2 Kurintu 13:11 - Ke meupiya ne tudtul mekeatag ki Hisu Kristu

¹¹ Na menge suled ku, ini se egkehiyen ku kayi te ketepusan te surat ku. Ibpeiseg niyu pà ke meupiya ne ulaula niyu, ne pemineha niyu ke insuhù ku kayi. Ne medseveka kew te hinawa niyu su apey kew mebmelintad. Su embiya ini se ed-ul-ulaan niyu ne ke Eleteala ne egkelimù keniyu wey ebehey te kebmelintad te hinawa niyu se ebpekiduma keniyu.

2 Kurintu 13:11 ပူးပေါင်းရင်းမြစ်များ

Mateo 1:23

“Ebmehingey ini se raha ne warà pà mebeyugi ne ed-anak te meama ne iyan id-ingaran ne si Imanwil” (ne iyan din meana ne “Ke Eleteala ne kayi en te kenitew”).

Mateo 5:48

Tembù be sikiyu ne pekeimpit kew te ulaula niyu riyà te menge etew, su ke Amey niyu riyà te langit ne impit ke langun ne ulaula rin.”

Marcos 10:49

Guna su nerineg ni Hisus ne mid-itindeg pà sikandin se egkahi te, “Pikita niyu ayan kayi!” Arà dà ne mid-umew ran en ke pisek se egkahi te, “Kehalew ka en, ne itindeg ka, su ed-umawen ke en nikandin.”

Marcos 9:50

“Ne meupiya ini se timus su ibmeupiya te nanam dut te egkeenen tew, ugaid ne embiya egkeawà en ke nanam kayi te timus ne warà en dalan te kebmetimus din pà maa. Ne iring te timus ini se ed-ul-ulaan te menge etew ne mibperetiyaya kediey,” ke si Hisus, “tembù be iyan iya se pelimlimuey kew ne peup-upianey kew.”

Lucas 9:61

Ne ruen pà maa senge etew ne migkahi te, “Mama, eduma a kenikew, ugaid ne ebpemehetew e pà diyà te bevelayan ku.”

Juan 17:23

Su riyan a te kandan iring dut te ini ka rema te kediey, apey egkeseveka rà ke itungan dan. Ne ketà ne egketuenan te langun ne menusiyà te midsuhù a nikuna, ne egketuenan dan dema te igkelimù nu sikandan iring dut te limù nu kediey.

Nenged-ulaula 15:29

kenà kew kaan te egkeenen ne inrenà ne siparat diyà te ledawan dà ne kenà tidtu ne Eleteala, kenà kew kaan te binatang ne ebpekelen dà, kenà kew kaan te lengesa wey kenà kew mebpengingniyug. Ne meupiya en embiya ini se edtumanen niyu se nekahi ku. Arà dà taman.”

Nenged-ulaula 18:21

Ne dutun te kegenat din ne migkahi rin te, “Embiya idtuhut te Eleteala ne edlived a kayi te keniyu.” Ne ketà ne mid-untud en te kapal ne mid-awà kayi te inged ne Ipisu.

Nenged-ulaula 23:30

Ne guna su netuenan ku te ed-ayanan sikandin su ed-imetayan dut te menge Hudiyanen, tembù be nepegitung ku se ibpeewit ku sikandin kayi te keniyu. Ne migkehiyan ku ini se menge mid-isuhat kandin te riyà dan te keykew ibpeetuvang. Arà dà taman se lalag ku.”

Ruma 12:16

Ne langun tew ne mibperetiyaya ki Hisu Kristu, ne iyan iya se egkeseveka ki su apey kiyu kenà ebpemekedlewanà. Ne kenà ki ebpebperayù, ne kenà tew igkeyeyai se kebpekiduma tew rut te malù mevavà keytew. Ne kenà tew ebpegitungen te iyan ki pà bereitungan kandan.

Ruma 12:18

Ne ed-ul-ulaan tew ke taman ne egkegaga tew te kebaal te meupiya su apey warà kewehaan ne egkeveelan.

