2 Timoteo 4:8 - Ke meupiya ne tudtul mekeatag ki Hisu Kristu

⁸ Engketà be ne ruen arà impenehana te Kerenan tew ne idlalew rin kedì su metidtu se keduma ku kandin. Ini se ibehey rin ketà te akir din ne hewii te kegkukum din te menge etew, ne sikandin dà se egkukum te metidtu nevenar. Ne kenà siaken dà se edlelawan su langun te etew ne egkelimù kandin wey ebpenareng te kedlived din ne ruen dema kandan.

2 Timoteo 4:8 ပူးပေါင်းရင်းမြစ်များ

Mateo 24:36

“Ugaid ne ini se idtarem ku keniyu,” ke si Hisus, “warà netau te hewii etawa endei egketahù ke andew ke kedlived kayi ke Impeanak te Menusiyà su ke Amey ku rà ne Eleteala. Misan ke suluhuen te Eleteala diyà te langit wey misan dema siaken ke Anak te Eleteala ne warà netau ke keenu se edlived din.

Mateo 7:22

Su embiya egkeuma arà se hewii te kegkukum te Eleteala ne merakel se ebpeyiruwiru kedì se egkahi te, ‘Is Kerenan, Kerenan, mibpesabut key te Lalag te Eleteala impepevayà te gehem te ngaran nu, ne mibpenegseg dey ke vusew ne ed-amung-amung te menge etew, ne merakel pà se mekegeyip ne neveelan dey!’

Lucas 10:12

Ugaid ne idtarem ku keniyu,” ke si Hisus, “muna pà ke kedusai te Eleteala kandan ketà te hewii ne kedtimbang din te menusiyà dut te kinerusa rin te menge mehinged riyà te Sudum.”

Ruma 2:5

Ugaid ne sikiyu, ne warà kew mebpedsendit su meresen se ulu niyu. Tembù be ed-iseg pà se kevahat din te idusa keykew te Eleteala ketà te hewii ne ibpayag din ke kegkeepes din, ne arà ded ne hewii ne egketuenan te kegkukum din ne metidtu.

Ruma 8:23

Ne kenà arà dà se nelimbag din se egkerasey su misan sikitew ne neketelimà en dut te Kedesenan ne Ebpetuntul te Menusiyà su ini se neuna ne ibehey rin dut te menge mibperetiyaya ne egkerasey ki red dema. Su ebpenerengen tew ke kebpekeuma dut te arà ne hewii ne ed-imasaren te Eleteala ke ked-anak-anak din kenitew ne ruen behu ne lawa tew ne warè en kebpekepevayà din te sakit wey kepepatey.

1 Kurintu 2:9

Su ruen impesurat ne Lalag te Eleteala ne egkahi te, “Duen impenehana te Eleteala rut te menge etew ne egkelimù kandin. Ini se impenehana rin, ne warà senge etew rà ne nekekita kayi, ne warà nekerineg, ne warà nekepegitung ketà.”

1 Kurintu 3:13

Ugaid ne ketà te hewii ne kedlived si Hisus ne ibpayag din ke langun ne helevek te menge etew ke meupiya ve etawa meraat. Su arà se pengawid ne egeraman din ibpepevayà te apuy su apey egkekita rin embiya mevaher etawa kenà.

1 Kurintu 9:25

Ne ke menge etew ne ed-amung dut te egkuya te ebpelelahuy ne megelevek te mevaher te kegkelumbad te lawa ran. Iyan dan ked-ulaula kayi su wey ran mevehayi te lalew ne mibeelan dà te menge rawun su ibpeseluluy ketà te etew ne ebpeketavan misan melemu ne egkeleyùlù. Ugaid ne sikitew ne mibperetiyaya ki Hisus, ne edsemikar ki te eduma te Eleteala su apey tew egkekuwa arà se idlalew rin ne kenà egkeawà taman te taman.

