1 Timoteo 1:17 - Ke meupiya ne tudtul mekeatag ki Hisu Kristu

¹⁷ Ne edeyrey kiyu ve te Eleteala taman te taman su sikandin dà se Eleteala. Ne sikandin se ebayàbayà te langun taman te warà ketepusan din. Kenà sikandin egkekita su rengan ne daan en sikandin su warà rudsuan din ne warà kemetayen din.

1 Timoteo 1:17 ပူးပေါင်းရင်းမြစ်များ

Mateo 25:34

“Ne egkahi en ini se punggus ne ratù kayi te menge etew te egkekewanan din te, ‘Sikiyu ne mibehayan te keupianan dut te Eleteala ne Amey ku, ne lusud kew dut te Kedetuan te Eleteala ne impenehana keniyu igenat dut te kinelimbaha te kelibutan.

Mateo 28:20

Ne penurua niyu sikandan te kedtuman dut te langun ne impenurù ku keniyu. Ne ini se idtahù niyu te hinawa te layun a eduma keniyu taman te taman.

Mateo 6:13

Ne ipekeriyù key nikuna dut te menge mevaher ne penggeram, ne pekelangi key dut te datù te pekaid.’

Juan 1:18

Warà senge etew rà ne nekekita te Eleteala, liyu rà dut te budtung ne Anak din ne si Hisu Kristu, su iyan dan layun teleduma. Ne sikandin ke mibpesabut keytew mekeatag dut te Eleteala ne Amey rin.

Juan 5:44

Memenu ma se kebperetiyaya niyu embiya iyan niyu rà ebpemengaan se kegkereyù keniyu te menge ruma niyu, ugaid ne warà niyu pemengaa ke ralan te kegkereyù ne riyà ebpuun te budtung ne Eleteala?

Ruma 1:20

Su igenat te kinelimbaha te Eleteala kayi te dunya, ne misan kenà egkekita ke Eleteala, ne melemu ne egkekita ke keupiya rin wey ke rekelà ne gehem din ne warà ebpekerepeng kayi te egkekita tew ke langun ne nelimbag din. Tembù be warà etew ne ebpekeparew te kenà dan egketuenan te ruen Eleteala.

Ruma 1:23

Su kenà iyan dan ebpengerapan ke tidtu ne Eleteala ne warà kemetayen din, su iyan dan ebpengerapan ne menge ledawan ne mibeelan dà iring te paras te etew ne ruen kemetayen din, wey iring te paras te menge pepenuk, binatang wey uled.

Ruma 11:36

Su langun ne nelimbag ne riyà ebpuun te kandin ded ne bineelan. Ne sikandin ded ke ebayàbayà kayi te langun, ne iyan din kedlimbag kandan su apey edeyuen sikandin. Ketà be ne edeyuen tew ke Eleteala taman te taman!

Ruma 16:27

Ne ke sebseveka rà ne Eleteala ne iyan dà netau te langun. Uya, edeyuen tew te ibpepevayà tew ki Hisu Kristu taman te taman. Arà dà taman. Pablo

Ruma 2:10

Ugaid ne langun te menge etew ne ed-ulaula te meupiya ne ebpekelusud diyà te ed-ubpaan te Eleteala ne kenà igkeupama se keupiya rin. Ne ketà dan egkekita te nekesuhat dan te hinawa te Eleteala ne riyà dan egketelimà ke kebmelintad te hinawa ran, ne elin ke menge Hudiyanen wey kenà Hudiyanen.

Ruma 2:7

Ruen menge etew ne iyan dan ebpeisehen ne ke meupiya ne ed-ul-ulaan, su iyan netahù te itungan dan ne egkeuma ke hewii ne ebpekelusud dan en diyà te ed-ubpaan te Eleteala ne kenà igkeupama se keupiya rin. Ne ketà dan egkekita se nekesuhat dan te hinawa te Eleteala, ne riyà dan en ebpekeubpà taman te taman. Su ketà dan en egketelimà ke umur dan ne warà edtemanan din.