Ruma 14:19

Ketà be ne iyan tew ed-ul-ulaan ke endei se kegkeseveka rut te langun tew ne mibperetiyaya, ne ebpekepeiseg te kebperetiyaya tew te keduma tew ki Hisus.

Ruma 15:13

Ne ke Eleteala se ebpuunan te langun ne keupianan ne ebpenerengen tew, ne kiyug ku ne menu ma ke mevehayi kew nikandin te rekelà ne kehelawan wey ke kebmelintad te hinawa niyu. Su embiya iring ketà se egked-ulaula, ne ke kedsarig niyu kandin mekeatag te ebpenerengen niyu ne ebmevag-et riyà sabap dut te gehem te Kedesenan ne Ebpetuntul te Menusiyà.

Ruma 15:33

Iyan ku kiyug ne menu ma perem ne ke Eleteala ne ebpuunan dut te kebmelintad te hinawa tew ne ebpekiduma keniyu. Ne egketuman ini.

Ruma 16:20

Ne ke Eleteala ne ebpuunan te kebmelintad te hinawa tew ne kenà dà meuhet ne edtekutaken din si Setanas ke datù te pekaid. Iyan ku kiyug ne menu ma perem ke ibpekita rut te Kerenan tew ne si Hisu Kristu ke daat te nanam din keniyu.

1 Kurintu 1:10

Menge suled ku te ebperetiyaya, ruen ebuyuen ku keniyu ne ebperumdumaan niyu su suhù a ni Hisu Kristu ke Kerenan tew. Iyan ku ebuyuen ne egkeseveka kew su apey warà kebpemekedlewanà diyà te keniyu. Uya, egkeseveka ke itungan niyu wey ke hinawa niyu.

2 Kurintu 1:4

Su misan engkey se egkerumpak tew ne kemerehenan ne edtevangan kiyu rin su apey kiyu ebpekehuru riyà te kandin ne iring be rema ketà se kedtevangi tew ke menge ruma tew ne egkerehenan.

2 Kurintu 13:14

Ne kiyug ku perem ne egkeheram niyu ke tavang ni Hisu Kristu ke Kerenan tew, wey ke limù te Eleteala keniyu, wey ke kebpekidseveka niyu rut te Kedesenan ne Ebpetuntul te Menusiyà ne ed-ubpà diyà te keniyu. Arà dà taman. Pablo

2 Kurintu 13:9

Ketà be ne igkehalew ku embiya warà kebpegingawà te kebpekita ku rut te kewayà ku te ebpedsalà su warà nekesurang dut te sikiyu. Su beleharen ke embiya ruen egkahi te warà kewayà ku asal ebmevaher kew te ed-ulaula te meupiya. Ibpengeningeni ku te Eleteala te ibpeiseg din ke meupiya ne ulaula niyu.

Ipisu 4:12

Iyan din kinevehey kayi te menge ketau ne apey langun tew te mibperetiyaya en ne ruen sangkap din te edtuman te piya engkey ne kiyug te Eleteala ne ed-ul-ulaan tew, su apey ke kebperetiyaya rut te langun ne sakup din ne iring te lawa rin ne ebpekeiseg.

Ipisu 4:3

Su Ke kedesenan ne Ebpetuntul te Menusiyà, ne sikandin se kegkeseveka tew, ne arà be ne iluta niyu se keduma kandin su apey niyu kenà egkereeti arà se kegkeseveka niyu.

Ipisu 6:23

Menge suled ku, iyan ku ebpengeningeniyen diyà te Eleteala ne Amey tew wey ki Hisu Kristu ne Kerenan tew ne menu ma ke ebeheran dan ke kedsarig niyu kandan su apey niyu egkeheram ke melintad ne itungan wey ke kebpelimlimuey niyu ne riyà ebpuun te kandan.

