2 Kurintu 8:9 - Ke meupiya ne tudtul mekeatag ki Hisu Kristu

⁹ Netuenan niyu te rekelà ke tavang ni Hisu Kristu ke Kerenan tew su ketà te ked-ubpà din diyà te langit ne sikandin ke kemuney te langun taman, ugaid ne mid-awà sikandin ketà su mibpengkayi te ampew te dunya ne mibpevaluy sikandin ne etew su atag dut te limù din keytew. Ned-ulaula arà su apey ruen dalan te ebpekeamung ki kandin te egkemuney dut te keupianan diyà te langit.

2 Kurintu 8:9 ပူးပေါင်းရင်းမြစ်များ

Mateo 17:27

Ugaid ne kenà meupiya,” ke si Hisus, “ke ebmeraat ke hinawa rut te ebpevayad te buwis keyta. Pendiyà ka te ranew ne pemunuwit ka ne ke egkeuna ne edtugtug diyà te bunuwit nu ne bigkata nu en. Ne ketà te bèbà te neutel nu ne egkekita nu ke kureta ne ereg ne ibayad ta te buwis. Kua nu ini ne pendiyà ka te Nekebpuru ne Valey te Eleteala su ivayad nu ini te buwis ta.”

Mateo 20:28

Med-iring sikandin dut te Impeanak te Menusiyà te kenà iyan din kinepengkayi te ampew te dunya ne apey metevangi te menusiyà. Ugaid ne iyan din kinepengkayi ne apey rin metevangi sikandan, ne egkeimetayan su apey merakel se egkevelukasan.”

Mateo 8:20

Ne migkahi si Hisus kandin te, “Ke menge laku ne ruen takub ne ed-ul-ulian dan, ke menge pepenuk ne ruen kandan ne salag, ugaid ne ke Impeanak te Menusiyà ne misan endei en memekeirehà su warà ubpaan din.”

Marcos 6:3

Maa, kenà uvag ayan ke pandey, ne anak ni Maria, ne kakey en ni Santiago, ki Jose, ki Hudas wey ki Simon? Maa, kenà be ke menge etevey rin ne ini red dema med-ubpà?” ke sikandan. Ne ketà ne mid-engkenà dan kandin.

Lucas 16:11

Su embiya kenà ka egkeserihan ne ebpeheweren te kearen kayi te ampew te dunya ne kenà ke en iya ebpeheweren te Eleteala rut te tidtu ne kearen diyà te langit.

Lucas 2:7

Ne iyan din anak ne meama ne penganey rin pà ini. Ne midsemputan din ini se vatà ne impeirehà din diyà te ebpekeenan te kudà su warà neirehaan dan diyà te valey ne ed-eranan su nepengkeg en te etew.

Lucas 8:3

Ne ruen dema ketà si Juana ke esawa ni Kusa, ne midserihan ni Hirudis ke mepurù dan diyà te turuhan din. Si Susana rema wey merakel pà ne meritan ne miduma engki Hisus su edtuganur kandan te egenat te pentiyari ran.

Lucas 9:58

Ne migkahi si Hisus kandin te, “Ke menge laku ne ruen takub ne ed-ul-ulian dan, ke menge pepenuk ne ruen kandan ne salag, ugaid ne ke Impeanak te Menusiyà ne misan endei ad memekeirehà su warà ubpaan din.”

Juan 1:10

Nekeuma en sikandin kayi te ampew te dunya, ugaid ne warà mekekilala kandin ke menge etew misan impepevayà kandin ke kinelimbag dut te dunya.

Juan 1:14

Ne ke mid-ingaranan te Lalag ne mibpebaluy en ne menusiyà ne mid-ubpà en kayi te keytew. Ne lilimuen nevenar sikandin, wey ke langun ne egkehiyen din ne benar. Nekita rey ke geyip ne gehem din ne imbehey kandin te Eleteala su sikandin ke budtung ne Anak te Amey rin ne Eleteala.

