1 Tiselunika 1:8 - Ke meupiya ne tudtul mekeatag ki Hisu Kristu

⁸ Su ibpepevayà te kebperetiyaya niyu ne nekeeneb en ke Lalag te Eleteala diyà te menge etew te inged ne Mesidunya wey Gerisiya. Ne kenà riyà dà te kandan su medmerakel pà ne menge inged se nekerineg dut te kebperetiyaya niyu te Eleteala. Tembù be misan kenà dey en ibpenudtul, ne netuenan dan en.

1 Tiselunika 1:8 ပူးပေါင်းရင်းမြစ်များ

Nenged-ulaula 18:12

Guna su iyan en gubinedur ne si Galio diyà te inged ne Gerisiya, ne midseveka ke menge Hudiyanen ne midsigkem dan si Pablo ne impeetuvang dan te kukuman.

Ruma 1:8

Iyan ku id-una te egkahi keniyu ne ebpeselematan ku te Eleteala su atag dut te langun niyu ne mibperetiyaya. Su misan diyà te meriyù ne menge inged ne nerineg dan mekeatag te kebperetiyaya niyu kandin. Ne ini se kebpeselamat ku ne ibpepevayà ki Hisu Kristu ne Anak din.

Ruma 15:26

Su nepegitung dut te menge suled tew ne mibperetiyaya kayi te lusud te Mesidunya wey Gerisya te iyan meupiya ne ebehey ran te tavang diyà te menge ruma tew ne mibperetiyaya riyà te Hirusalim ne ebpengevuluhan te egketemanan din.

Ruma 16:19

Nevantug en ke tudtul te kebperumaruma niyu rut te menge suhù te Eleteala, ne nehalew a nevenar ketà. Ugaid ne iyan ku rà egkiyuhan ne egkeumanan pà ke netuenan niyu te ed-ul-ulaan ne meupiya, ne kenà kew ebpekehuru te misan engkey ne ulaula ne meraat.

1 Kurintu 14:36

Menu, kenà kew ebperumaruma rut te migkahi ku? Iyan niyu ves nepegitung ne riyà ebpuun te keniyu ke Meupiya ne Tudtul etawa neketelimà kew rà kayi.

2 Kurintu 2:14

Ne misan pà nekebmutu ke hinawa ku ketà, ne dekelà se kinereyù ku te Eleteala. Su netuenan ku ne neseveka kiyu riyà te ki Hisu Kristu ne iring be ketà ne kenà iyan ku edumaan ke kiyug te kememenusiyai su ke kiyug te Eleteala ke edtumanen ku. Su ke Eleteala se ebpetuntul keytew su apey piya endei ki ebpesinaru su ebpesabut te Meupiya ne Tudtul, ne iyan mibperehiran te Eleteala keytew te ebpeeneb dut te Meupiya ne Tudtul ne iring te periyemut ne egkearek dut te menge etew.

2 Kurintu 3:4

Ini se nekahi ku su rekelà se sarig dey te Eleteala sabap dut te kebpekidseveka rey ki Hisu Kristu.

Kulasi 3:16

Itahù niyu nevenar te hinawa ke langun ne nerineg niyu ne impenurù ni Hisus apey niyu egkeherami ke engkey se keupiya rin, ne ini se nehuruwan niyu ketà ne ipenurù niyu wey ibpesabut niyu rut te menge ruma niyu. Pemeyveyuka niyu ke keupiya te Eleteala kayi te iringà niyu apey kew ebpeketavang te ruma ne etew, ne peselamat kew ve te Eleteala kayi te iringà niyu egenat dut te dekelà ne hinawa niyu.

2 Tiselunika 1:4

Tembù be diyà te langun ne menge kevurunan te menge ruma tew ne mibperetiyaya te Eleteala ne indantal dey ke kegkehalew rey mekeatag keniyu. Uya, indantal dey mekeatag te kebperetiyaya niyu ne mibmeilut misan egkerasey kew dut te kebpekesekiti keniyu.

2 Tiselunika 3:1

Na, menge suled, duen pà ebuyuen ku keniyu. Iyan ku ebuyuen ne ipengeningeni niyu te Eleteala mekeatag te sikami su apey ebpekeeneb en te mehaan ini se Lalag te Eleteala ne ibpemesabut dey, su apey ke menge etew ne ebpekerineg kayi ne mehalew se kedtelimà dan iring keniyu.

1 Timoteo 2:8

Ne duen pà ebuyuen ku keniyu. Iyan ku kiyug ne piya endei en egkevurun ke menge etew ne mibperetiyaya ki Hisus, ne ke menge meama se ebpeneheewit keniyu te ebpengeningeni. Ugaid ne id-awà den pà neraan ke epes dan te ruma ran wey ke kebpelewlewaney ran apey iyan dan ibpeuna te hinawa ran ne ke Eleteala.

2 Timoteo 2:9

Tembù be egkerasey a guntaan su nevilanggù a iring te medmeraat ne etew. Ugaid ne misan mibakù a te sengkalì kayi, ne kenà dan egkevangen ke kebpemenudtul te Lalag te Eleteala.

3 Juan 1:12

Ugaid ne si Dimitriyu ne nereyù sikandin dut te langun. Su nekita ran en ne ingenat dà te rudsuan ne midumaan din ke benar ne impenurù kandin. Ne misan sikami ne edeyuen dey rema sikandin, ne netuenan nu se benar ini se egkehiyen ku.

Imperayag 14:6

Neipus arà ne ruen pà suluhuen te Eleteala ne nekita ku ne edlayang diyà te kewkewangan ne ebpemenudtul dut te Meupiya ne Tudtul. Ibpemenudtul din ini te warà kegkepupus din diyà te langun ne menge etew dut te ampew te dunya piya engkey ne edsusunan ne menge etew, piya engkey ne bansa, piya engkey ne kinehiyan te menge etew, wey piya endei ne menge inged.

Imperayag 22:17

Ketà ne ke Kedesenan ne Ebpetuntul te Menusiyà wey ke menge etew ne mibperetiyaya ne in-upama rut te ed-esawaan te Nati te Bilibili ne ed-umew ran se egkahi te, “Kayi kew en su apey kew ebpekeamung.” Iring ded dema ke langun ne nekerineg kayi ne iyan iya se med-umew ran dema se egkahi te, “Kayi kew en.” Langun niyu ne ed-umew ran keniyu su apey piya engkey keniyu ne ebpekeinum ne egkiyug ne ed-inum kayi te wayig ne mebpengkayi su ibehey ini dè duen, ne ebehey te umur ne warà edtemanan din.