2 Kurintu 5:2

Taman te kayi kiyu pà te ampew te dunya ne ruen kemerehenan tew, ne rekelà perem te hinawa tew te ibehey te Eleteala arà se behu ne lawa ne riyà ebpuun te lesang te langit.

Pilipus 3:11

su egkepenareng ku te embiya ebpatey a ne ebenawen e red te Eleteala su apey a ebpekeubpà diyà te kandin.

Kulasi 1:5

Ini se ed-ul-ulaan niyu su nevag-et ke hinawa niyu te ruen en intail te Eleteala keniyu riyà te langit. Ne ini se mibpenareng niyu igenat dà dut te pehaney en ne nerineg niyu ke benar mekeatag ki Hisu Kristu ne ini se Meupiya ne Tudtul.

1 Tiselunika 1:10

Ne ebpemenudtul dan dema mekeatag dut te kebpenareng niyu te kedlived te Anak din ne si Hisu Kristu ne egenat diyà te langit. Su si Hisus ini ke mibanew rin, ne sikandin ke ebpeliyu keyta su apey kenà kiyu edusaan te Eleteala ketà te hewii ne egkukumen din en ke kelibutan.

1 Tiselunika 5:4

Ugaid ne sikiyu, menge suled, ne warà kew en med-ubpà diyà te kerusireman iring dut te menge etew ne kenà ebperetiyaya ki Hisus. Tembù be ketà te ebpekeuma arà ne hewii ne kenà niyu en igketekawi iring dut te etew ne warà mebpenehana te kebpekeuma dut te tekawen.

2 Tiselunika 2:8

Na ketà te ed-awà en ke ed-eren kandin, ne edlepew en arà se etew ne nepenù te meraat. Ugaid ne embiya ebpekeuma en ke Kerenan tew ne si Hisus, ne edereetan din arà se etew dut te kebpekita rin te kepurù din, su ke hinawa rin se ibpeimatey rin.

1 Timoteo 6:19

Su embiya ini se ed-ul-ulaan dan, ne iring dut te edtahù dan te kekewesai ran diyà te langit ketà te akir din ne hewii su apey ran ebpeketelimà te umur ne warà edtemanan din.

2 Timoteo 1:10

Ne guntaani ne netuman en ke tavang din kenitew su impepengkayi rin en si Hisu Kristu ke ebpeliyu keytew. Ne ketà te nevanew sikandin dut te kinepatey rin ne kayi rin be iawà ke andek tew te kepepatey wey impesabut din kayi te Meupiya ne Tudtul te ruen umur ne warà edtemanan din.

2 Timoteo 1:12

Tembù be egkerasey ad ini te bilengguan. Ugaid ne kenà ku igkeyeyai su netuenan ku se Eleteala ma se edserihan ku. Ne netuenan ku rema se ebpekegaga sikandin ne edtuganur kedì te langun ne helevek ne insarig din kedì taman ketà te hewii ne kedlived din te egkukum kenitew.

2 Timoteo 2:5

Ne idsempità ta rema te etew ne egkuya te ebpelelahuy. Su misan sikandin pà se meabet ne ebpelelahuy, ne kenà sikandin egkevehayan dut te idlalew kandin ke warà din dumai ke pepatà kandin dut te mepurù din te kinerudsù dan.

2 Timoteo 4:1

Na Timoteo, tehaad te si Hisu Kristu se edlived kayi su ebayàbayà te langun wey egkukum dut te menge etew ne biviyag wey ke minatey en, ne ruen idsuhù ku kenikew diyà te etuvangan te Eleteala wey si Hisu Kristu.

Tito 2:13

Ini rà be se ed-ul-ulaan tew te kedtahad tew ketà te meupiya ne Hewii ne ebpenerengen tew ne egkekita ta ke ed-andlag ne raman din dut te kedlived te Eleteala ne mekegehem ne si Hisu Kristu ke ebpeliyu kenitew.

