1 Tiselunika 1:10 - Ke meupiya ne tudtul mekeatag ki Hisu Kristu

¹⁰ Ne ebpemenudtul dan dema mekeatag dut te kebpenareng niyu te kedlived te Anak din ne si Hisu Kristu ne egenat diyà te langit. Su si Hisus ini ke mibanew rin, ne sikandin ke ebpeliyu keyta su apey kenà kiyu edusaan te Eleteala ketà te hewii ne egkukumen din en ke kelibutan.

1 Tiselunika 1:10 ပူးပေါင်းရင်းမြစ်များ

Mateo 1:21

Ne ed-anak sikandin te meama ne iyan nu id-ingaran ne si Hisus su sikandin ke ebpelihaun te menge etew rin dut te menge salà dan,” ke se suluhuen.

Mateo 16:27

Su sikandin ke Impeanak te Menusiyà ne mehaan ne edlived kayi te ampew te dunya ne edumaan te menge suluhuen din wey ruen raman din ne iring te raman te Amey rin ne Eleteala. Ne ketà ne eberasan din ke menge etew dut te mid-ulaula ran kayi te ampew te dunya ke meupiya etawa meraat.

Mateo 16:28

Tentenuri nu ini,” ke si Hisus, “ruen ruma niyu kayi ne kenà pà ebpatey taman ketà te hewii ne egkekita ran ke Impeanak te Menusiyà ne ebpekeuma su Edatù te menusiyà kayi te ampew te dunya.”

Mateo 3:7

Guna su nekita ni Juan ke merakel ne Peresiyu wey Sadusiyu ne mibpengkayi su ebpebunyag ne migkehiyan din sikandan te, “Iring kew te menge uled ne ebpelahuy dut te apuy! Mehaan en egkeuma ke kedusa te Eleteala keniyu. Engkey se midtarem keniyu te ebpekeliyu kew ketà te ebpebunyag kew?

Lucas 2:25

Duen senge etew ne meama ne ed-ubpà ketà te Hirusalim ne ed-ingaranan ki Simeon. Metidtu se ulaula rin wey in-amin din ke hinawa rin te egelevek te Eleteala. Ne ebpemematì sikandin ke keenu ibpeliyu te Eleteala ke menge etew rin ne menge kevuwaran ni Israyil. Ne ke Kedesenan ne Ebpetuntul ne Menusiyà ne midlumun en ki Simeon.

Lucas 3:7

Migkuludkulud ma se menge etew ne mibpengkayi te ki Juan su ebpemebunyag. Migkehiyan din sikandan te, “Iring kew te menge uled ne ebpelahuy dut te apuy! Mehaan en egkeuma ke kedusa te Eleteala keniyu. Engkey se midtarem keniyu te ebpekeliyu kew ketà ke ebpebunyag kew?

Nenged-ulaula 1:11

ne migkahi ran te, “Sikiyu ne menge riyà ebpuun te Geliliya, maan ke ed-itindeg kew kayi se edlingakà diyà te langit? Si Hisus ini ne nekita niyu ne mibatun diyà te langit ne edlived ded kayi, ne ini se kedlived din ne iring ded dut te nekita niyu sikandin ne mibatun diyà te langit.”

Nenged-ulaula 17:31

Su ruen en intail te Eleteala ne hewii keuremà te edtimbangen din ke langun ne menusiyà. Ne metidtu se kedtimbang kayi ne etew ne nepemilì din ne edtimbang. Ne impekilala rin dut te langun ne etew te ini se nepemilì din su mibanew rin.”

Nenged-ulaula 2:24

Ugaid ne impeliyu te Eleteala si Hisus dut te inged ne Iveyaan su mibanew rin, su kenà egkepakey ne egkeveyveyaan si Hisus te kemetayen.

Nenged-ulaula 2:32

Ne ini se nekahi ni David ne iyan iya si Hisus,” ke si Pedro, “ne mibanew te Eleteala, ne langun dey ne neketitihus ne benar ini su nekita kayi te mata rey.

Nenged-ulaula 3:15

Ne mibpeimetayan niyu sikandin, ke ebpuunan te umur ne warà edtemanan din; ugaid ne mibanew te Eleteala sikandin. Ne ebpeketitihus key ketà te nevanew en sikandin su nekita rey.

Nenged-ulaula 3:21

Ugaid ne riyà pà ed-ubpà si Hisus te langit taman te kenà pà egkeuma ke hewii ne ebehuwen dut te Eleteala ke langun taman. Ne an pà ne edlived sikandin kayi te ampew te dunya iring dut te impesabut te Eleteala rengan dut te menge etew ne ebpemelambas te Lalag din.

