2 Timoteo 1:7 - Ke meupiya ne tudtul mekeatag ki Hisu Kristu

⁷ Su mibehayan kiyu en te Eleteala te Kedesenan ne Ebpetuntul te Menusiyà apey ki kenà egkeandek, nasì pà te mibehayan ki rin te gehem te edtuman te kiyug din wey ke limù ta rut te menge ruma ta wey ke ketau te ed-erangan te langun ne ed-ul-ulaan ta.

2 Timoteo 1:7 ပူးပေါင်းရင်းမြစ်များ

Lucas 10:19

Tentenuri niyu te mibehayan ku en sikiyu te gehem su apey misan ebpekehiek kew te uled etawa awa ne kenà kew egkevisaan. Kenà kew egketalew rut te kevaher te datù te pekaid, ne warè en ebpekekaid keniyu.

Lucas 15:17

“Guna su neuhet ne nekemuhudmuhud sikandin ne kehingginawa rin te, ‘Langun dut te menge etew ne egelevek ki Amà ne edsawadsawad se egkekaan dan, ugaid ne siaken kayi ne ebpatey ad te bitil.

Lucas 24:49

Duen ibpepengkayi ku te keniyu ke Kedesenan ne Ebpetuntul te menusiyà ne impasad keniyu te Amey ku rengan. Engketà be ne kenà kew pà awà kayi te inged ne Hirusalim taman te edlumun en keniyu ke gehem din ne riyà ebpuun te langit.”

Lucas 8:35

Nerineg ini rut te menge etew, ne mibayaan dan en su midsusi ran. Nekeuma ran ketà te ki Hisus ne nekita ran en ke meama ne midsuukan te merakel ne vusew pehaney ne riyà mibpinuu te rengdengaan ni Hisus, ne mibevelegkas en ne nekeulit en ke itungan din. Ketà ne nengeandek dan nevenar.

Juan 14:27

Uya, misan ed-ewaan ku en sikiyu, ne edtahakan ku sikiyu te kebmelintad te hinawa niyu. Ini se kebmelintad te hinawa niyu ne ibehey ku keniyu ne kayi ebpuun te kediey. Ke menge etew kayi te ampew te dunya ne kenà ebpekevehey te kelintad ne iring kayi, ketà be ne kenà kew meuru, ne kenà kew meandek.”

Nenged-ulaula 1:8

Ugaid ne embiya ebpekeuma en kayi te keniyu ke kedlumun dut te Kedesenan ne Ebpetuntul te Menusiyà,” ke si Hisus, “ne ebpeketelimà kew en te gehem ne sikiyu en ke ebpesabut mekeatag kediey kayi te inged ne Hirusalim, ne ieneb niyu en ini kayi te lusud te pruvinsiya te Hudiya, wey riyà dema te pruvinsiya te Semeriya, wey taman en diyà te epat ne pediyulu kayi te kelibutan.”

Nenged-ulaula 10:38

Netuenan niyu rema te mekeatag ki Hisus ne riyà ebpuun te inged ne Nesarit. Su impelumun te Eleteala kandin ke Kedesenan ne Ebpetuntul te Menusiyà ne midlumun kandin ne mibehey kandin te gehem. Ne mid-eneb din ini se menge inged se ebaal te meupiya wey nengeulian din ke langun ne edlelungen dut te datù te pekaid su diyà ma te kandin ke Eleteala.

Nenged-ulaula 20:24

Ugaid ne kenà ku en egkenehunan ini se umur ku su apey ku egkepasad ini se helevek ne impehelevek kedì te Kerenan tew ne si Hisus ne ini se kebpesabut dut te Meupiya ne Tudtul mekeatag te kegkeyru keytew te Eleteala.

Nenged-ulaula 21:13

Ugaid ne migkahi rin te, “Meambe ke ebpeninehew kew se ebpekevehey kedì te kegkeuru? Su embiya idtuhut en ini te Kerenan tew ne si Hisus ne egketemanan ku kayi te kegelevek ku kandin ne idselakan ku en te kenà kebekua rà kediey su piya ed-imetayan e pà diyà.”

