1 Timoteo 5:17 - Ke meupiya ne tudtul mekeatag ki Hisu Kristu

¹⁷ Duen pà egkehiyen ku, Timoteo, mekeatag te menge etew ne ebpeneheewit te menge mibperetiyaya ki Hisus. Embiya meupiya se kebpeneheewit dan, ne edati niyu sikandan wey edsukayan sikandan te meupiya. Labi en be ke etew ne mibpenamantaman sikandin te kebpenurù din wey kebpesabut din te Lalag te Eleteala.

1 Timoteo 5:17 ပူးပေါင်းရင်းမြစ်များ

Mateo 24:25

Tembù be idtarem ku keniyu ini,” ke si Hisus, “su apey niyu meingati te kenà pà ini egked-ulaula.

Lucas 10:7

Ubpà kew ketà te valey ne ruen migalàhalà keniyu taman te egkeuma ke ked-awà niyu ketà te inged dan. Kenà kew ed-arat-arat te ked-ubpà niyu. Ne telimaa niyu misan engkey se idsaru ran wey ibpeinum dan keniyu su mehelalew ran en keniyu. Su ke etew ne egelevek ne dait ne edsukayan.

Lucas 12:42

Ne midtavak si Hisus ke Kerenan te sempita ded, ke sikandin te, “Ke edsugsuhuen ne egkedserihan wey metmetau su edtuman te idsuhù kandin, ne ebpekemalen en dut te ruma ne edsugsuhuen. Ne sikandin se ebehey te egkekaan dut te ruma ne edsugsuhuen ketà te kegkekaan dan.

Juan 4:38

Sikiyu,” ke si Hisus, “ne midsuhù ku te ed-ehani rut te warà niyu geleveka te kebuvur. Su duma ne etew se migelevek te kebuvur ketà, ugaid ne sikiyu en maa ke ed-ehani rut te gelevek dan.”

Nenged-ulaula 11:30

Na ini se mid-ulaula ran, ne mibpeewit dan te kureta ki Bernabe wey si Saulo diyà te menge pekilukesen dut te menge mibperetiyaya diyà te Hirusalim.

Nenged-ulaula 20:35

Arà se mevaher ne migelevek ku,” ke si Pablo, “ne impekita ku keniyu se mebpegelep kew rema su apey ruen ibpeketavang tew te menge ayuayu su edtentenuran tew ke menge lalag te Kerenan tew ne si Hisus ne migkahi te, ‘Ke etew ne ebehey te tavang, ne dekelà pà se kegkehalew rin dut te etew ne edtelimà te tavang.’ ”

Nenged-ulaula 28:10

Ne merakel se menge penggalew ran kenami, ne ketà te hewii ne ked-awà dey diyà te kandan ne ruen induran dan diyà te kapal ke misan engkey ne kurang dey te kedlayag.

Ruma 12:8

Ne embiya iyan imbehey keytew ne ketau te ebag-et te hinawa te ruma tew, ne arà imbe ke ed-ul-ulaan tew. Ne embiya manen iyan imbehey keytew ne kedtavang tew, ne iyan iya se edtevangan tew ke menge ruma tew ne ebpegungayà te tavang. Ne embiya maa iyan imbehey keytew se ebpeneheewit te menge mibperetiyaya, ne arà imbe ke edsemikaran tew. Ne embiya maa iyan imbehey keytew ne ke ketau te edtuganur te ebpengepesangan, ne iyan iya mehalew se kedtevangi tew kandan.

Ruma 15:27

Ne lila nevenar ini se netahù te itungan dan ne kedtavang dan, ne edait iya rema ketà su nekeutang dan dut te limù te menge Hudiyanen ne mibperetiyaya riyà te Hirusalim. Iyan ku egkehiyen ini su embiya kenà ke menge Hudiyanen ne mibperetiyaya diyà te Hirusalim, ne warà metueni dut te menge etew ne kenà Hudiyanen ke benar ne penurù mekeatag te Eleteala. Tembù be edait iya ne edtavang ke kenà menge Hudiyanen dut te menge Hudiyanen riyà te Hirusalim ne ebpengevuluhan te egketemanan din.

