1 Timoteo 5:15 - Ke meupiya ne tudtul mekeatag ki Hisu Kristu

¹⁵ Iyan ku kegkahi su ruen menge valu te misan gunteani en ne midsuwey en se ebperetiyaya ki Hisu Kristu ne si Setanas en ke datù te pekaid se edumaan dan.

1 Timoteo 5:15 ပူးပေါင်းရင်းမြစ်များ

2 Pedro 2:2

Ne misan iyan dan ibpenurù ne meraat, ne ruen merakel ne menge etew ne egkeekalan kandan ne eduma te menge ulaula ran ne meredsik. Ne sabap dut te keduma ran kandan dut te ulaula ne meredsik ne ke duma ne menge etew ne edsumpeliten ke benar ne dalan te Eleteala ne edumaan ta su kunaan dan ke iyan ed-ul-ulaan te sikami ne menge mibperetiyaya ne meraat.

1 Juan 2:19

Ne ini se menge kunterà ni Hisu Kristu ne engkungkun ne menge ruma tew te egkevurunan te menge mibperetiyaya ki Hisus, ugaid ne midsuwey ran kayi te keyta su kenà dan tidtu ne ruma tew te ebperetiyaya. Su embiya sikandan se tidtu ne ruma tew te ebperetiyaya, ne warà dan medsuwey keyta. Ugaid ne midsuwey ran, ne kayi te ini se kedsuwey ran ne egkekita te kenà dan tidtu ne ruma tew te ebperetiyaya.

2 Timoteo 4:10

Su mid-awà en si Demas kayi te kedì ne mibpendiyà te Tiselunika. Su iyan din pinedlabi ke keupianan din kayi te ampew te dunya. Si Kirisin se mibpendiyà te Galasiya wey si Tito se mibpendiyà te Dalmasiya.

1 Timoteo 1:20

Iyan iring kayi ne en si Himinyu wey si Alejandro. Midlekaan ku sikandan su apey egkeveyveyai en ni Setanas ke datù te pekaid apey ran metueni te kenà iya egkepakey ne edsumpeliten se Eleteala.

Imperayag 12:9

Su in-antug dan diyà te ampew te dunya ini se rekelà ne tendayag wey langun ne sakup din. Su ini se tendayag ne arà se engkungkun ne uled te rengdengani rà nevenar ne ed-ingaranan ki Setanas ke datù te pekaid, ne metau ne edlimbung te langun ne menge etew kayi te ampew te dunya.

2 Pedro 3:16

Diyà te langun ne surat din ne impenudtul din mekeatag te ini se hewii te kedlived ni Hisu Kristu kayi. Duen dema impenurù din diyà te menge surat din ne merehen ne egkesebutan, tembù be ke menge etew ne warà netuenan dan dut te benar ne penurù wey ke menge etew ne melemu ne eduma dut te kenà benar su mibèbeelan dà ne ebpekesuwey ran dut te meana rin. Ne kenà arà dà se insurat ni Pablo ne midsuwey ran dut te meana rin su iring ded se mid-ulaula ran dut te ruma ne impesurat ne Lalag te Eleteala. Tembù be edusaan dan te Eleteala kayi te mid-ulaula ran.

2 Timoteo 2:18

Su midsuwayan dan ke tidtu ne penurù su egkehiyen dan te neipus en ke hewii te kebanew te Eleteala te menge etew ne minatey. Tembù be ini ve se ebpemenudtulen dan ne ebpekeliveg te itungan dut te ruma ne mibperetiyaya.

2 Timoteo 1:15

Nerineg nu ke merakel ne mibperetiyaya kayi te Asya ne mid-iniyuhan a ran en abpeg en si Pihilyu wey si Hirmuhinyu.

Mateo 4:10

Ne migkahi si Hisus te, “Awà ka kayi, Setanas! Duen impesurat ne Lalag te Eleteala ne egkahi te, ‘Iyan niyu rà erapa ne Kerenan ne Eleteala niyu, ne sikandin dà se edsenguren niyu.’ ”