2 Kurintu 5:4 - Ke meupiya ne tudtul mekeatag ki Hisu Kristu

⁴ Su taman te kayi kiyu pà te ampew te dunya, ne merakel se egkeheram ta ne merasey. Ne kenà ku iyan egkehiyen ne egkiyug ad ne mehaan ebpatey su apey ku egkeawai ini se lawa ku ne ruen kegkerundus din, ugaid ne iyan ku igkesuat ne igkevehey rin en ke behu ne lawa ku ne riyà ebpuun te langit. Su embiya igkevehey rin en ke behu ne lawa ta ne kenà ebpatey, ne nepupus en ke ketehel dut te kemetayen.

2 Kurintu 5:4 ပူးပေါင်းရင်းမြစ်များ

Ruma 8:23

Ne kenà arà dà se nelimbag din se egkerasey su misan sikitew ne neketelimà en dut te Kedesenan ne Ebpetuntul te Menusiyà su ini se neuna ne ibehey rin dut te menge mibperetiyaya ne egkerasey ki red dema. Su ebpenerengen tew ke kebpekeuma dut te arà ne hewii ne ed-imasaren te Eleteala ke ked-anak-anak din kenitew ne ruen behu ne lawa tew ne warè en kebpekepevayà din te sakit wey kepepatey.

1 Kurintu 15:51

Ne pemineha niyu ve ini se in-eles dengan ugaid ne impesabut en te Eleteala. Ini se egketemanan dut te langun ne mibperetiyaya ki Hisus. Kenà langun ne ebpatey, ugaid ne sikitew langun ne seguguneey se kegkesalin te lawa tew.

2 Kurintu 5:2

Taman te kayi kiyu pà te ampew te dunya ne ruen kemerehenan tew, ne rekelà perem te hinawa tew te ibehey te Eleteala arà se behu ne lawa ne riyà ebpuun te lesang te langit.

2 Kurintu 5:3

Su embiya egkeseluuvan kiyu en ketà te behu ne lawa ne ruen en egkeubpaan te himukud ta.

2 Pedro 1:13

Su taman te kayi e pà te ampew te dunya ne iyan meupiya ne ebpetentenuran ku keniyu ini su apey kenà niyu melipati.