Juan 1:17

Su si Moises ke nekepeneheewit te penduan te Eleteala kayi te langun tew ne menge menusiyà, ugaid ne si Hisu Kristu ke mibpepayag ne limù te Eleteala wey ke benar mekeatag te Eleteala.

Juan 12:30

Ne migkahi si Hisus te, “Kenà iyan kinekahi te Eleteala ne ruen ibpayag din kedì, ugaid ne apey niyu egketueni te ebpeminehen a rin.

Juan 16:15

Langun ne riyà te Amey ku ne kediey red dema, tembù be migkahi ku keniyu ne ibpesabut din keniyu ini se menge lalag ku su ke lalag te Amey ku ne kedì ded dema ne lalag.”

Juan 17:19

Su atag dut te limù ku kandan ne idrumakan ku keykew ini se hinawa ku su apey ran dema idrumakan nevenar ke hinawa ran keykew.

Ruma 11:12

Ne sabap dut te kenà kebperetiyaya te menge Hudiyanen, ne nevehayan te Eleteala te rekelà ne penaub din ke langun ne menge etew kayi te ampew te dunya. Ne egenat dema te neawà diyà te menge Hudiyanen ke penaub te Eleteala ne ibehey rin perem kandan, ne nekevehey rin ke rekelà ne penaub din diyà te menge etew ne kenà Hudiyanen. Ugaid ne wey pè be kenà muna pà se kerekelà te penaub dut te Eleteala ketà te hewii ne id-ulì dut te langun ne menge Hudiyanen ke hinawa ran te kebperetiyaya ki Hisus.

Ruma 15:3

Su misan si Hisu Kristu ne warà din ipeuna ke kiyug te hinawa rin. Su ruen nekahi rin diyà te Eleteala ne impesurat ne egkahi te, “Ke langun ne ibpegkeyà te etew keykew, Eleteala, ne kayi edadsang te kediey.”

Ruma 5:8

Ugaid ne impayag te Eleteala ke pengelimuan din keytew su midsuhù din si Hisu Kristu te ebpebpatey mekeatag keytew te mekesesalà ki pà.

Ruma 8:32

Su misan ke Anak din si Hisus ne warà din pekinuhuni, ugaid ne midsuhù din kayi te ampew te dunya su apey ebpekepeimatey ne idselidig kenitew atag dut te salà tew. Ne embiya iring ketà ke pengelimuan din keytew, ne kenà egkepakey ne kenà din ibehey keytew ke langun ne kurang tew.

1 Kurintu 1:4

Layun a ebpeselamat te Eleteala atag dut te keupiyanan ne ibehey rin keniyu atag dut te kebpekidseveka te hinawa niyu ki Hisu Kristu egenat te kebperetiyaya niyu kandin.

1 Kurintu 15:47

Si Adan ke neuna ne etew ne nelimbag ne iyan din limbahan se tanà. Ugaid ne si Hisu Kristu ne mid-ingaranan te ikeruwa ne Adan ne diyà ebpuun te langit.

2 Kurintu 13:14

Ne kiyug ku perem ne egkeheram niyu ke tavang ni Hisu Kristu ke Kerenan tew, wey ke limù te Eleteala keniyu, wey ke kebpekidseveka niyu rut te Kedesenan ne Ebpetuntul te Menusiyà ne ed-ubpà diyà te keniyu. Arà dà taman. Pablo

2 Kurintu 6:10

Ne misan duen merakel ne igkemereheni rey, ugaid ne kenà egkeawà ke kegkehalew rey. Iring key en te egkeayuayu, ugaid ne kayi ebpuun te ibpenurù dey ke Meupiya ne Tudtul ne igkewasa te ruma ne etew. Iring te warà kearen dey kayi te ampew te dunya, ugaid ne nehaked dey ma ke langun taman ne intail te Eleteala kenami diyà te langit.

