2 Tiselunika 1:12 - Ke meupiya ne tudtul mekeatag ki Hisu Kristu

¹² Iyan dey kebpengeningeni te iring ketà su apey si Hisu Kristu ke Kerenan tew se edeyuen su ke meupiya ne ed-ul-ulaan niyu, abpeg te sikiyu ne igkeamung kandin te ed-edatan sabap te sikiyu ne sakup din. Egked-ulaula ini su atag dut te penaub keyta ne kenà egkerepengan ne impekita keyta dut te Eleteala tew wey ke Kerenan tew ne si Hisu Kristu.

2 Tiselunika 1:12 ပူးပေါင်းရင်းမြစ်များ

Juan 17:10

Su langun kayi ne menge etew ne kediey ne keykew red, ne ke langun ne menge etew ne keykew ne kediey red dema. Ne kayi te kandan se puunan te egkereyù a.

Ruma 1:7

Tembù be edsuratan ku sikiyu langun diyà te inged ne Ruma ne ingkelimù te Eleteala ne mibpemilì din ne kandin ne menge etew. Kiyug ku ne egkepenaub kew te Eleteala ke Amey tew wey si Hisu Kristu ke Kerenan tew, ne ebmelinew se hinawa niyu.

1 Kurintu 1:4

Layun a ebpeselamat te Eleteala atag dut te keupiyanan ne ibehey rin keniyu atag dut te kebpekidseveka te hinawa niyu ki Hisu Kristu egenat te kebperetiyaya niyu kandin.

2 Kurintu 13:4

Su misan duen etew ne egkahi te warà gehem ni Hisu Kristu rut te kineimetayi kandin diyà te pinebelavag ne kayu, ugaid ne ke kegkevanew rin wey ke kegkevehayi rin te behu ne umur ne tuus te ke gehem te Eleteala ne riyan en te kandin. Engketà ded dema ke sikami ne mibpekidseveka kandin, su iring te warà gaga rey. Ugaid ne embiya ruen ebpedselaan ku riyà te keniyu, ne egkekita te ruen gaga ku iring dut te gehem ni Hisu Kristu ne egenat te Eleteala.

2 Kurintu 8:9

Netuenan niyu te rekelà ke tavang ni Hisu Kristu ke Kerenan tew su ketà te ked-ubpà din diyà te langit ne sikandin ke kemuney te langun taman, ugaid ne mid-awà sikandin ketà su mibpengkayi te ampew te dunya ne mibpevaluy sikandin ne etew su atag dut te limù din keytew. Ned-ulaula arà su apey ruen dalan te ebpekeamung ki kandin te egkemuney dut te keupianan diyà te langit.

Pilipus 3:9

wey apey a ebpekidseveka kandin. Su kenà ke keduma ku rut te penduan ne iyan kedtengteng te Eleteala kediey ne metidtu, ugaid ne ke kedsarig ku rà ki Hisu Kristu. Su ibpetidtu a te Eleteala su sabap dut te kedsarig ku ki Hisu Kristu.

2 Tiselunika 1:10

Ini ne egked-ulaula ketà te kedlived ni Hisu Kristu kayi te ampew te dunya, su arà ne hewii ne langun ne menge mibperetiyaya ki Hisus ne edeyù wey ed-adat kandin. Ne ebpekeamung kew su midumaan niyu ke impenurù dey.

Tito 2:11

Su impekita en kenitew te Eleteala ke tavang din su apey langun te menge etew ne ebpekeliyu dut te kedusa te salà dan.

1 Pedro 4:14

Ne embiya edsudian ki su sabap dut te keduma ta ki Hisu Kristu ne tuus arà te kayi en te keyta ke Kedesenan ne Ebpetuntul te Menusiyà ne iyan ke raman te Eleteala, tembù be egkehalew ki.

Imperayag 1:4

Siak si Juan ke midsurat kayi. Ini se insurat ku ne riyà te langun niyu ne menge mibperetiyaya ne diyà te pitu ne menge inged te pruvinsiya ne Asiya. Egkiyuhan ku ne ebpeneuven kew rut te Eleteala wey ke Kedesenan ne Ebpetuntul te Menusiyà wey si Hisu Kristu. Egkiyuhan ku rema ne ebmelintad ke hinawa niyu mekeatag kandan. Ini se Eleteala ne daan en sikandin te warà pà limbaha ke misan engkey en, ne kemulu pà sikandin guntaan wey sikandin ded lavew taman te taman. Ne ke Kedesenan ne Ebpetuntul te Menusiyà ne pitu se ralan te kebpekita rin dut te gehem din ne diyà ed-ubpà te etuvangan te ebpinuuwan te kedatù te Eleteala. Ne si Hisu Kristu ke egkeserihan ne titihus mekeatag te Eleteala. Sikandin ke neuna ne mibanew te Eleteala dut te kebpatey rin, ne sikandin rema ke benar ne datù ne ebayàbayà dut te langun ne ruen kebayàbayà din kayi te ampew te dunya. Dekelà ke limù din keytew, ne ketà te imbùbù din ke lengesa rin kenitew dut te kinepatey rin ne sikandin ke mibpeliyu keytew rut te kedusa te Eleteala te salà tew.