1 Tiselunika 4:8 - Ke meupiya ne tudtul mekeatag ki Hisu Kristu

⁸ Tembù be ke etew ne kenà eduma te ini ne ibpenurù ku ne kenà penurù te etew se id-engkenà din su iyan din id-engkenà ke penurù te Eleteala ne mibehey keniyu te Kedesenan ne Ebpetuntul te Menusiyà.

1 Tiselunika 4:8 ပူးပေါင်းရင်းမြစ်များ

Lucas 10:16

Ne migkehiyan ni Hisus ke pitu nepulù ne ebpeipenawen din te, “Ke menge etew ne ebpemineg te ibpenurù niyu ne iring te iyan a ran ebpeminehen. Ne engkey se kenà edtelimà keniyu ne iring te iyan a rin warà telimaa. Ne engkey se kenà edtelimà kediey ne iyan din warà telimaa ke Eleteala ne midsuhù kediey.”

Juan 12:48

Ugaid ne ruen ed-isuhat te kerusaan dut te menge etew ne mid-engkenà kedì wey warà medtelimà te menge lalag ku. Su ini se menge lalag ku ne warà dan telimaa ne ini red se ed-isuhat te kerusaan kandin ketà te mewri ne hewii.

Nenged-ulaula 13:41

‘Sikiyu ne menge edsumpalit su kenà kew ebperetiyaya, ne uram kew! Su egkegeyip kew te ebeelan ku, ne ebpematey kew, ke se Eleteala. Su ruen ebeelan ku te biviyag kew pà ugaid ne kenà niyu ebperetiyayaan, misan duen ebpemenudtul keniyu.’”

Ruma 5:5

Ne kenà ki ebpekegkeyà kayi te kebpenareng tew su benar ini ne edtumanen te Eleteala sabap dut te pengelimuan din keytew. Ne ini se limù din ne riyà din ipepevayà dut te Kedesenan ne Ebpetuntul te Menusiyà ne imbehey rin keytew.

1 Kurintu 2:10

Ugaid ne guntaani ne ayan se in-eles din dengan ne mibpesebutan din en kenami te kayi rin impepevayà dut te Kedesenan ne Ebpetuntul te Menusiyà. Su egketuenan te Kedesenan ne Ebpetuntul te Menusiyà ke langun ne itungan te Eleteala, misan pà ke menenem ne itungan din.

1 Kurintu 7:40

Ugaid ne iyan pà meupiya ne kenà en ed-esawa. Ini ne kediey rà ne pegitungan su iyan ku egkeperetiyaya ne ke impayag kedì te Kedesenan ne Ebpetuntul te Menusiyà.

2 Kurintu 1:22

Ne mibpesebutan din keytew te sikitew ne nevaluy ne menge anak din ibpepevayà dut te Kedesenan ne Ebpetuntul te Menusiyà ne impeubpà din kayi te hinawa tew su tuus te edtumanen din ke langun ne impasad din keytew.

Gelasiya 4:6

Ne ketà te nevaluy kew en guntaani ne anak te Eleteala, ne midsuhù din en ke Kedesenan ne Ebpetuntul te Menusiyà su ebpeubpaan din diyà te hinawa niyu. Ne egkepakey en ne ed-Amey kew te Eleteala ketà te kebpengeningeni niyu.

1 Pedro 1:12

Ne mibpeketuenan dema te Eleteala dut te menge ebpelambas te lalag din te ini se egked-ulaula ne kenà egketuman dut te hewii ran pà, ugaid ne kayi te sikitew en guntaani ne egketuman ini. Ne benar arà. Su ini se nekahi ran neraan ne ini se Meupiya ne Tudtul ne impesabut en diyà te keniyu dut te ini se ebpemenurù keniyu guntaan. Ne ke Kedesenan ne Ebpetuntul te Menusiyà ne impepengkayi te Eleteala egenat te langit se ebpesabut kandan te ini se ibpemenurù dan. Ne misan ke menge suluhuen te Eleteala riyà te langit ne egkiyug dan ne egkesebutan ini.

2 Pedro 1:21

Su ini se Lalag te Eleteala ne impesurat dut te ebpelambas te Lalag te Eleteala rengan ne kenà ebpuun diyà te itungan den dà dè duen su ke Kedesenan ne Ebpetuntul te Menusiyà se mibpesabut kandan ke engkey se idsurat dan.

1 Juan 3:24

Ne piya engkey ne etew ne edtuman te suhù te Eleteala, ne mibpekidseveka en te Eleteala wey riyà ed-ubpà ke Eleteala te kandin. Netuenan ta te kayi ed-ubpà ke Eleteala te keyta su atag dut te tavang te Kedesenan ne Ebpetuntul te Menusiyà ne imbehey rin keyta.

Hudas 1:8

Iring ded be iya ketà ke egketemanan dut te menge etew ne ebpenurù te kenà benar diyà te keniyu. Edtumanen dan dà ke meraat ne kiyug te lawa ran su ingkahi kun kandan te tehinep dan. Ne edsumpeliten dan su kenà dan eduma te lalag te Eleteala, ne edsudian dan ke ketulusan ne suluhuen diyà te langit.