Kulasi 1:15

Nevaluy ne etew si Hisu Kristu apey sikandin se ibpekita keytew te paras dut te Eleteala ne kenà egkekita. Ne raan en si Hisus dut te langun ne nelimbag te Eleteala ne sikandin se mepurù dut te langun ketà,

Hibruhanen 11:27

Ne sabap dut te sarig din te Eleteala ne mid-ewaan din ke inged ne Ihiptu ne warà meandek dut te epes te datù kandin. Ne misan pà merasey en se ibpevayà din ne warè en sikandin medlived su iring ma te egkekita rin en ne eduma ke Eleteala kandin, ne ke kenà ma egkekita.

Hibruhanen 2:7

Su pehaney ne mibeelan nu sikandan ne mevavà pà dut te menge suluhuen. Ugaid ne mehaan dà ini; su ibpepurù nu en sikandan te egkereyù wey egkeedatan

1 Pedro 5:11

Ne edeyù ki te Eleteala ne warà ebpekerepeng te gehem din taman te taman.

2 Pedro 3:18

Na iyan meupiya ne edtentenuran tew ne ibpeiseg tew pà ini se neheraman tew ne penaub ni Hisu Kristu ke Kerenan tew ne mibpeliyu keytew su apey ini se nesebutan tew mekeatag dut te impesabut din ne ibpeiseg dema. Ne sikandin dema ke edeyuen ta guntaani wey taman te taman. Ini rà taman se surat ku. Pedro

1 Juan 4:12

Warà etew iya ne nekekita te Eleteala. Ugaid ne embiya ebpelimlimuey ki, ne egketuusan ne kayi en te hinawa tew ke Eleteala, ne ebpeiseg ini se limù din kayi te hinawa tew taman te meilut.

Hudas 1:25

Kenà kiyu ed-engked se edeyrey te Eleteala su sikandin dà se benar ne Eleteala ne ebpeliyu kenitew su sabap dut te mid-ulaula ni Hisu Kristu ke Kerenan tew. Su sikandin dà se mepurù te langun ne warà repeng dut te keupiya wey gehem din, su mibayàbayà sikandin te aney en te warà pà limbaha ini se kelibutan taman guntaani en ne warà ketepusan din taman te taman! Ne metuman be ini. Arà dà taman. Hudas

Imperayag 15:3

Ne egkanta ran te bayuk ni Moises ini se miduma te Eleteala rengan, wey ke bayuk dut te Nati te Bilibili, ke sikandan te, “Is Eleteala ne Kerenan dey ne rekelà se kebayàbayà nu. Langun ne ed-ul-ulaan nu ne rekdekelà wey mekegeyip. Sikuna se edatù dut te langun ne menge inged, ne metidtu wey nekesuhat ke langun ne ed-ul-ulaan nu.

Imperayag 17:14

Ne ebpekibunù dan dut te Nati te Bilibili, ugaid ne ini se Nati te Bilibili wey ke menge sakup din se edtavan kandan. Su sikandin dà ke Mepurù dut te langun ne kerenan wey sikandin se Mepurù dut te langun ne menge datù. Ne langun ne sakup din ne ke menge etew ne mibpemilì te Eleteala ne mibpeperetiyaya wey metinumanen kandin.”

Imperayag 19:1

Dutun ne ruen nerineg ku ne iring te kehurub te denda ne menge etew diyà te langit se egkahi te, “Edeyuen tew ke Eleteala, su sikandin dà se ibpurù tew, uya, sikandin dà se ruen dekelà ne gehem din, ne sikandin dà se ebpeliyu keyta rut te salà tew.

Imperayag 19:16

Iyan insurat diyà te kumbalà din wey diyà te buvun din ne, “Datu dut te langun ne menge datù wey Mepurù dut te langun ne ruen bayàbayà din.”

Imperayag 19:6

Ne ruen nerineg ku ne iring te kehurub te denda ne menge etew su iring ke suwara ran te kedehuus te dekelà ne wayig, ne iring dema dut te ebpemberansì. Ne migkahi ran te, “Edeyuen tew ke Eleteala, su ini se Kerenan ne Eleteala tew ne iyan edatù te langun.

Imperayag 7:12

se egkahi te, “Egketuman ini. Edeyuen tew ke Eleteala tew. Ebentuhen tew sikandin. Ne ed-edatan tew sikandin su ke itungan din ne metampas, ne ke kebayàbayà din te edatù ne dekelà wey ke gehem din ne mevaher. Ebpeselematan tew sikandin taman te taman.”