2 Kurintu 13:5 - Ke meupiya ne tudtul mekeatag ki Hisu Kristu

⁵ Na susiya niyu ke hinawa niyu embiya benar ke kebperetiyaya niyu ki Hisu Kristu etawa kenà. Menu, warà niyu ves metueni se keniyan med-ubpà si Hisu Kristu te hinawa niyu? Ne embiya warà sikandin diyà te hinawa niyu, ne kenà benar ke kebperetiyaya niyu.

2 Kurintu 13:5 ပူးပေါင်းရင်းမြစ်များ

Juan 14:23

Midtavak si Hisus te, “Uya, su kenà dan egkelimù kediey su ke etew ne egkelimù kediey ne iyan din edtumanen ke menge suhù ku. Ne igkelimù sikandin dut te Amey ku, ne sikami ki Amà ne riyà key te kandin su ed-ubpà.

Juan 15:4

Ketà be ne kenà kew ebpitas kediey,” ke si Hisus, “ne kenà a rema ebpitas keniyu. Su ke subpang ne egkepitas dut te lawa te pinemula ne kenà ebpekevahas, ne iring kew rema te subpang su kenà kew ebpekevahas embiya ebpitas kew rut te kebperetiyaya niyu kedì.”

Juan 17:23

Su riyan a te kandan iring dut te ini ka rema te kediey, apey egkeseveka rà ke itungan dan. Ne ketà ne egketuenan te langun ne menusiyà te midsuhù a nikuna, ne egketuenan dan dema te igkelimù nu sikandan iring dut te limù nu kediey.

Juan 17:26

Impesabut ku en kandan ke entei ka, Amà, ne ini ne ibperayun ku pà te ebpesabut kandan apey ebmeilut ke kebpelimlimuey ran iring dut te limù nu kediey su apey riyan a rema te kandan.”

Juan 6:56

Ne misan engkey ne etew se egkaan te lawa ku ne ed-inum te lengesa ku ne sikandin ne kayi ebpekeubpà te kedì, ne siaken dema ne diyan a ebpekeubpà te kandin.

Juan 6:6

(Migkahi rin ini su ebpenggeraman din si Felipe, ugaid ne netuenan din ma ke engkey se ed-ul-ulaan din.)

Ruma 1:28

Su warà te hinawa ran ke benar mekeatag te Eleteala, ne ketà mibelehad en te Eleteala sikandan te iyan ebayàbayà te itungan dan ne utew meraatey. Tembù be iyan dan ed-ul-ulaan ne meraat.

Ruma 8:10

Ugaid ne embiya si Hisu Kristu se ed-ubpà diyà te hinawa niyu ne misan ebpatey ini se lawa niyu su geina te ruen salà niyu, ne ke gimukud niyu ne ed-ubpà diyà te Eleteala taman te taman su iyan din kedtengteng keniyu ne metidtu riyà te etuvangan din.

1 Kurintu 11:28

Tembù be ke etew ne ed-amung te egkaan wey ed-inum dut te kedtanudtanud te kinepatey ni Hisus, ne iyan iya se usisaa rin pà ke hinawa rin, ne arà pà ne egkepakey ne ed-amung sikandin te egkaan wey ed-inum ketà.

1 Kurintu 11:31

Embiya ed-unaan ta te ed-usisa ke hinawa ta su apey ta kenà ed-ul-ulaan ke meraat, ne warà idusa te Eleteala keyta.

1 Kurintu 3:16

Ne sikiyu ne menge mibperetiyaya, maa kenà niyu ves egkesebutan te sikiyu ke ed-ubpaan te Eleteala ne ke Kedesenan ne Ebpetuntul te Menusiyà se ed-ubpà riyà te keniyu?

1 Kurintu 6:15

Netuenan niyu ne ke lawa te etew ne mibperetiyaya ne ripàripà te lawa ni Hisus. Ne embiya iring ketà ne maa, egkepakey ne iyan ta ebpeetahan te lawa ta te ebpekid-ulid te meritan ne meredsik se ulaula rin? Kenà iya!

1 Kurintu 6:19

Idtahù niyu ini te hinawa se ayan se lawa niyu ne timbang te baley ne mibpeubpaan te Eleteala rut te Kedesenan ne Ebpetuntul te Menusiyà ne imbehey rin keniyu. Ne ketà be ne kenè en sikiyu se kemuney rut te lawa niyu su Eleteala en.

1 Kurintu 6:2

Maa warà niyu metueni te sikitew ne mibperetiyaya en se ed-amung ki Hisus te egkukum keuremà kayi te langun ne ampew te dunya? Ne embiya egkepakey se sikiyu se egkukum te langun kayi te dunya, ne meambe ke kenà niyu egkekukum arà se reisek dà ne kukuman?