Ruma 16:12

Ne ibpesampey e rà nikiyu riyà te ki Tripina wey ki Tripusa, ke menge mehiedgied ne sugsuhuen ni Hisu Kristu ke Kerenan tew. Ne ibpesampey e red nikiyu riyà te ki Persida, ke megeget ne sepekat ku ne rekelà se neveelan din te kedtumana rin dut te mibpeveelan kandin ni Hisu Kristu ke Kerenan tew.

1 Kurintu 15:10

Ugaid ne ke raat te nanam te Eleteala kedì se puunan te kenà dineg dà te ebpengumew se kineparin te ulaula ku. Ne ruen nepentahan din ke kineraat te nanam din kedì su mibaluy a rin ne kedserihan din, ne ketà puunan ne iyan pà dekelà se nehelevek ku rut te langun ne kedserihan ni Hisus. Ugaid ne misan iring ketà se helevek ku, ne kenà ku arà egkegaga su arà ne tavang ded te Eleteala kedì.

1 Kurintu 16:16

Tembù be, menge suled, ebuyuen ku keniyu ne dumai niyu ke lalag dut te etew ne iring ketà wey misan engkey ne ruma ran ne edtavang te ibpehelevek kandan.

1 Kurintu 3:9

Su sikami ki Epulus ne teleduma te egelevek te Eleteala, ne sikiyu ke iring te pengengewiran te Eleteala ne ebpehelevekan din kenami. Iring kew rema te ebelayan te Eleteala ne warà pà meipus.

2 Kurintu 6:1

Engketà arà ne mid-amung key dut te Eleteala te egelevek dut te helevek din kayi te ampew te dunya. Ne ebuyuen dey keniyu ne ibpekita niyu te mid-upianan niyu ke daat te nanam din keniyu su apey kew ebpekeliyu.

Gelasiya 6:6

Ne ruen pà idtarem ku keniyu. Ke etew ne nepemandù dut te Meupiya ne Tudtulan, ne kenà egketuen te wagib te kenà din ebehayan te meupiya ke etew ne mibpemandù kandin.

Pilipus 2:16

Su ketà ne ebpesebutan niyu kandan ke Meupiya ne Tudtul ne ebehey te umur ne warà edtemanan din. Embiya ini se ed-ul-ulaan niyu ne ruen kewagib ku te edantal mekeatag keniyu ketà te hewii ne kedlived ni Hisus su sikiyu ke tuus te miberepantag ded ke kinerumerasey ku.

Pilipus 2:29

Ne ketà te kebpekeuma rin ne gelhelawa niyu sikandin su tidtu ne suled tew sikandin egenat te kebperetiyaya rin te Kerenan tew. Ipekita niyu te ked-adat niyu te menge etew ne iring ki Ipapruditu.

Pilipus 4:3

Ne sikuna ne megeget ne ruma ku, ne tavang ka te ebpedtuntey kandan. Su in-amin dan ke hinawa ran te edtavang kedì te ebpesabut dut te Meupiya ne Tudtul. Uya, sikandan engki Klimen wey ruma pà ne layun edtavang kedì. Nekesurat en te Eleteala ke ngaran dan ketà te riberù ne edsuratan din te menge ngaran te etew ne nevehayan en te umur ne warà edtemanan din.

1 Timoteo 3:5

Su embiya kenà din egkegaga te ebpeneheewit ke kandin ne menge anak, ne iyan din pè be megaga te ebpeneheewit se merakel ne etew ne mibperetiyaya ki Hisus.

1 Timoteo 4:10

Tembù be ebpegelep te egelevek te Eleteala su edsarig ki te Eleteala ne warà kemetayan din ne iyan ebpekepeliyu te langun ne menge etew, labi en ke menge etew ne mibperetiyaya kandin.