Nenged-ulaula 4:10

ne sikiyu wey langun ne menge etew te Israyil ne sebuta niyu te iyan kebpekeitindeg kayi te meama ne ini se etuvangan niyu ne neulian en su atag dut te gehem ne ibpepevayà dut te ngaran ni Hisu Kristu ne riyà ebpuun te Nesarit. Si Hisus ini ke impelansang niyu riyà te pinebelavag ne kayu, ugaid ne mibanew en te Eleteala.

Ruma 1:4

Ne netuenan ta te si Hisu Kristu ne lunsey ne Eleteala, su impekita en te Anak sikandin ketà te mibanew te Eleteala sikandin.

Ruma 2:7

Ruen menge etew ne iyan dan ebpeisehen ne ke meupiya ne ed-ul-ulaan, su iyan netahù te itungan dan ne egkeuma ke hewii ne ebpekelusud dan en diyà te ed-ubpaan te Eleteala ne kenà igkeupama se keupiya rin. Ne ketà dan egkekita se nekesuhat dan te hinawa te Eleteala, ne riyà dan en ebpekeubpà taman te taman. Su ketà dan en egketelimà ke umur dan ne warà edtemanan din.

Ruma 4:25

Su si Hisus ke imbehey te Eleteala ne ebpebpatey mekeatag dut te menge salà tew, ne mibanew sikandin te Eleteala su apey iyan din kedtengteng keytew ne metidtu riyà te etuvangan din.

Ruma 8:34

Ne warè en ebpekekahi te dait ne edusaan ki, su mibpebpatey si Hisu Kristu ne inselidig te menge salà tew. Ne kenà ketà dà taman su nevanew en dema sikandin ne guntaani ne riyà sikandin te egkekewanan te Eleteala se ebpeninindeg keytew.

1 Kurintu 1:7

Engketà be ne warà kurang dut te merakel ne edsusunan te ketau ne ibehey te Eleteala su apey kew egketevangan te eduma rut te kiyug din gewii te edtahad kew rut te kedlived ni Hisu Kristu ke Kerenan tew.

Gelasiya 3:13

Ugaid ne impeliyu ki en ni Hisu Kristu su apey ki kenà edusaan su sabap te kenà ki ebpekegaga ne edtuman dut te langun kayi ne penduan. Impeliyu ki en ni Hisus su sikandin ke nerasey dut te kedusa keyta su migaked din ke kerusaan ta ketà te inlansang sikandin diyà te pinebelavag ne kayu. Su ruen impesurat ne Lalag te Eleteala ne egkahi te, “Misan engkey en ne etew ne mid-imetayan ne ibitin dut te pinebelavag ne kayu, ne tuus arà te merasey ne kedusa te Eleteala.”

Pilipus 3:20

Ugaid ne langun tew te tidtu ne mibperetiyaya ki Hisus ne kenà iring ketà, su misan ed-ubpà kiyu kayi te ampew te dunya ne ebpendiyà ki te surugà ne ke tidtu ne ubpaan tew. Ne riyà ebpuun dema ini se ebpenerengen tew ne Kerenan tew ne si Hisu Kristu ne mibpeliyu kenitew.

Kulasi 1:18

Sikandin ke ulu rut te langun tew ne mibperetiyaya, ne sikitew ne iring dut te lawa rin. Su sikandin ke Anak te Eleteala ne ebpuunan dut te behu ne umur ta su nevanew rin ded maa te minatey, ketà ne langun ne mibperetiyaya kandin ne egkevehayan te umur ne warà edtemanan din. Na kayi ve imbe ne netuenan tew te sikandin ke mepurù te langun taman.

1 Tiselunika 1:7

Tembù be sikiyu se nevaluy ne egkeiringan dut te mibperetiyaya diyà te inged ne Mesidunya wey Gerisiya.

1 Tiselunika 2:16

Su ibpeengked dan perem ke kebpemesabut dey te Meupiya ne Tudtul mekeatag ki Hisus dut te menge etew ne kenà Hudiyanen su apey egkepeneheewit dan te kebpekeliyu ran. Tembù be mid-umanan ke salà dan taman te neuma ke edtemanan din. Ne nekeuma en ke epes te Eleteala kandan!

1 Tiselunika 2:7

misan sikami ke kedserihan ni Hisu Kristu ne dait ne edeyuen niyu. Warà dey ul-ulaa se iring ketà, ugaid ne midtuganur dey sikiyu iring te metulanged ne iney ne edtuganur te menge anak din.