1 Kurintu 9:24

Netuenan niyu se embiya ruen egkuya te ebpelelahuy, ne merakel dan se ed-amung ketà ugaid ne seveka rà se ebpeketavan ne egkevehayan te lalew rut te kegkuya. Ne sikiyu se mibperetiyaya ki Hisus ne pemikar kew te mevaher te eduma te Eleteala iring dut te etew ne egkuya te ebpelelahuy su apey kew egkevehayi te lalew te Eleteala keuremà.

1 Kurintu 9:27

Ne iring te pesusuntuk ne edlumbaren ku ke lawa ku su apey ku kenà egkerumaan ke kiyug te lawa ku. Su merakel se impemandù ku keniyu, ne kenà ku egkiyuhan te siaken ke mibpemandù keniyu ne siaken en arà se kenà egkevehayan te Eleteala te lalew rin su warà a mebperumaruma.

2 Kurintu 6:16

Ne kenà egkepakey ne ruen tarù ne ebpengerapan ne id-amung dut te baley ne ebpengeningeniyan te Eleteala. Engketà ded dema ke sikitew ne mibperetiyaya, su iring kiyu te baley ne ed-ubpaan te Eleteala. Su migkahi ke Eleteala te, “Ebeluyen ku ne ed-ubpaan ku ke menge etew ku, ne ebpekiduma a kandan. Su siak ke Eleteala ran ne ed-erapen dan, ne sakup ku en sikandan.”

Gelasiya 2:20

Ne sabap dut te kinesarig kud ki Hisus ne iring te nekeamung ad te kinepatey rin diyà te pinebelavag ne kayu. Su ingenat ketà ne kenà ke kiyug ku se edwayàwayà kedì, ugaid ne ke kiyug ni Hisu Kristu su sikandin se ed-ubpà kayi te hinawa ku. Ne taman te kayi e pad ed-ubpà te ampew te dunya ne idtepeney ku ke umur ku te edtuman dut te kiyug ni Hisus ke Anak te Eleteala ne egkelimù kedì ne midselidig kedì te kebpatey.

Gelasiya 4:19

Menge anak ku egenat dut te kebperetiyaya ta, ne mibmesakit ke hinawa ku su atag dut te ed-ul-ulaan niyu. Embiya idsempità ta ini se kebmesakit, ne iring dut te meritan ne egeram en te belilit. Su iring ketà se kedreheni ku gewii te edtehad a te keduma niyu en nevenar rut te ulaula ni Hisu Kristu.

Gelasiya 6:4

Uman senge etew ne pegpegitunga rin se kandin ne mid-ulaula. Su embiya id-amin din ke hinawa rin te eduma rut te metidtu, ne ebmelintad sikandin. Su kenà meupiya ne idrepeng din ke ulaula rin te ruma rin su apey rin egkereyù ke hinawa rin.

Ipisu 3:17

su apey egkeheram niyu nevenar te si Hisu Kristu ne riyan en ed-ubpà te hinawa niyu sabap dut te sarig niyu kandin. Ne ibpengeningeni ku rema ne ke limù niyu ki Hisus abpeg dut te kebpelimlimuey niyu ne midtamel en.

Kulasi 1:23

Ugaid ne iyan iya se pegelepi niyu te ebpekeiseg ini se sarig niyu ki Hisus su apey kenà egkekisù ke kebperetiyaya niyu. Kenà niyu edsuweyi ini se Meupiya ne Tudtul ne neendihan en te hinawa niyu te aney en te nerineg niyu, su warà duma ne egkepenareng tew te ebpesabut keytew te si Hisu Kristu ke ebpeliyu kenitew ke kenà ini se Meupiya ne Tudtul. Ne ini iya se Meupiya ne Tudtul ne nekeeneb en mekepenudtul kayi te dunya ne senge etew a ne si Pablo ne ebpeneheewit kayi.

Kulasi 1:27

Ne sikiyu rema ne kenà menge Hudiyanen ne nekeamung ketà te mibpeyahan din. Ne warà pasar din ne keupianan ini se netahù te itungan din te ibpeubpà din si Hisu Kristu kayi te hinawa tew, ne ini se tuus te sikita ne id-amung din dut te kepurù te Eleteala diyà te langit.

Kulasi 2:19

Su ke etew ne iring ketà ne kenà en eduma ki Hisu Kristu ne iyan tew ulu te langun tew ne mibperetiyaya kandin ne sikitew ne iring te lawa rin. Ne si Hisus ke ulu ne ebehey te lawa te langun ne kebpekepeiseg din ibpepevayà te uhat wey keseg din apey ebmetua iring te kiyug te Eleteala ne ebpetemanan kenitew.

