2 Tiselunika 3:1 - Ke meupiya ne tudtul mekeatag ki Hisu Kristu

¹ Na, menge suled, duen pà ebuyuen ku keniyu. Iyan ku ebuyuen ne ipengeningeni niyu te Eleteala mekeatag te sikami su apey ebpekeeneb en te mehaan ini se Lalag te Eleteala ne ibpemesabut dey, su apey ke menge etew ne ebpekerineg kayi ne mehalew se kedtelimà dan iring keniyu.

2 Tiselunika 3:1 ပူးပေါင်းရင်းမြစ်များ

Mateo 9:38

Pemuyù kew riyà te kemuney te pareyanan te medsuhù pà sikandin te ruma ne ed-ehani diyà te pareyanan din.”

Lucas 10:2

Ne migkehiyan din sikandan te, “Medmarkel se menge etew ne warà pà meketelimà dut te Meupiya ne Tudtul mekeatag te Eleteala. Iring sikandan te melutuen ne pareyanan. Meluag nevenar ini se pareyanan, ugaid ne warà utew ruma rut te ebpengehani. Pemuyù kew riyà te Eleteala ke kemuney rut te pareyanan te medsuhù pà sikandin te ruma ne ed-ehani diyà te pareyanan din.

Nenged-ulaula 12:24

Ugaid ne mid-iseg ke kebpesabut dut te Lalag te Eleteala, ne mibmerakel ke menge etew ne mibperetiyaya ketà.

Nenged-ulaula 19:20

Ne ketà te arà ne ned-ulaula, ne mid-iseg ke kebpesabut dut te lalag te Kerenan wey neumanan pà ke menge mibperetiyaya.

Nenged-ulaula 6:7

Ketà ne ed-iseg-iseg se kebpekeeneb dut te ibpesabut dan ne Lalag te Eleteala. Ne ed-iseg-iseg dema se kerakel dut te mibperetiyaya ki Hisus kayi te Hirusalim, ne merakel dema se menge terebpelengesa ne mibperetiyaya ki Hisus.

Ruma 15:30

Na ebuyuen ku keniyu ne menge suled ku, te ipengeningeni a nikiyu te mevaher te Eleteala. Ne netuenan ku ne ed-ul-ulaan niyu ini su atag dut te kebpekidseveka tew ki Hisu Kristu ke Kerenan tew wey atag dut te kebpelimlimuey tew ne imbehey rut te Kedesenan ne Ebpetuntul te Menusiyà.

1 Kurintu 16:9

Su ruen pà merakel ne etew kayi ne egkiyug ne ebpemineg te kebpenurù ku, ne ibpemesabut ku kandan misan merakel se egkunterà te Eleteala kayi.

2 Kurintu 1:11

Ne egketevangan key niyu te ibpepevayà te kebpengeningeni niyu kenami. Su embiya merakel niyu se ebpengeningeni kenami ne ibehey te Eleteala keniyu ke ebuyuen niyu, ketà ne merakel se ebpekereyù te Eleteala mekeatag te tavang din kenami.

2 Kurintu 13:11

Na menge suled ku, ini se egkehiyen ku kayi te ketepusan te surat ku. Ibpeiseg niyu pà ke meupiya ne ulaula niyu, ne pemineha niyu ke insuhù ku kayi. Ne medseveka kew te hinawa niyu su apey kew mebmelintad. Su embiya ini se ed-ul-ulaan niyu ne ke Eleteala ne egkelimù keniyu wey ebehey te kebmelintad te hinawa niyu se ebpekiduma keniyu.

Kulasi 4:3

Kenà kew rema lipat se ebpengeningeni kenami su apey key ebehayi te Eleteala te ralan te kebpesabut dut te tudtul ne warà pà mepayahi dengan mekeatag ki Hisu Kristu. Su tembù be imbe ini a te bilengguan su atag te kebpemesabut ku dut te tudtul.

1 Tiselunika 1:5

Netuenan dey ini su ke kebpemesabut dey dut te Meupiya ne Tudtul riyà te keniyu ne kenà kayi te lalag dey rà, ugaid ne midumaan dut te gehem te Kedesenan ne Ebpetuntul te Menusiyà. Ne neheram niyu ini, tembù be mibperetiyaya kew rut te kebpemesabut dey. Ne nekita niyu rema ke meupiya ne betasan dey te riyà key med-ubpà te keniyu su langun ne mid-ulaula rey ne ke keupianan niyu.

1 Tiselunika 1:8

Su ibpepevayà te kebperetiyaya niyu ne nekeeneb en ke Lalag te Eleteala diyà te menge etew te inged ne Mesidunya wey Gerisiya. Ne kenà riyà dà te kandan su medmerakel pà ne menge inged se nekerineg dut te kebperetiyaya niyu te Eleteala. Tembù be misan kenà dey en ibpenudtul, ne netuenan dan en.

1 Tiselunika 2:1

Menge suled, netuenan niyu te kinepengkeniyan dey te keniyu ne neketavang keniyu su nevaluy ne keupianan niyu.

1 Tiselunika 2:13

Ne egkehiyen ku maa te layun dey ebpeselemati te Eleteala te midtelimà kew te Lalag din. Su ketà te kebpesabut ku kayi riyà te keniyu ne warà niyu kehiya te lalag ini ne mibèbeelan dà te etew, ugaid ne mibpemineg kew ne midtelimà kew te ini ne Lalag iya te Eleteala. Su ini se Lalag din, ne ruen gehem din te edtavang te menge mibperetiyaya su apey ran ed-ul-ulaa ke engkey se metidtu.

1 Tiselunika 4:1

Na menge suled, ketà te keniyan key pà te keniyu ne impenurù dey en keniyu ke engkey se ulaula te ked-ubpà ne ebpekesuhat te hinawa te Eleteala, ne ini ne midumaan niyu en. Ne guntaani ne ebuyuen dey te umani niyu pà ke meupiya ne ulaula niyu su ini se migkahi keyta rut te Kerenan tew ne si Hisu Kristu.

1 Tiselunika 5:25

Menge suled, pengeningeni kew rema te Eleteala mekeatag kenami.

2 Timoteo 2:9

Tembù be egkerasey a guntaan su nevilanggù a iring te medmeraat ne etew. Ugaid ne misan mibakù a te sengkalì kayi, ne kenà dan egkevangen ke kebpemenudtul te Lalag te Eleteala.