2 Timoteo 3:2 - Ke meupiya ne tudtul mekeatag ki Hisu Kristu

² Ruen menge etew ne ginawa ren dà se ebpegitungen dan, ed-umamin dan te kearen dan, dekarak dan wey mepereyù, meharang se kebpengahikahi ran ne kenà dan en iya ed-adat te menge lukes dan. Embiya ebehayan etawa edtevangan dan ne warà te hinawa ran, ne warè en iya te itungan dan se kebpegeleteala.

2 Timoteo 3:2 ပူးပေါင်းရင်းမြစ်များ

Mateo 15:6

ne ketà ne kenè en sikandin ebpeketavang dut te amey rin wey iney rin. Kayi ve te penurù niyu ini ne mid-iniyuhan niyu ke Lalag te Eleteala su iyan niyu ibpeiseg ke betasan ne intelau dut te keep-epuan niyu.

Lucas 12:15

Ne midlalag en si Hisus ketà te merakel ne etew te, “Uram kew wey inteng kew te ulaula niyu te warà kegkeeram-am niyu. Su ke tidtu ne puunan te kegkeuyag te etew ne kenà diyà te kearen ne egeweran din.”

Lucas 16:14

Duen ketà menge Peresiyu ne iyan den dà dekelà te hinawa ne kureta ran. Nerineg dan dà ini se migkahi ni Hisus ne mid-undaunda ran dà.

Lucas 6:35

Ugaid ne sikiyu, iyan ku igkahi keniyu ne limui niyu ke menge kunterà niyu ne upiani niyu ke ed-ul-ulaan niyu kandan. Embiya ebpeutang kew ne kenà niyu pegitunga te kebpevayad ne ketà ne rekelà se idlalew keniyu. Su embiya ini se ed-ul-ulaan niyu, ne egkekita kayi te keniyu te sikiyu ne menge anak en te Eleteala ke mepmepurù te langun. Su melimù ke Eleteala misan diyà te menge etew ne warà te hinawa ran ke tavang din wey ke menge etew ne meraat se ulaula ran.

Nenged-ulaula 5:36

Embiya egketenuran niyu te warà pà utew meuhet ne ruen senge etew ne midlepew ne ed-ingaranan ki Tewdas ne uvag te sikandin en ke egkeedatan ne etew. Ne ruen menge epat nehatus ne menge meama ne miduma kandin, ugaid ne kegkepatey kandin ne nenekedsuwey en ini se menge miduma kandin. Ne ke menge ulaula ran ne neengked.

Ruma 11:18

Tembù be sikiyu ne nekesambì ne ingkesumpat dut te midtamped, ne kenà niyu peleviya ke itungan niyu se egkahi te iyan kew pà lavi ne meupiya ketà te nengetamped! Su sikiyu ne subpang kew rà ne insumpat te Eleteala apey ebpeketuvù ketà. Ne kenà niyu lipati te kenà sikiyu se subpang se egenatan te kegkeuyag dut te dalid, ugaid ne ke dalid se egenatan te kegkeuyag dut te subpang ne iring te sikiyu.

2 Kurintu 5:15

Iyan din impatey ne kedselidig din dut te langun ne menge etew su apey kenà dan en med-ulaula te kandan dà ne kiyug. Ugaid ne iyan dan edtumanen ke kiyug ni Hisus ke minatey ne nevanew su apey ran mekepeliyu rut te kedusa te salà dan.

Pilipus 2:21

Su ke menge ruma ne iyan dan ibpeuna te itungan ne ke kandan ne keupianan ne kenà arà ke ibpeulaula kandan ni Hisu Kristu.

Kulasi 3:5

Tembù be engked kew se ed-ulaula te meraat ne ke daan en ne ulaula te menge etew kayi te ampew te dunya iring dut te kebpengingniyug wey langun ne meredsik ne ulaula ne igkesuat te menusiyà. Ne engkeri niyu ne betasan ayan se kegkeima, su embiya kenà niyu ed-engkeran ne ke kearen ne igkesuati niyu ne arà se egkevaluy ne kerenan niyu.