1 Timoteo 4:14

Ne kenà nu lipati ke ketau nu te ebpeneheewit te menge mibperetiyaya ne imbehey te Eleteala keykew ketà te midampen ka rut te menge pekilukesen te menge mibperetiyaya ne impengeningeni ka rin. Su iyan dan migkahi ke impesabut kandan dut te Ebpelambas te Lalag te Eleteala.

1 Timoteo 4:16

Urami nu ke ed-ul-ulaan nu wey ke kebpenurù nu. Su embiya edumaan nu ini se migkahi ku, ne kenà sikuna rà se ebpekeliyu rut te kedusa te salà nu su misan imbe rema ke ebpemineg keykew ne ebpekeamung.

1 Timoteo 4:6

Embiya ibpenurù nu ini se migkahi ku kayi, Timoteo, diyà te menge mibperetiyaya keniyan te keniyu, ne tuus arà te egkeserihan ka ne suhù ni Hisu Kristu ne ebpesabut te lalag din. Ne tuus dema te mid-iseg ke sarig nu su intahù nu te hinawa ke tidtu ne penduan wey midumaan nu te arà arè en.

1 Timoteo 5:19

Embiya duen ebpekesuhat te etew ne ebpeneheewit te menge mibperetiyaya te Eleteala ne meraat ne ulaula, ne kenà niyu pehimbenara ke kenà duen deruwa etawa tetelu ne ebpeketitihus te arà ne ulaula rin.

1 Timoteo 5:3

Na Timoteo, tevangi niyu ke menge valu ne meritan ne warà egkepesineruwan dan te kegkeuyag dan.

2 Timoteo 2:6

Iring kiyu red dema te etew ne ebpegelep te kebpengengawid din, warà duma ne egkeuna ne egkeuntungan dut te egkeehani rin ke kenà sikandin ded.

2 Timoteo 4:2

Iyan ku idsuhù keykew ne kenà ka engked se ebpesabut kayi te lalag te Eleteala. Misan endei ka egketahù wey misan engkey ne hewii, ne iluta nu se kebpemenudtul nu rut te menge etew. Penurua nu ke menge etew ne ebpekesuwey. Iluta nu ve ke kebpesabut nu taman te egkerumaan dan ke lalag te Eleteala. Ne beg-eta nu ke hinawa rut te menge etew ne mibperetiyaya gewii te ebpenurù ka kandan te menanew.

Hibruhanen 13:17

Perumaruma kew te idsuhù dut te menge etew ne ebpeneheewit te menge mibperetiyaya keniyan. Su sikandan ke midsuhù te Eleteala te edtuganur keniyu te meupiya, ne ruen hewii ne ebpekeuma ne ebpengetuvang dan diyà te Eleteala se ebpenudtul ke engkey se kinepenurù dan keniyu. Ne embiya edumaan niyu ke idsuhù dan, ne egkevag-et ke hinawa ran te edtuman dut te ibpehelevek kandan te Eleteala. Ugaid ne embiya kenà kew ebpemineg te suhù dan, ne egkerehenan dan ne warà keupianan ne egketelimà niyu.

Hibruhanen 13:24

Ne penudtuli niyu ke langun ne ebpeneheewit te menge mibperetiyaya riyà wey langun ne menge etew te Eleteala ne ebpengpenginginsà key kandan. Ini se menge ruma tew te ebperetiyaya ne riyà ebpuun te Italya ne ebpengpenginginsà dema keniyu.

Hibruhanen 13:7

Kenà niyu lipati ke menge mibpeneheewit keniyu ne mibpenurù keniyu te Lalag te Eleteala. Iyan niyu pegpegitunga ke meupiya ne ulaula ran wey ke sarig dan ne warà mebparin taman te minatey ran, ne arà be se iringi niyu.