3 Juan 1:11 - Ke meupiya ne tudtul mekeatag ki Hisu Kristu

¹¹ Na suled ku ne rekelà te hinawa ku, kenà nu dumai ke menge meraat ne ulaula iring ketà, ugaid ne iyan nu dumai ne endei ke ulaula ne meupiya. Su ke etew ne ed-ulaula te iyan ebpekesuhat te hinawa te Eleteala, ne sikandin ke mibpesakup te Eleteala. Ugaid ke etew ne edlaus pà te ini ne ed-ul-ulaan ne meraatey, ne warà diyà te hinawa rin ini se Eleteala.

3 Juan 1:11 ပူးပေါင်းရင်းမြစ်များ

Juan 10:27

Su ke menge etew ku ne timbang te bilibili ku,” ke si Hisus “ne ebpemineg dan kedì su egkekilala ren ma ke suwara ku. Egkekilala ku sikandan ne eduma ran kedì.

Juan 12:26

Su ke etew ne egkiyug ne eduma te penurù ku,” ke si Hisus, “ne iyan din ibpeuna te hinawa rin te ked-iniyug din te kandin ne kiyug su apey mekeruma kedì, ne piya endei a ne ketà dema ke edsugsuhuen ku. Ne ke etew ne edtuman te penurù ku, ne egkereyù te Amey ku ne Eleteala.”

Juan 3:20

Ne misan engkey en ne etew ne ed-ulaula te meraat ne kenà egkesuat te merayag wey kenà dan ed-uvey te merayag su apey kenà egkepayahan ke ulaula ran ne meraat.

1 Kurintu 11:1

Engketà be, ne iringi niyu ke ulaula ku iring dut te kineiringi ku te mid-ulaula ni Hisus.

1 Kurintu 4:16

Ne geina te iring te siaken ke amey niyu, ne ebuyuen ku te iyan a iringi nikiyu.

Ipisu 5:1

Ne geina ve te sikiyu ne menge anak kew en te Eleteala ne igkelimù din, ne iringi niyu ke ulaula te Eleteala su apey ke ulaula niyu ne iring kandin.

Pilipus 3:17

Menge suled ku, iyan niyu iringi ne ulaula ku. Impekita rey keniyu ke nekesuhat ne ulaula, tembù be sipata niyu ke menge etew ne eduma en kayi.

1 Tiselunika 1:6

Ne sikami se mid-iringan niyu wey ke Kerenan tew ne si Hisu Kristu. Ne miduma kew rut te insuhù ne Lalag te Eleteala misan mibpekesekitan kew, su nengehalew kew egenat dut te Kedesenan ne Ebpetuntul te Menusiyà.

1 Tiselunika 2:14

Ne ini se netemanan niyu, menge suled, ne nekeiring dut te netemanan te menge etew te Eleteala ne mibperetiyaya ki Hisu Kristu diyà te menge inged te Hudiya. Su mibpekesekitan kew rut te menge ruma niyu te inged iring dut te kebpekesekiti kandan dut te menge ruma ran ne Hudiyanen ketà te inged

2 Timoteo 3:10

Ugaid ne sikuna, Timoteo, netuenan nu en te kenà a iring ketà su netuenan nu en ke engkey ke impenurù ku wey ke ed-ul-ulaan ku wey engkey se mibpegelepan ku te egelevek. Netuenan nu en ke kedsarig ku te Eleteala, ne netuenan nu rema ke kebpenginum ku te meadsil wey ke kinepekita ku te limù dut te ruma ne menge etew wey ke kedtigker ku te merasey.

Hibruhanen 6:12

Tembù be kenà kew ebpepepehul te keduma niyu te Eleteala, ugaid ne iringi niyu ke ulaula te menge etew ne mevaher se sarig dan te kedtehad dan dut te impasad te Eleteala kandan.

1 Pedro 3:11

Ne med-engked sikandin dut te meraat ne ulaula ne iyan din ed-ul-ulaan ke meupiya, ne layun din ebpemengaa te meupiya ne kederepità dut te menge ruma rin.

1 Pedro 3:13

Na embiya meilut se kegeweri ta rut te meupiya ne ed-ul-ulaan, ne engkey se ebpemekaid keyta!

1 Juan 2:29

Netuenan ta te metidtu si Hisu Kristu, dutun ne netuenan ta rema te piya engkey ne etew ne metidtu se ed-ul-ulaan din ne nevaluy en sikandin ne anak te Eleteala.

1 Juan 3:10

Tembù be egketuusan ke menge etew ne midubpù te Amey ran ne Eleteala wey ke menge etew ne anak ded ni Setanas. Su ke etew ne kenà ed-ulaula te metidtu wey warà limù din te menge ruma rin, ne kenà sikandin ke anak te Eleteala.

1 Juan 4:1

Menge suled ku ne igkelimù ku, kenà kew peretiyaya dut te langun ne egkahi ne impekahi ran kun te Kedesenan ne Ebpetuntul te Menusiyà. Ugaid ne perisaan niyu pà ke ebpenurù dan apey niyu metueni ke riyà be ebpuun ini te Eleteala etawa kenà. Su merakel se midlepew kayi te ampew te dunya ne uvag kun te ebpelambas sikandan te Lalag te Eleteala.