2 Tiselunika 2:4

Ini se etew ne ketà te kedlepew rin ne igkeepes din ke Eleteala wey langun ne sakup te Eleteala wey misan engkey ne ed-erapen dut te menge etew te Eleteala. Su egkahi te sikandin ne iyan pà mepurù dut te langun ne ed-erapen. Ne misan diyà te Nekebpuru ne Valey te Eleteala riyà te Hirusalim ne ebpinuu ketà ne egkahi te sikandin kun ke tidtu ne Eleteala.

1 Timoteo 1:20

Iyan iring kayi ne en si Himinyu wey si Alejandro. Midlekaan ku sikandan su apey egkeveyveyai en ni Setanas ke datù te pekaid apey ran metueni te kenà iya egkepakey ne edsumpeliten se Eleteala.

1 Timoteo 1:9

Ne netuenan ta rema se kenà iyan din egkesuhat te penduan ne ke menge etew ne metidtu, ugaid ne iyan din egkesuhat ke menge etew ne edsumbaker te penduan wey ke menge etew ne ed-engkenà te lalag te Eleteala, ke menge etew ne warà te itungan dan se Eleteala wey ke mekesesalà, ke menge etew ne meraat se itungan dan wey ke menge etew ne edsumpalit te Eleteala, ke menge etew ne ebunù te amey ran wey iney ran wey ruma ne menge etew ne teremunù.

1 Timoteo 3:3

Kenà sikandin metehel ne ed-inum te ebpeketevereg. Ne kenà sikandin edretem te meraat dut te menge ruma rin wey kenà lelengeten, ugaid ne metigker wey metulanged, ne kenà lelegawen te pirak.

1 Timoteo 6:10

Su ini se kegkenuhun te kureta dut te menge etew, ne ini se puunan te merakel ne meraat ne ulaula ran. Su duen menge etew ne midsuwey se kebperetiyaya ran te Eleteala su ini imbe iya se kiyug dan te kegkewasa. Ne iyan dan egketemanan se nekevaal te dekdekelà ne kemutuwan dan.

1 Timoteo 6:4

ne meperayù sikandin ne warà nesebutan din mekeatag te tidtu ne penurù. Iyan din dà igkesuat ne ebpekidlewaney te lalag, ugaid ne warà rantek din ini su iyan din dà egketemanan ne ebpein-indihà, kewahaan, ebpetemptempeleey, peen-entapà

2 Timoteo 3:4

Kenà dan egkeserihan, ne warà metapid ne ed-ul-ulaan dan, ne sahad se kepereyù dan, ne iyan dan edtumuen se kebpatà dan te nanam ne ke Eleteala ne keluran en iya te itungan dan.

Santiago 2:8

Na iyan meupiya ne ed-ul-ulaan niyu ne edumaan niyu ke dekelà ne penduan te Eleteala ne impesurat din ne egkahi te, “Ikelimù nu ke ruma nu iring ded te kegkelimù nu te hinawa nu.”

Santiago 4:16

Ugaid ne sikiyu mulà ne menge mepereyù su idantal niyu ke ed-ul-ulaan niyu. Ne meraat arà se idantal niyu diyà te etuvangan te Eleteala.

Santiago 4:6

Ugaid ne ke kedtavang te Eleteala kenitew ne mevaher pà su apey ki kenà ebpekeruma dut te meraat ne kiyug te lawa tew. Su ruen dema ini se lalag din ne impesurat din ne egkahi te, “Egkunteraan te Eleteala ke etew ne mepereyù, ugaid ne edtevangan din ke etew ne ebpeembavà te hinawa rin.”

