2 Kurintu 4:15 - Ke meupiya ne tudtul mekeatag ki Hisu Kristu

¹⁵ Tembù be edtigkeran dey en ke langun ne kemerehenan su wey rey metevangi sikiyu. Su embiya merakel en se ebpekeuman dut te ebperetiyaya ki Hisus, ne ed-iseg pà ke kerakel te ebehey te peselamat diyà te Eleteala su apey sikandin se egkereyù.

2 Kurintu 4:15 ပူးပေါင်းရင်းမြစ်များ

Ruma 8:28

Ne sikitew ke mibpemilì te Eleteala te iyan nerumaan ke netahù te itungan din, netuenan tew te langun ne egketemanan tew ne ebeluyen din ne keupianan tew kayi te keytew ne egkelimù kandin.

1 Kurintu 9:19

Na geina te warà etew ne edsukey kediey, warà dema etew ne dait ne edsuhù kediey. Ugaid ne egkiyug ad ne egkevaluy ne edsugsuhuen dut te langun ne etew su apey ku egkepeneheewit ke merakel ne etew te kebperetiyaya ki Hisu Kristu.

2 Kurintu 1:11

Ne egketevangan key niyu te ibpepevayà te kebpengeningeni niyu kenami. Su embiya merakel niyu se ebpengeningeni kenami ne ibehey te Eleteala keniyu ke ebuyuen niyu, ketà ne merakel se ebpekereyù te Eleteala mekeatag te tavang din kenami.

2 Kurintu 8:19

Ne kenà ketà dà taman su nepemilì sikandin dut te langun ne menge mibperetiyaya diyà te ebelàbelà ne inged te eduma kenami te kebpeneheewita rey rut te tavang niyu diyà te menge mibperetiyaya te Hirusalim. Iyan dey ebpeneheewita su apey mereyù ke Eleteala, ne apey ran metueni ke kegkesuat dey te kedtavang.

Gelasiya 1:24

Ugaid ne guna su netuenan dan te mibehu en ke hinawa ku, ne mideyù dan nevenar ke Eleteala!

Kulasi 1:24

Ne misan mibilanggù a su atag te kebpenurù ku keniyu te kenà menge Hudiyanen, ne kenà a egkeuru su nasì pà te egkehalew a. Su egenat kayi ne keresayan ku ne egkeheraman ku ke keresayan ne kiyug ni Hisu Kristu ne egkepevayaan ku su apey egketevangan ke menge ruma tew ne mibperetiyaya ne iring te lawa rin.

1 Timoteo 1:14

Melimù nevenar si Hisu Kristu ke Kerenan tew su mid-uluhan a rin te raat te nanam, ne pinesarig a rin kandin, ne midtehuan a rin te kegkelimù ku kayi te menge ruma ku egenat dut te kinepekidseveka ku kandin.

2 Timoteo 2:10

Ketà be ne edtigkeran ku en ma lavew piya engkey ne egketemanan ku apey ke menge etew ne mibpemilì te Eleteala ne ebpekerineg te lalag din ne egketau te si Hisus ne ebpeliyu kandan, su kiyug ku ne ebpekeliyu ran dema egenat te kebperetiyaya ran ki Hisu Kristu ne ebpeketelimà dan te umur ne warà edtemanan din wey warà pasar din se keupiya rin neraan en ne impenehana te Eleteala kandan.

1 Pedro 2:9

Ugaid ne sikami ne mibperetiyaya kandin ne mibpemilì te Eleteala ne egkevaluy key ne menge anak din. Ne iring key te menge terebpelengesa ne egelevek diyà te Eleteala ne datù tew. Ne sikami rema ke ebeyveyaan dan, ne sikami red dema se nepemilì din ne kandin ne menge etew su apey rey ibpemenudtul ke meupiya ne mid-ulaula rin keyta. Su rengan ne iring key te riyà te merusirem, ne guntaani ne Eleteala se midrayag kenami.

1 Pedro 4:11

Embiya ruen keyta ne nevehayan te ketau te ebpesabut se Lalag te Eleteala, ne iyan iya se edtentenuran din te ini se Lalag te Eleteala ne ibpesabut din. Ne embiya ruen ketau ta te edtavang te menge ruma ta, ne iyan iya se kenà ta egkelipatan ne ini se kevaher ta te edtavang ne riyà ebpuun te Eleteala. Piya engkey en ne helevek ne imbehey keyta te Eleteala ne ebeelan ta, ne iyan iya se ed-ey-eyaran ta te ebaal egenat dut te tavang ne ebpuun ki Hisu Kristu su apey Eleteala se edeyuen dut te menge etew. Su sikandin dà se edait ne edeyuen, ne sikandin dà se warà ebpekerepeng dut te gehem din taman te taman.