Pilipus 1:27

Na memekebalak kiyu ve se kenà, ne itahù niyu te itungan se iyan niyu rà ul-ulaa ke edait ne ulaula rut te menge mibperetiyaya te Meupiya ne Tudtul mekeatag ki Hisu Kristu. Ketà ne misan ebpendiyan a te keniyu etawa kenà, ne ke tudtul mekeatag keniyu ne ebpekeuma kayi te kedì ne warè en ebpekesawug ne meraat su seveka rà ne neuyun kew en dut te sarig niyu ki Hisu Kristu, ne ebpetebtevangey kew en te edtindeg dut te Meupiya ne Tudtul ne mibperetiyaya niyu.

Pilipus 3:16

Ugaid ne iyan iya se ebperumdumaan tew ke langun ne nesebutan tew ne egkiyuhan din.

Pilipus 4:2

Ebuyuen ku te sikiyu Udiya ki Sintiki ne mebpetunteyey kew en su edsuled kew sabap dut te kedsarig niyu ki Hisu Kristu.

Pilipus 4:4

Ne layun kew mebmehalew su atag dut te mibpekidseveka kew ki Hisu Kristu ke Kerenan tew. Ne egkesulit ku pà maa te egkahi te layun kew mebmehalew.

Pilipus 4:9

Ne langun dut te nehuruwan niyu kayi te penurù ku abpeg ke nerineg niyu kayi te kedì wey ke nekita niyu ne ulaula ku, ne arà be se dumai niyu. Su embiya ini se ed-ul-ulaan niyu, ne ebpekerinewen te Eleteala ke hinawa niyu su sikandin ne keniyan te keniyu.

1 Tiselunika 3:10

Ne merukilem meandew ne layun key ebpengeningeni te ebpemekebalak kiyu, su apey rey ed-umani embiya ruen kurang dut te kebperetiyaya niyu.

1 Tiselunika 4:1

Na menge suled, ketà te keniyan key pà te keniyu ne impenurù dey en keniyu ke engkey se ulaula te ked-ubpà ne ebpekesuhat te hinawa te Eleteala, ne ini ne midumaan niyu en. Ne guntaani ne ebuyuen dey te umani niyu pà ke meupiya ne ulaula niyu su ini se migkahi keyta rut te Kerenan tew ne si Hisu Kristu.

1 Tiselunika 4:18

Tembù be, ini ne impesabut ku keniyu ne ibpenurù niyu te menge ruma niyu ne mibperetiyaya su apey ran kenà egkeuru.

1 Tiselunika 5:13

Ipekita niyu ke limù niyu kandan wey edati niyu su atag dut te helevek dan. Ne ruma pà ne ebuyuen ku ne petultulengerey kew.

1 Tiselunika 5:16

Na geina te mibpekidseveka kew ki Hisu Kristu ne iyan kiyug te Eleteala keniyu ne merukilem meandew ne ruen kegkehalew niyu, ne layun kew ebpengeningeni, ne piya engkey se egketemanan niyu ne peselamat kew te Eleteala.

1 Tiselunika 5:23

Ne iyan ku kiyug ne ke Eleteala ne ebehey te kebmelintad te hinawa tew, ne menu ma perem ke edtilaken din ke ulaula niyu, ke hinawa niyu wey ke langun ne itungan niyu su apey ketà te kebpekeuma ni Hisu Kristu kayi ne warà igkesawey keniyu su ebmetilak kew riyà te etuvangan din.

2 Tiselunika 2:16

Iyan dey egkiyuhan ne ke Kerenan tew ne si Hisu Kristu wey ke Eleteala ne Amey tew se ebag-et dut te hinawa niyu wey ebaher keniyu su apey langun ne ed-ul-ulaan niyu wey langun ne egkehiyen niyu ne ebmeupiya su dekelà se limù te Eleteala keytew. Ne egenat dut te limù din wey ke kebpenaub din ne ibehey rin ke kevag-et dut te itungan tew wey ke keupiya ne ebpenerengen tew ne egketuman.

2 Tiselunika 3:1

Na, menge suled, duen pà ebuyuen ku keniyu. Iyan ku ebuyuen ne ipengeningeni niyu te Eleteala mekeatag te sikami su apey ebpekeeneb en te mehaan ini se Lalag te Eleteala ne ibpemesabut dey, su apey ke menge etew ne ebpekerineg kayi ne mehalew se kedtelimà dan iring keniyu.