Ipisu 2:7

Ini se mid-ulaula te Eleteala su apey taman te taman ne ke kerekelà te tavang din ne egkekita kayi te limù ne impekita rin keyta ibpepevayà dut te kebpatey ni Hisus.

Ipisu 3:19

Uya, kiyug ku ne egkesebutan niyu nevenar arà se kerekelà te limù ni Hisus keniyu, misan kenà langun din ne egkesagkew te itungan niyu. Su ketà te kegkeheram niyu te limù din ne kenà egketegkad, ne ini se ibehey te Eleteala keniyu su apey kew eduma rut te kiyug din ne ed-umanan pà su apey arà se kegkevaluy niyu ne iring te Eleteala ne ed-imesaran din.

Ipisu 3:8

Su misan siaken se pinekemevavà dut te langun ne etew rin, ne siaken ded se mibpurut din te ebpesabut diyà te sikiyu ne kenà Hudiyanen kayi te Meupiya ne Tudtul ne kenà egketembu se taman ne keupiya rin.

Kulasi 1:24

Ne misan mibilanggù a su atag te kebpenurù ku keniyu te kenà menge Hudiyanen, ne kenà a egkeuru su nasì pà te egkehalew a. Su egenat kayi ne keresayan ku ne egkeheraman ku ke keresayan ne kiyug ni Hisu Kristu ne egkepevayaan ku su apey egketevangan ke menge ruma tew ne mibperetiyaya ne iring te lawa rin.

1 Timoteo 6:18

Kehiyi nu ke menge kewasa ne med-ulaula ran te meupiya wey medtavang dan dut te menge ruma ran, su igkesuat te Eleteala ne ebpekeumun ded sikandan dut te imbehey rin kandan.

Hibruhanen 1:2

Ugaid ne guntaani manen, ne iyan en maa ibpesabut dut te Eleteala kenitew ne ibpepevayà din dut te Anak din si Hisus. Su sikandin se impelimbag din kayi te dunya, ne sikandin dema ke nepemilì te Eleteala ne ebpegkemunayen dut te langun taman.

Santiago 2:5

Na menge suled ku ne igkelimù ku, pemineg kew kayi te egkehiyen ku. Misan ke kearen dut te menge ayuayu kayi te ampew te dunya ne reisek dà, ne sikandan dema iya ke menge etew ne nepemilì te Eleteala su apey ke sarig dan kandin ne edekdekelà, ne sikandan dema se edlusud dut te Edetuan din su ini se impasad din dut te langun ne egkelimù kandin.

Imperayag 2:9

Netuenan ku te dekelà se kebpekesekiti keniyu ne neheraman niyu. Netuenan ku rema ne menge ayuayu kew, ugaid ne misan iring ketà ne kewasa kew iya riyà te langit. Ne netuenan ku ke meraat ne edlelahen mekeatag keniyu dut te menge etew ne engkungkun ne tidtu ne menge Hudiyanen, ugaid ne kenà ma benar su sakup dan ni Setanas ke datù te pekaid.

Imperayag 21:7

Ne piya engkey ne kenà egkegaga rut te penggeram te datù te pekaid ne ibehey ku kandin ini se umur, ne siaken ke Eleteala rin ne anak ku rema sikandin.

Imperayag 3:18

Tembù be ibpemandù ku keniyu ne pemesaa niyu kayi te kedì ini se tidtu ne bulawan ne intuug diyà te apuy ne in-upama te kebperetiyaya niyu kediey su apey ke kegkewasa niyu ne benar. Ne pemesaa niyu rema kayi te kedì ini se meputì ne belegkas su apey ibevelegkas niyu ne egkeawà ke kegkeyeyai niyu te nekegkedew. Ne pemesaa niyu rema kayi te kedì ini se bawì te mata su apey ibawì te mata niyu ne ebmerayag se kedtengteng niyu.