Kulasi 2:7

Embiya tidtu se sarig niyu kandin ne iyan pegingawà se ebpekeiring ka te kayu ne ebpekedalid en ne meupiya se kegueyhuey rin. Tentenuri niyu ke impesabut keniyu mekeatag kandin su apey ebpekedalid ke kedsarig niyu ne ed-iseg te meupiya. Ne layun kew peselamat te Eleteala dut te langun ne ibehey rin keniyu.

1 Timoteo 2:15

Tembù be egkerasey ke meritan ke ed-anak, ugaid ne egketevangan dan te Eleteala su apey ran ebpekeliyu embiya egkamal dan te mevaher te peretiyaya ran kandin wey ebpelimlimuey ran wey ebpeketidtu ran te ulaula ran ne ebpekesuhat te Eleteala.

2 Timoteo 3:8

Ne ini se ebpemenurù te kenà metidtu ne iyan den dà kebpenurù ne edlantung dan dut te benar ne penurù iring ki Iyanis wey Iyanbiris dengan te midlantung ki Moises. Su langun dan ne nelayam en te itungan ne meraat, ne ke sarig dan ne warà ebuwatan din.

Tito 1:13

Ne benar iya arà se migkahi ketà te senge etew, ne arà be imbe ne pekebaher ka se edawey kandan su apey ebpeketidtu sikandan te peretiyaya ran.

Tito 1:16

Menge etew ne iring ketà ne engkungkun ne eduma te Eleteala, ugaid ne ke ulaula ran ne kenà ebpekedruyud dut te lalag ne egemew kayi te bèbà dan. Liyuliyu se kerupangan dan, ne kenà dan eduma dut te idsuhù kandan, ne ketà ne warà en iya meupiya ne egked-ulaula ran.

Tito 2:2

Igkahi nu rut te menge lukes ne meama ne ed-erangan dà te ed-ul-ulaan dan, ne ed-ulaula te endei se egkeedatan dan wey med-eren dan te kiyug te lawa ran. Ne mebmetidtu se kebperetiyaya ran te Eleteala, medlimù dan te menge etew, ne mebpekeantus dan se edtigker te kemerehenan.

Hibruhanen 12:15

Uram kew te kenà kew ebpekeiniyug dut te tavang wey limù te Eleteala. Su ke etew ne ed-ulaula te iring kayi se ebpekepeneheewit te ruma pà ne etew su iring en be te sagbet ne ebehas te mepait ne ebpekeilu.

Hibruhanen 4:1

Na in-amung ki en rema te Eleteala dut te impasad din te ebpekelusud dut te inged ne impenehana rin ne ebpeimelayan din te menge etew rin. Tembù be ed-uram kiyu su apey warà seveka rà ne egketahak te kedlusud ketà te inged ne ed-imelayan ne impasad din.

Hibruhanen 6:8

Ugaid ne embiya iyan dà edtuvù se ilemunen wey ruhiyen ne sagbet, ne warà pantag din arà se tanà. Arà be ne edereetan te Eleteala su ebinsulan din iring dut te ibped-ulaula rin te etew ne mid-iniyug se peretiyaya rin te Eleteala.

Santiago 4:4

Meraat kew ne menge etew su mid-awà kew te Eleteala iring dut te etew ne ed-awà te esawa rin su apey ebpengingniyug! Meambe ke warà niyu metueni te ke etew ne eduma rut te meraat ne kiyug te menge etew kayi te ampew te dunya, ne arà se etew ne egkunterà te Eleteala? Ketà be ne piya engkey ne etew ne egkiyug ne eduma rut te meraat ne ulaula te menge etew kayi te ampew te dunya, ne egkevaluy sikandin ne kunterà te Eleteala.

1 Pedro 5:9

Tembù be ed-iluten ta ke kebperetiyaya ta te Eleteala su apey ebmevaher ke hinawa ta te ed-atu ki Setanas. Ne netuenan ta te kenà sikami rà se egeram te keresayan su langun ne menge ruma ta ne mibperetiyaya te piya endei ne inged.

Imperayag 2:5

Tentenuri niyu ke dekelà ne limù niyu kedì dut te pehaney, ne pedsendit kew dut te meraat ne ed-ul-ulaan niyu guntaani ne lived kew dut te neuna ne limù niyu kediey. Su embiya kenà kew ebpedsendit, ne ebeyaan ku sikiyu ne id-awà ku ke sulù niyu diyà te netehuan din.