Gelasiya 4:12 - Ke meupiya ne tudtul mekeatag ki Hisu Kristu

¹² Menge suled ku, iyan ku ebpemuyuen ne ed-iring kew te ulaula ku. Su misan Hudiyanen a, ne egenat te kedsarig ku ki Hisus ne warà ad meduma rut te keytew ne penduan ne intahak ki Moises, su nevaluy a ne iring keniyu te kenà menge Hudiyanen ne kenà eduma rut te penduan te menge Hudiyanen. Kenà ku egkelipatan ke meupiya ne mid-ulaula niyu kedì dut te riyan a te keniyu.

Gelasiya 4:12 ပူးပေါင်းရင်းမြစ်များ

Nenged-ulaula 21:21

Ne nerineg dan arà se tudtul ne ruen kun penurù nu te menge Hudiyanen ne ed-ubpà riyà te kenà Hudiyanen se engkeri ran te edtuman ke penduan ne intetahak ni Moises. Su impenurù nu kun te kenà dan en ebpeetusan ke menge anak dan.

2 Kurintu 2:5

Ne arà se etew ne nekevaal te salà keniyan, ne kenà siak se nesekitan din su sikiyu red ke menge etew ne mibperetiyaya keniyan te Kurintu. Ne embiya kenà langun ne sikiyu ne ruen iyan keniyan te keniyu. Ugaid ne kenà ku en ed-umanan ini se lalag ku ne ibenar kandin.

2 Kurintu 6:11

Ne sikiyu ke menge suled dey ne an te inged ne Kurintu, warà in-eles dey keniyu ne neketahù te itungan dey su rekelà dey nevenar sikiyu te hinawa.

2 Kurintu 6:13

Ini ve se egkehiyen ku keniyu ne iring kew en te tuney ne menge anak ku. Ne iyan be dema meupiya ne ibpekita niyu ke kegkelimù niyu kenami.

Gelasiya 2:14

Ne wey ku metueni se kenà dan edumaan ke benar ne penurù te Meupiya ne Tudtul ne migkehiyan ku si Pedro diyà te etuvangan te langun ne menge etew te, “Misan tidtu ka ne Hudiyanen ne iring ka te kenà, su mid-engked ka te betasan te Hudiyanen te kenà ebpekidtuhen te egkaan te menge etew ne kenà Hudiyanen. Ne embiya Hudiyanen ka se kenà eduma te penduan tew te menge Hudiyanen, ne meambe ke ebpehesen nu ke kenà menge Hudiyanen te eduma ketà?”

Gelasiya 4:11

Embiya ini se ed-ul-ulaan niyu ne egkeuru a nevenar, su iring te warà atag din ke langun ne impenurù ku keniyu.

Gelasiya 4:13

Ne egketenuran niyu ke aney en ne kinependiyà ku ne ruen sakit ku ketà, tembù be impenuru ku ke Meupiya ne Tudtul keniyu.

Gelasiya 6:14

Ugaid ne siak mulà, ne iyan ku rà igkesuati ne edeyuen ku ne ke Kerenan tew si Hisu Kristu. Su sabap dut te kinepatey rin diyà te pinebelavag ne kayu su atag te salà tew, ne neekaran ad dut te nekeiket kedì ne kiyug te kememenusiyai kayi te ampew te dunya, su warà en atag din kayi te kedì.

Gelasiya 6:18

Menge suled, iyan ku ebpengeningeniyen ne ebpeneuven kew ni Hisu Kristu ke Kerenan tew. Ini rà taman. Pablo