1 Tiselunika 5:9

Su ke Eleteala ne kenà iyan intahù te itungan din te kebpemilì din keyta ne egkevaluy ne menge anak din apey ki edusaan ketà te kegkukum din en te kelibutan. Ugaid ne iyan din intahù te itungan ne ebpekepeliyu keyta ibpepevayà te Anak din ne si Hisu Kristu ke Kerenan tew.

2 Timoteo 4:1

Na Timoteo, tehaad te si Hisu Kristu se edlived kayi su ebayàbayà te langun wey egkukum dut te menge etew ne biviyag wey ke minatey en, ne ruen idsuhù ku kenikew diyà te etuvangan te Eleteala wey si Hisu Kristu.

Tito 2:13

Ini rà be se ed-ul-ulaan tew te kedtahad tew ketà te meupiya ne Hewii ne ebpenerengen tew ne egkekita ta ke ed-andlag ne raman din dut te kedlived te Eleteala ne mekegehem ne si Hisu Kristu ke ebpeliyu kenitew.

Hibruhanen 10:27

Inemulà te iyan tew rà egkepenareng ne kegkeandek dut te hewii te kegkukuma te Eleteala kenitew. Su ketà ne ke langun ne mid-engkenà kandin ne edtutungen diyà te edsindrew ne apuy.

Hibruhanen 9:28

Ne iring ketà ne keseveka rà imbehey ni Hisus ke hinawa rin te ebpebpatey su apey ke salà dut te langun ne menge etew ne egkeawà. Ne edlived pà maa kayi te ampew te dunya, ugaid ne kenà maa edsaup ebpebpatey te salà tew. Inemulà te ed-engayen din ke sikitew ne edtahad kandin.

1 Pedro 1:21

Ne geina te ini se mid-ulaula ni Hisus ne nekeperetiyaya kiyu te Eleteala. Su sikandin ke mibanew ki Hisus wey mibpepurù dema kandin diyà te langit. Tembù be sikitew ne iyan tew ebperetiyayaan wey edserihan ne Eleteala ne ebanew keytew rema keuremà.

1 Pedro 1:3

Ne edeyuen tew ke Eleteala ke Amey rut te Kerenan tew ne si Hisu Kristu. Dekelà se kegkeyru rin keyta su egenat te kebanew rin ki Hisu Kristu ne mibehayan kiyu rin te behu ne umur ne nevaluy ki ne menge anak din. Tembù be ruen ebpenerengen tew ne egkevanew ki red te Eleteala ne ebehayan te umur ne warà edtemanan din diyà te ubpaan din.

1 Pedro 2:21

Su iyan egkiyuhan te Eleteala keyta ne edtigkeran ta te misan engkey ne keresayan ne ebpekeuma keyta. Su netuenan ta ne si Hisu Kristu ne nerasey nevenar mekeatag kenitew, ne sikandin se ledawan ne ed-iringan ta.

1 Pedro 3:18

Su misan si Hisu Kristu ne warà salà din ne mibpeimatey sikandin su atag dut te sikitew ne mekesesalà su apey ibpelived ta ke hinawa ta diyà te Eleteala. Keseveka rà se kinepatey rin atag dut te salà ta, ne kenà en edseupan su nepasad en. Ugaid ne misan mid-imetayan te menge etew ke lawa rin ne biviyag ded sikandin su warà mibpatey ke gimukud din,

2 Pedro 3:12

gewii te edtehad ki pà dut te arà se Hewii Rin. Ne id-amin ta ke baher ta te egelevek dut te ini ne impehelevek din keyta su apey mehaan ne ebpekeuma arà se Hewii Rin. Na benar iya ini se migkahi ku ne egkeamin-amin egketutung ke langit ne langun ne egkekita ketà ne egketunag te apuy.

2 Pedro 3:14

Na menge suled, tehaad te arà ne hewii se edteharan tew, ne id-amin tew ke hinawa tew te ed-ulaula te kiyug te Eleteala su apey warà meraat kayi te keytew ne igkesawey rin ketà te kebpekeuma rin wey apey melinew se hinawa ta diyà te kandin.

Imperayag 1:18

Siaken ke ruen umur din ne warà edtemanan. Ne misan mid-imetayan a nikandan ne nevanew a iya, ne guntaani ne kenà ad ebpatey. Siaken ke egawed dut te umur te menge etew, ne siaken ded ke ebayàbayà dut te Iveyaan.

Imperayag 1:7

Na kelimùlimù ne pegitunga niyu ini. Ebpekeuma si Hisu Kristu ne edumaan dut te menge sehulapun. Egkekita sikandin dut te langun ne menusiyà abpeg dut te mid-imatey kandin. Ne ebpeninehew ketà ke langun ne menge etew kayi te ampew te dunya su egkeandek dan te kegkukuma rin kandan. Egketuman ini.