Hibruhanen 12:11

Ne embiya ebpekesekitan ki te Eleteala ne kenà tew igkesuati su igkereheni ta gewii te ebpekepevayà ki ketà. Ugaid ne ke egketemanan tew ne meupiya ne sabap dut te kinepekesakit din kenitew ne ebmetidtu ke menge ulaula tew ne rutun ne ebmelintad ke hinawa tew.

Hibruhanen 9:28

Ne iring ketà ne keseveka rà imbehey ni Hisus ke hinawa rin te ebpebpatey su apey ke salà dut te langun ne menge etew ne egkeawà. Ne edlived pà maa kayi te ampew te dunya, ugaid ne kenà maa edsaup ebpebpatey te salà tew. Inemulà te ed-engayen din ke sikitew ne edtahad kandin.

Santiago 1:12

Na ke etew ne misan ebpekeanuyanuy te kemerehenan ne eduma red lavew te Eleteala, ne sikandin ne ruen kehelawan din. Su netuenan din se egkeipus ke kedtigker din te kemerehenan, ne ebpeketelimà te lalew rin ne arà se umur ne warà edtemanan din ne impasad dengan te Eleteala dut te langun ne egkelimù kandin.

1 Pedro 1:4

Ne elin dema egkepenareng tew ini se impegadir te Eleteala ne intail din keytew riyà te langit. Ne ini se keupiya ran ne kenà egkesembian su riyà ne kenà egkereetan, ne kenà egkeawà.

1 Pedro 5:4

Su ketà te kedlived ni Hisu Kristu kayi, ne iyan mepurù ne tumetuganur, ne ebpekeamung ki dut te ed-andlag ne raman te kebpepurù kandin ne kenà egkurang ke raman din.

Imperayag 1:7

Na kelimùlimù ne pegitunga niyu ini. Ebpekeuma si Hisu Kristu ne edumaan dut te menge sehulapun. Egkekita sikandin dut te langun ne menusiyà abpeg dut te mid-imatey kandin. Ne ebpeninehew ketà ke langun ne menge etew kayi te ampew te dunya su egkeandek dan te kegkukuma rin kandan. Egketuman ini.

Imperayag 19:11

Neipus arà ne nekita ku ke langit ne nepuwasan ne ruen ketà meputì ne kudà. Ne iyan ngaran dut te mid-untud ketà ne si Kedserihan wey si Benar su ini se kegkukum din ne metidtu ne ini se ked-atu rin dut te menge kunterà din ne metidtu red dema.

Imperayag 2:10

Kenà kew meandek dut te keresayan ne mehaan en ne ebpekeuma keniyu. Ugaid ne pemineha niyu ini se egkehiyen ku su ruen keniyan te keniyu ne ebilengguen dut te datù te pekaid su ebpenggeraman din ke kebperetiyaya niyu, ne edresayen kew te mehaan iring te menge sepulù ne hewii. Ugaid ne kenà kew edlekà te kebperetiyaya niyu kediey misan ibpatey niyu pà su ruen lalew ne ibehey keniyu ne umur ne warà edtemanan din.

Imperayag 22:20

Na si Hisus ke mibperayag te langun ne insurat ku kayi ne migkahi te, “Uya, benar iya ne mehaan ad edlived!” Egketuman ini! Is, Hisus ne Kerenan ku, egkiyuhan ku ne ebpengkayi ke en!

Imperayag 4:10

ne edlumpeng dema ini se deruwa nepulù wey epat ne pekilukesen diyà te etuvangan dut te ebpinuu ne edatù se ebpengarap kandin arà se warà kemetayen din. Ne inrenà dan ke seluluy ran ne bulawan diyà te etuvangan te ebpinuuwan din se egkahi te,

Imperayag 4:4

Ruen deruwa nepulù wey epat ne ebpinuuwan ne nekelingut kayi te ebpinuuwan din ne ruen deruwa nepulù wey epat ne pekilukesen ne ebpinuu ketà. Mibevelegkas dan te meputì ne ruen inseluluy ran ne bulawan.