2 Tiselunika 3:16

Iyan dey egkiyuhan ne ke Kerenan tew ne si Hisu Kristu se ebehey te kebmelinew te hinawa niyu piya engkey se egketemanan niyu su sikandin se ebpuunan te itungan ne melinew. Ne dumai kew rema nikandin.

2 Timoteo 2:22

Na Timoteo, kenà nu ve ebpengunuti se kenguwed te hinawa nu. Ugaid ne itahù nu te itungan nu ke ulaula ne metidtu, ne ke kebpeiseg te sarig nu, ke kedlimù nu te menge ruma nu wey ke melintad ne hinawa nu riyà te kandin. Langun imbe kayi se ed-ul-ulaan nu elin te menge etew ne ebpengeningeni te Kerenan tew egenat te hinawa ne midtilak.

Hibruhanen 12:14

Ne uram kew te kenà kew ebpekevaal te kewahaan su apey ke itungan niyu dut te langun ne menge etew ne ebmelintad. Ne heleveka niyu te mevaher se kebmetidtu te ulaula niyu ne ebpekesuhat te hinawa te Eleteala, su embiya kenà iring ketà se ulaula tew ne kenà ki egkekita te Eleteala.

Hibruhanen 13:20

Ne ke Eleteala ke mibanew ki Hisu Kristu rut te kinepatey rin, ne sikandin en ke pinekemepurù ne egkeunutan tew ne iring sikandin te tumetuganur dut te sikitew ne bilibili rin. Su ke lengesa rin ne impetudà ketà te kinepatey rin diyà te pinebelavag ne kayu ne arà ke tuus dut te behu ne pasad te Eleteala keytew, ini se pasad din ne warà kegkesembii rin taman te taman. Ne ibpengeningeni ku te Eleteala ne ebehey te melintad ne hinawa, ne ibehey rin kenitew ke langun ne ebpeketavang kenitew te kebpekeiseg te kedtumana tew te kandin ne kiyug. Ne ibpengeningeni ku red dema te sikandin se edtavang keniyu su apey kew ed-ulaula te ebpekesuhat te hinawa rin ibpepevayà dut te tavang ni Hisu Kristu keniyu. Ketà be ne edeyù kiyu ki Hisu Kristu taman te taman. Ne metuman be ini!

Santiago 1:4

Na peketigker kew nevenar su apey mevag-et ke kebperetiyaya niyu. Su embiya ini se ed-ul-ulaan niyu, ne kenà kew ebpekesurang ne warà idsawey keniyu su metua en ke peretiyaya niyu wey warà kurang te ulaula niyu.

1 Pedro 3:11

Ne med-engked sikandin dut te meraat ne ulaula ne iyan din ed-ul-ulaan ke meupiya, ne layun din ebpemengaa te meupiya ne kederepità dut te menge ruma rin.

1 Pedro 3:8

Ne ruen dema egkehiyen ku keniyu te langun ne menge mibperetiyaya, iyan iya se medseveka se itungan ta wey ke hinawa ta. Pelimlimuey kiyu rut te menge ruma ta iring te telteledsuled, ne ebpetultulengerey kiyu ne kenà ki mepelevawen.

1 Pedro 5:10

Ugaid ne mehaan dà ini se keresayan ne egeramen ta. Ne embiya egkeipus en ne ed-iluten te Eleteala ke kebperetiyaya ta su apey mevaher se hinawa ta te edtuman ki iya te keduma ta kandin. Su sikandin ke ebpuunan te langun ne tavang keyta. Ne sikita ne mibpemilì din su apey ebpekeamung ki dut te raman din duma ki Hisu Kristu.

Imperayag 22:21

Na egkiyuhan ku te langun niyu ne sakup te Eleteala ne ebpeneuven dut te Kerenan tew ne si Hisus. Ini rà se langun ne lalag ku. Juan