1 Pedro 5:5

Ne sikiyu ne menge menguwed, ne iyan iya se pevayàbayà kew rut te pekilukesen. Su iyan meupiya ne langun tew ne mebpeembavà te hinawa ta ne ebpesugsuhuey ki rut te menge ruma ta. Su ruen impesurat ne Lalag te Eleteala ne egkahi te, “Egkunteraan te Eleteala ke menge etew ne mepereyù, ugaid ne edtevangan din te rekelà ke menge etew ne mebpeembavà te hinawa ran.”

2 Pedro 2:10

Na iyan pè be kenà din dusaa ke menge etew ne iyan den dà edumaan ke kiyug te lawa ran abpeg ke menge etew ne ed-engkenà dut te kebayàbayà te Eleteala kandan. Ne ini se migkahi ku ne menge etew ne ebpenurù te tarù ne warà kegkeyeyai ran wey mepereyù. Warà ed-edatan dan nasì pà te edsumpeliten dan ke menge suluhuen te Eleteala diyà te langit.

2 Pedro 2:12

Ugaid ne arà se menge etew ne ebpenurù te tarù ne iring sikandan te leew ne binatang ne warà itungan su iyan dan ed-ul-ulaan ke piya engkey ne nelayaman dan, ne iyan dan dà atag se edsigkemen su edsumbelien. Iring din ded dema ke menge etew ne ebpenurù te tarù su edsumpeliten dan ini se kenà dan egkesebutan, ne iyan dan egketemanan ne egkeherà dan iring dut te leew ne binatang.

2 Pedro 2:18

Engkungkun te sikandan ne meralem se lalag dan, ugaid ne warà benar dutun. Ne ebpehuyatan dan ke menge etew ne behu pà ne mid-engked dut te raan ne ulaula ran ne meraat ketà te mibperetiyaya ran. Su egkahi ini se ebpenurù te tarù te kenà kun meraat ke eduma dut te egkiyuhan te lawa ta. Tembù be egkepeneheewit maa ke menge etew te Ebpekedsalà.

2 Pedro 2:3

Ne ini se ebpenurù te tarù ne merakel se ibpenurù dan ne ebèbeelan den dà su ebpementiyari ran kayi te keniyu su egkeeram-am dan te pirak. Ini se menge etew ne neuhet dà ne impenehana te Eleteala ke kedusa rin kandan. Ne kenà edlipereng ke Eleteala, tembù be ke kedusa rin kandan ne ebpekeuma iya.

Hudas 1:16

Ini se menge etew ne ed-engkenà dut te benar, ne merehen egkesukul se hinawa ran wey metehel ne ebpemivig. Iyan den dà edumaan ke meraat ne kiyug te lawa ran. Sahad se kepereyù dan, ne metau ran ne edlana te hinawa te ruma ran su dalan ini te kedsikep dan.

Imperayag 13:1

Neipus arà ne ruen nekita ku ne mekeandek ne binatang ne mibpantew riyà te rahat. Ruen sepulù ne sidung din wey pitu ne ulu rin. Ne diyà te uman seveka ne sidung din ne ruen seluluy rin, ne diyà te uman seveka ne ulu rin ne ruen meraat ne menge lalag ne idsumpalit te Eleteala ne insurat ketà.

Imperayag 16:11

Ne midsumpalit dan ke Eleteala diyà te langit su atag dut te mesakit ne neheram dan wey atag dut te tepal dut te lawa ran. Ugaid ne warà dan med-engked dut te meraat ne mid-ulaula ran.

Imperayag 16:21

Ne mid-uranan ke menge etew te derekelà ne biyew, ne menge lelima nepulù ne kilù se kevehat dut te uman senge timan. Dutun ne nasì midsumpalit dut te menge etew ke Eleteala su midrasey kandin te derekelà ne biyew ne idusa te Eleteala kandan.

Imperayag 16:9

Ne netutung dan dut te mèmeinit nevenar ne andew ne midsumpalit dan ke Eleteala su sikandin se ebayàbayà ketà te kedresaya kandan. Ugaid ne warà dan med-engked dut te meraat ne ed-ul-ulaan dan, ne warà dan dema med-adat se Eleteala.