenan tew te sikandin ke mepurù te langun taman.

Kulasi 2:10

Tembù be ke gehem ni Hisu Kristu se muna pà dut te langun ne mekegegehem ne ebayàbayà, ne sikandin se mepurù dut te langun ne mekegegehem. Ne sikiyu ne mibperetiyaya kandin, ne warà kurang niyu su ruen keykew dut te langun ne riyà te kandin sabap dut te mibpekidseveka kew kandin.

2 Tiselunika 1:7

Su ebpekeuma ke hewii ne ibpeengked te Eleteala ke keresayan ne egkeheram ta guntaani, su ebpeimelayen ki ketà te kedlived ni Hisus kayi ne edumaan dut te mekegehem ne suluhuen din.

Hibruhanen 1:9

Su iyan nu kiyug ke metidtu ne ulaula, ne igkeepesi nu ke ulaula ne meraat. Tembù be siaken ke Eleteala nu se mibpemilì kenikew, ne imbehey ku keykew ke kehelawan su mid-edatan ku sikew muna pà dut te menge ruma nu.”

Hibruhanen 12:17

Ne neiseg-iseg dutun ne netuenan ta te nepegpegitung din se ebpekelived ded diyà te kandin ke kewaris te pengenayan su apey red dema egkepenaub sikandin te Eleteala. Ugaid ne kenà en egkepakey ne ebpekelived pà ini se kewaris ne insambì din su arà se ned-ulaula rin ne kenà en egkesembian, misan pà te midsinehew sikandin te kinepekedsendit din.

Hibruhanen 2:9

Ugaid ne iyan tew netuenan ne ke kinedatù en ni Hisus, misan mehaan dà ne hewii se kinepeembavà kandin rut te menge suluhuen te Eleteala. Su egenat dut te dekelà ne tavang te Eleteala dut te sikitew ne menge etew, ne mibpebaluy si Hisus ne etew ne mibpebpatey su imbeliwas din te langun tew ne menge etew. Na guntaani ne sikandin en se egkereyù wey egkeedatan su ke kinekerasey rin te kebpatey rin atag dut te langun ne menge etew.

1 Pedro 3:22

Ne guntaani ne diyà si Hisus mid-ulì te langit ne ebpinuu diyà te rapit te egkekewanan te Eleteala. Ne langun ne suluhuen te Eleteala wey langun ne ruma pà ne ruen gehem dan ketà ne sikandin se ebayàbayà kandan.