2 Pedro 2:13 - Ke meupiya ne tudtul mekeatag ki Hisu Kristu

¹³ Ne edresayen dan dema su atag te daan ne kedrasey ran dut te menge ruma ran. Su sikandan ne misan meandew ne kenà dan egkeyeyaan te ed-ulaula te kiyug dan ne meraat ne ibpatà te nanam dan. Kenà edait ne ebpekidtuhen dan diyà te kevurunan niyu su mekeyayà se ulaula ran, su iyan dan kiyug ne ed-ekalan kew ran mekeatag te meredsik ne ed-ul-ulaan dan.

2 Pedro 2:13 ပူးပေါင်းရင်းမြစ်များ

Ruma 13:13

Uya, ed-upianan ke menge ulaula tew su ini ke dait ne ed-ul-ulaan dut te menge etew ne ed-ubpà te kerayahan. Ne kenà ki en ebpemekiduma dut te kevurunan te menge etew ne ebpengasak te temperasà wey ebpenginum te ebpeketevereg, ne kenà ki ebpengingniyug etawa ed-ulaula te misan engkey en ne mekeyeyà ne kenà ki ebaal te kewahaan etawa egkeima.

Ipisu 5:27

Uya, midtilak kiyu rin dut te menge salà tew te kebpenehana rin kenitew su apey meupiya se kedtengteng din kenitew ketà te hewii ne kedlived din kayi su ed-angey keyta, ne warà idsawey rin kenitew misan deisek dà.

Pilipus 3:19

Ayan ne menge etew ne iyan dan egketemanan se apuy nerakà, su iyan ebayàbayà kandan ne ke kedtuman dan dut te kiyug te kememenusiyai. Ibpereyùdeyù dan ke ebpekeyeyà kandan, ne iyan dan dà igkeinesa ke egkiyuhan dut te menge etew kayi te ampew te dunya.

2 Timoteo 4:14

Utew meraat se imped-ulaula kedì ni Alejandro ke ebpandey te galang. Ugaid ne Eleteala se edsulì kandin dut te ulaula rin ne meraat.

Santiago 5:5

Sikiyu ne menge kewasa, ne warà kurang niyu su ebpekegaga kew te piya engkey ne kiyug niyu wey ke ked-ubpà niyu kayi te ampew te dunya ne meupiya nevenar. Ugaid ne iring kew te binatang ne impelambù su edsumbelien su kunaan niyu ne ke kedusa te Eleteala ne kenà ebpekeuma riyà te keniyu.

1 Pedro 4:4

Ugaid ne guntaani, ne ini se menge etew ne kenà ebperetiyaya te Eleteala ne neinuinu ran te meambe ke kenà ki eduma kandan te ed-ulaula te meraat wey ini se ulaula ne ebpatà te nanam. Tembù be edsumpeliten ki nikandan.

2 Pedro 2:15

Midsuwey ran dut te tidtu ne ralan ne nengetarin en su miduma ran dut te ralan ne ed-ikulen ni Belaam dengan ne anak ni Busur. Si Belaam ini ne senge etew ne ebpelambas te Lalag te Eleteala rengan, ugaid ne iyan dekelà te hinawa rin ke kureta ne egkekuwa rin dut te ked-ulaula rin te meraat.

Imperayag 18:6

Arà se meraat ne mid-ulaula rin keniyu ne iyan ded dema ed-ul-ulaan diyà te kandin, ugaid ne edtekepen arà se kedsulii kandin. Ne ke basù din ne nepenù te mepait ne binu ne impeinum din te menge etew, ne edtekepen arà se kepait din te ibpeinum kandin ne idledawan te kedusa te Eleteala kandin.