1 Timoteo 4:8 - Ke meupiya ne tudtul mekeatag ki Hisu Kristu

⁸ Meupiya se kedlumbad ta te lawa ta su apey ki ebmevaher, ugaid ne iyan pà muna ne ibaher tew te itungan tew se keduma tew te Eleteala. Su embiya ini se ed-ul-ulaan tew, ne ruen keupianan te kegkeuyag tew kayi te ampew te dunya wey ruen ded dema ketà te keuhet din ne hewii diyà te langit.

1 Timoteo 4:8 ပူးပေါင်းရင်းမြစ်များ

Mateo 12:32

Ne misan engkey en ne etew ne edlalag te meraatey mekeatag dut te Impeanak te Menusiyà ne egkepesahad te Eleteala te salà din, ugaid ne misan engkey ne etew ne edlalag te meraatey mekeatag dut te Kedesenan ne Ebpetuntul te Menusiyà, ne kenà en vulug egkepesahad te Eleteala ke salà din taman te taman.”

Mateo 19:29

Ne misan entei ne etew se neewaan din ke ubpaan din, menge suled din, menge etevey rin, ke amey rin etawa iney rin, menge anak din etawa ke tanà din su atag dut te keduma rin kediey, ne ebpeketelimà sikandin te kemehatus egketakep se neewaan din ne ebehayan pà te umur ne warà edtemanan din.

Mateo 6:33

Iyan niyu ipeuna te hinawa niyu ke kiyug te Eleteala wey ke Kedatù din keniyu, ne arà pè be ne ebehayan kew te Eleteala dut te langun ne kurang niyu.

Marcos 10:30

ne ebpeketelimà sikandin te kemehatus egketakep se neewaan din ne ubpaan din, menge suled din, menge etevey rin, ke iney rin wey amey rin, menge anak din, wey ke tanà din te biviyag pà sikandin kayi te ampew te dunya, ne ebpekepevayà pà rema te kemeresayan. Ne ketà te akir din ne hewii ne egketelimà din ke umur ne kenà edtaman.

Lucas 5:38

Tembù be iyan be kemeyidan ne ke behu pà ne tebà ne idtahù te edtehuan ne behu pà ne mibeelan.

Ruma 8:28

Ne sikitew ke mibpemilì te Eleteala te iyan nerumaan ke netahù te itungan din, netuenan tew te langun ne egketemanan tew ne ebeluyen din ne keupianan tew kayi te keytew ne egkelimù kandin.

1 Kurintu 3:22

Su sikami ki Epulus wey si Pedro ne midsuhù key te Eleteala te edtavang keniyu, ne engketà be ne warè en pantag din se ebpemilien key nikiyu. Su langun taman ne mibeelan te Eleteala ne imbehey rin en keniyu, misan ke umur niyu, ke kepepatey niyu, ne misan ke egketemanan niyu en guntaani wey ke keuremà. Uya, langun kayi ne imbehey en te Eleteala keniyu

1 Kurintu 8:8

Ugaid ne egkehiyen ku keniyu te kenà ini se egkeenen se iyan kedtengteng te Eleteala keyta ne meupiya. Su riyà te etuvangan din ne neked-iring dà se egkaan ki etawa kenà.

1 Timoteo 4:7

Kenà ka sehipà te layab ne guhud te kepuun su warà pantag din ne kenà diyà ebpuun te Eleteala. Ugaid ne pegitunga nu te mevaher ke engkey se ulaula ne ebpekesuhat te Eleteala.

1 Timoteo 6:3

Embiya ve ruen ebpenurù te senge bias su kenà iring kayi te tidtu ne penduan ne impenurù ni Hisu Kristu ke Kerenan tew,

1 Timoteo 6:5

wey ebpeep-epuley ran su ini ke ulaula rut te menge etew ne nereetan en ke itungan dan ne warè en iya meketahù te itungan dan ke tidtu ne penurù ni Hisu Kristu. Su iyan dan kunaan ke kebpesakup dan te Eleteala ne ebpekegkewasa kandan.

1 Timoteo 6:6

Ne benar ne sikitew ne mibperetiyaya en te Eleteala ne ruen ke kewesai tew, ugaid ne kenà kearen ini. Su iyan dekelà te hinawa tew ini se kebpesakup tew te Eleteala wey kebmeupiya te hinawa tew ke misan deisek dà ne kearen tew.

2 Timoteo 3:5

Engkungkun ne mibperetiyaya ran te Eleteala ugaid ne kayi rà te ampew su kenà dan ebperetiyaya te ruen gehem te Eleteala. Na pekeriyù ka te menge etew ne iring ketà.

Tito 3:8

Ini ve iya, Tito, se langun ne menge lalag ku ne benar. Kiyug ku ne idtahamtaham nu ini ibpenurù su apey ke menge etew ne mibperetiyaya te Eleteala ne egkeinesa ne ebpegelep te ulaula ne meupiya, su keupianan ini wey berepantag dema te langun dan.

Hibruhanen 13:9

Uram kew ke egkepeneheewit kew rut te merakel ne kenà tidtu ne penurù su ini ke kebpekesuwey niyu rut te benar ne impenurù keniyu. Ne warà duma ne ebpekevaher te kedsarig niyu te Eleteala ke kenà ke tavang din keniyu ne kenà kayi te keduma niyu te suhù mekeatag te liiyen te egkeenen, su ke kedtanud niyu ketà ne kenà ebpeketavang te kebperetiyaya niyu ki Hisus.

1 Juan 2:25

Ne ini se impasad ni Hisu Kristu keyta ne ibehey rin ini se umur ne warà edtemanan din.

Imperayag 3:12

Ne piya engkey ne etew ne kenà egkegaga dut te penggeram te datù te pekaid, ne arà ne etew ne ebeelan ku ne iring te pelaus ne metigker diyà te nekebpurù ne baley te Eleteala diyà te langit ne ed-ubpà ketà taman te taman. Ne idsurat ku riyà te kandin ke ngaran dut te Amey ku ne Eleteala wey ke ngaran dut te inged te Eleteala ne ed-ingaranan te Behu ne Hirusalim, ini se inged ne ebpenaug diyà ebpuun te Eleteala diyà te langit. Ne idsurat ku rema diyà te kandin ini se behu ne ngaran ku.

Imperayag 3:21

“‘Ne piya engkey ne etew ne kenà egkegaga dut te penggeram te datù te pekaid ne ebpepinuuwen ku kayi te uvey ku ketà te edetuan ku su ed-amung kedì te edatù. Iring dema kediey te warà a megaga te penggeram te datù te pekaid ne mibpepinuu a diyà te uvey te Amey ku ne Eleteala su ed-amung a te edetuan din.