Nenged-ulaula 26:11

Warà tedtab te mid-ulaula ku te pekesekitan ku sikandan diyà te menge baley ne ebpengedian te menge Hudiyanen te penduan dan su apey ran meengkeri te kebperetiyaya ran ki Hisus. Ne neepes a nevenar kandan su midtelukunan ku pà diyà te meriyù ne menge inged su embiya ruen egkeumaan ku ne mibperetiyaya ki Hisus ne ebpekesekitan ku.

Nenged-ulaula 26:25

“Kenà a egkevuneg, ke keupiya nu ne Gubinedur Pistu,” ke si Pablo, “su ini se migkahi ku ne benar.

Nenged-ulaula 6:8

Ne si Esteban ini, ne mibpenaub te Eleteala ne ruen gehem te Eleteala ne imbehey kandin su riyà te etuvangan te menge etew ne ruen neveelan din ne mekegeyip nevenar wey ulaula ne mekeinuinu.

Nenged-ulaula 9:22

Ne ini se kebpesabut ni Saulo mekeatag ki Hisus ne mid-iseg se kevaher din te kebpekepehimbenar dut te menge etew. Ne mepayag nevenar ke tuus ketà te impesabut din te si Hisus ke Impasad te Eleteala ne Ebperetuen te langun. Tembù be ini se menge Hudiyanen ne kayi te Demasku ne warà mekekahikahi.

Ruma 5:5

Ne kenà ki ebpekegkeyà kayi te kebpenareng tew su benar ini ne edtumanen te Eleteala sabap dut te pengelimuan din keytew. Ne ini se limù din ne riyà din ipepevayà dut te Kedesenan ne Ebpetuntul te Menusiyà ne imbehey rin keytew.

Ruma 8:15

Su geina te imbehey en te Eleteala keytew ke Kedesenan ne Ebpetuntul te Menusiyà ne kenà ki en egkevaluy ne uripen ne egkeandek te Eleteala iring dut te rengan, su nevaluy ki en ne menge anak din. Ne sabap dut te gehem dut te Kedesenan ne Ebpetuntul te Menusiyà ne imbehey rin keytew ne egkepakey en ne ed-amey ki te Eleteala.

1 Kurintu 2:4

Ne wey ku impemesabut en ke Lalag te Eleteala keniyu ne kenà iring dut te etew ne egkepuyuk ke menge etew dut te lambeylambey te lalag din. Ugaid ne mibpehimbenar kew su nekita niyu ke tuus dut te gehem te Kedesenan ne Ebpetuntul te Menusiyà se midtavang kedì.

Gelasiya 5:22

Melemu tew rema ne egkekilala ke ulaula te etew ne egkepeneheewit dut te Kedesenan ne Ebpetuntul te Menusiyà. Su ke etew ne egkepeneheewit te Kedesenan ne Ebpetuntul te Menusiyà ne melimù te ruma rin, mehalew sikandin, melintad se hinawa rin, metigker te ruma rin, metiyakapen te ruma rin, metulanged te ruma rin, egkeserihan te ruma ne etew,

Kulasi 1:8

Ne sikandin ke midtarem kenami mekeatag dut te limù niyu riyà te menge ruma niyu, arà ne limù ne riyà ebpuun te Kedesenan ne Ebpetuntul te Menusiyà.

Hibruhanen 2:15

Ne kayi te mid-ulaula rin ini ne mibaal sikandin te ralan su apey meawà ke andek te menge etew te kepepatey, su igenat te kegketautau ran ne nengeuripen dan en te andek dan te kepepatey.

1 Pedro 1:22

Na geina te mibperumaruma ki en dut te tidtu ne penurù ne egkepakey ne meilut se limù tew rut te menge ruma tew te ebperetiyaya su mibmetidtu ke itungan tew. Tembù be ebpelimlimuey ki egenat te hinawa ta ne kenà kayi rà te bèbà ta.

1 Juan 4:18

Su embiya tidtu se limù ta te Eleteala, ne kenà ki egkeandek su warà andek ne nekesawug dut te tidtu ne limù. Ugaid ne ke etew ne egkeandek, ne ini ke etew ne ebpenareng te kedusa te Eleteala ne ebpekeuma kayi te kandin ne tuus ini te warà pè meilut ini se limù din.